Hamé róchá ke may sirá sálé tawám but, hamé róchay jendá mani zál kapt o bachakkén chokké áorty. Pameshká má chokkay nám Sálán kot.
Máh o róch gwazán bitant. Sáláná panch máh but. Ni man á baddhá kot, layb dásht, gón áiá gapp jat o padá wat gappáni passaw dát.
Sálán édege chokkáni wadhá at. Béparwáh o bézánt bale dóstnák. Albat áiay yakk chizzé cha ádege chokkán jedá at. Man á bechkandag yá kandagá naditagat. Man á keli kot, dastán kot, gwátá mán borret o padá gept, ádénk pésh dásht, áiay démá chó shádiá samá kot bale yakk randé ham áiay lontháni sará bechkandé dará nabut.
Awalá man o zál paréshán bitén bale padá má hayál kot ke dáninga kasán ent, démá balkén wat sharr bit.
Haw, haw, Sálán rost o bathérok but. Ni eskólá ham rawwá kanagá at bale kandagay nyámatá angat zebahr at. Mani gat o gománá ham naat ke mani wadhén washtabén mardoméay chokk choshén grántabé bit. Man hayrán atán ke eshiá cha kayá kasshetag. Man, mani zál, may hardokáni mát o pet, édege syád o wáres, drost washru o maskarábáz atant.
Má Sálán dáktarán pésh dásht. Drostáni gapp esh at ke dege hesábá chokk salámat ent. Albat é nakandagay ádat begenday eshiá cha bonpirok yá bonballokéá zortag bale dáktarán chó ham gosht ke mazan bit, wánit o donyáyá gendit godhá balkén wati é ádatá yalah bedant.
Sálánay nakandagay ádat maná sakk nádóst at bale áiay dege ádaté maná dóst but, chiá ke é mani tahá ham hastat: Máh o máhekánay dósti.
Yakk garmági sarshapé ke layn shotagatant, má lógay chattá shot o waptén. Máhá chárdah at. Sáláná mani rástén dast chó sarjáhá saray chérá at o chammy máhá sakk atant.
“Abbá!” áiá anágahá gosht.
“Hán.”
“Abbá! Máh parchá dhawldár ent?”
Man pád atk o neshtán. Mani zahg mani jostá cha man kanagá at. Bale man wati hayráni chér dát o kandáná gosht: “Agan taw kandagé janay godhá tará goshán gón.”
Kandag wati jáhá áiá zahr kot o shot mátay kashá wapt. Ched o pad áiá é jost hejbar cha man nakot.
Á shapi Sálánay jostá maná wati kasániay tránagéá perrént. Maná yád ent kasániá yakk baré man cha mátá jost kot:
“Ammán! Máh parchá dhawldár ent?”
Yakk baré wa áiá maná sharriá cháret o padá gosht: “Nazánán, mani chokk! Hodáyá kotag.”
Randá wahdé man master bitán, wánagá shotán godhá zánt ke máh chó zeminá hák o sengé. Bale é gappá maná géshter adhént ke máh ke asalá dege wadh ent, may chammán parchá dege wadh ent? Diri o nazziki nedáragán chiá matth kant?
Wahday gwazán at. Sálán ke charáiá pad márá hecch chokk nabut, rost o mazan but. Anchó ke man delá andázah jatagat, dáneshgáhá áiá shahzánti zort o wánagay sarjam kanagá rand hamódá lekcharár lagget.
Inchok wánag o donyágendiá rand ham áiay lontháni sará yakk baré kaséá bechkandé nadit. É ádatay sawabá á téwagén shahrá o kash o gwaray handán nám o dap at. Man o mani zálá dér at ke áiay é ádat kabul kotagat o áiárá hecch nagosht.
Yakk róché maná anchó hayál atk ke agan Sálán sir bekant, bit kant chokk o chalángáni sawabá nakandagay ádaty kamm kammá borawt. Man gón zálá gapp jat. Á gal but. Shapá má Sálán mán tarrént.
“Sálán! Siray bárawá tai hayál ché ent?” man jost kot.
“Hecch.” Áiá gwandhén jawábé dát.
“Agan tará jenekké dóst bit bogosh.” Mátá chondhet.
“Na.” Áiay passaw padá kasán at.
“Má pa taw deshtáré shóház bekanén?” Mátá áiay dastá gept.
“Master wat et.” Áiay gálewáray tahá na bézári hastat na hodónáki.
“Bale taw sir kanay na?” Man pakká kanag lóthet.
“Agan shomay razá ent, godhá haw.” Áiá anchó gosht goshay áiay na, may siray gapp bayagá ent.
Endege róchá má syádéay gwará shotén. Mardomán mannet bale wahdé jenekk sahi but, áiá adhi kot ke man choshén mard nagerán ke kandag ham nazánt.
Má bémorádá padá atkén. Dege do say jáhá shotén. Har jágah mát o petán mannet bale jenekkán adhi kot. Jenekkáni masterén irád Sálánay nakandag at.
Yakk shapé man Sálán mánband kot. “Taw wati é shummén ádatá parchá yalah nadiay? Má chinchok jáhá tai wástá shotagén. Mát o pet mannant bale jenekk adhi kanant. Dráh hamé tai badén ádatay sawabá. Wati grántabiá yalah day agan na téwagén zendá londh bi o benend.”
Áiá zukkag nakot.
Chamá róchá rand man paráiá janay shóház yalah dát bale mátay delé narmén, angat tach o táká at. Yakk róché áiá maná hál dát ke man jenekké dar gétkag. Jenekk Sálánay tabá sharr sahi ent chiá ke Sálánay shágerd ent.
É wasshén hálé at o badén ham. Jenekkay mannag wasshén gappé at bale shágerdiay gappá maná nagég kot. Chó mabit é ham békandagé bebit bale zálá pakká kotagat. Goshty jenekk rang o dánagá ham sharr ent o ru o damy ham wassh ent.
Padá má Sálán sálónk kot. Neshár rásti wazhgapp o polkandagé at bale hamá andázah ke má jatagat, rást nabut. Nesháray washruiá Sálánay grántbi bort nakot.
Sálé kappéá pad áyán chokké but. Jenekké at. Sálánay jenekk ke námy Zébá at, bathérok but. Zébáyá ke má pa dósti Zébol gosht, cha mátá kasshetagat. Anchén wazhgapp o washkandagé at ke dráh paráiá tonnig atant. Má ni Sálánay béruiay bárawá hayál kanag ham yalah dátagat. Márá Zébol bass at.
Zébolay ádat o tab cha petá chath jedá atant. Albat yakk ádaté áiá cha petá zortagat. É hamá at ke mani tahá ham hastat, bezán máh o máhekánay dósti.
Yakk máhekánén shapéay gapp ent. Má panchén thiwiay démá neshtag o hálán cháragá atén. Zébolá dam bort. Mani dastá gept o goshty: “Borén borzá.”
Man zánt ke máhá chárag lóthit. Man gosht. “Kammé sabr kan, mani mát! Man hálán chárán. Padá man o taw rawén.”
Bale áiá namannet. Dity ke pirok áyagay wadhá naent godhá wati petay baddhá kapt. Sálán zánán cha hálán shezár bitagat ke Zébolay yakkén goshagá pád atk. Hardo borzá shotant.
Má thiwiay cháragá delgósh atén ke anágah thahkéay tawár atk. Tawár cha lógay sará pédág at. Gálewár goshay Sálánayg at bale kassá báwar nabut. Sálán chón kandit?
Mani delá jat ke chó mabit shahzántén Sálánay sar gashtag, ganók ent. Zéboly cha lógay sará boná mán borretag o wat kandagá ent.
Má eshtáp eshtápá padánkán sar kapáná borzá shotén. Ódá ajabén nedáragé at. Zébol o Sálán hardo kandagá atant. Má bah mantén. Sálán o kandag? Hamé yakkén damáná mani delá hazár gapp áort. Man Sálánay dastá gept o pa narmi jost kot.
“Sálán, bábá! Che gappé?”
Sáláná kandáná passaw dát: “Abbá! Zébol goshit máh parchá dhawldár ent?”
Nágomán