Á warná dém pa wati menzelá gám janán at. Róch trond at bale kawshá róchay bránzáni sócháki próshtagat o garmági ásgwárén róchán haminchok ham báz ent.
Payádagay é sapar áiá sohbi dahay kesásá cha daggay kerray hóthaloká bongéj kotagat. Cha shahrá á basá atkagat. Áiá anchén bázáréá rawagi at ke ódá dagg nashot. Áiá cha hóthalokay wáhondá jost kot o sój dátagén némagá rah gept.
Do kalákay kesásá yakkajjá rawagá rand á pa dam kanagá kahiréay sáhegá nesht. Jigy pach kot o delbandy kawshá dát. Kawsh ke áiay hédén delbandá lagget, sártié jánay band bandáy sheng but o zhandiy rawán but.
Hamé sahtá nazziká kapótéá kuku kot. Áiá chamm shánk dátant. Nazziká kahiréay loddhókén tháláni sará kapóté neshtagat. Paré shahri mosáperá ke zendy modám shahray kukkár o jaggá o danz o dittáni tahá gwastagat, é ensertagén jangalay wasshén kawsh, drachkáni loddhag o zhámb zhámb o kapótay delsáchén kuku náyábén nyámat atant.
Áiá wati zenday é porémenén damán sakk dóst bitant bale é hayálá á abétk kot ke damánokéá rand á é dráhén nyámatán yalah dant o chedá rawt. Padá mardománi kerrá, hamá mardománi ke delá árám o ajámay badalá gam o garatthi diant. Charé mardomán wa é darchk, é morg, é kawsh sharter ant ke delay chell o zangán shódant o anchén delsobakkié baksháyant ke del pa bál kanagá holl bandit…
É damáná áiay delá holl kot ke á zenday kollén kár o cholópagán yalah bedant o hamé wadhén delárámén gyábánéá byayt o benendit o wati sarjamén zendá hamedá bogwázénit. Yá nákámá ázátén kahiré bebit o kapótáni zahirnálén kukuáni bétawárén gósh dárók bebit. Kawshay mastén shikkán boloddhit, máhay sártén rozhná bochokkit. Górwandh o menj o shanger bebit o zenday chárén róchán cha nádelserén mardomán dir hamé baheshtgónagén gyábáná bogwázénit.
Chónén sarsabzén wáhgé at bale hamé sahtá áiay hayálán taparéá shahm kot o kahiré bayagay wáhag mán áiay delá gimort… Wáhagáni ham haddé hast. Haddá bogwazant, gimorant.
Bale áiay wa hecch wáhag pilaw nabitagat… Áiay wáhag at ke dahá rand démá bwánán bale pet thibiá tahtay báhóth kot o dah mardomay láp dayagay dhobbah áiay shakarwarnáén kópagán kapt o wánagy shot. Ched o pad áiay wáhag at ke alkápén káré berasit bale sáléay tach o táká rand ham békár at. Godhsará sary pa másthariá kapt ke mán é molká bézarr o bébestárén nawkarié at. Nákámá yalah dáty nakot o ni hamesh ent hamé dirkaptagén bázáray bongéji wánagjáhá laggetagat.
Aiay wáhag at ke….. áiay wáhag béhesáb atant bale yakké ham pilaw nabitagat. Goshay áiay har wáhag cha haddá hamá dém at. Man kojám wáhagá bekanán ke cha haddá magwazit? Mani wáhagáni shahár parchá chó kasán ent?
Áiá pa nagégi drájén ginné kasshet o pád áyagá gég but ke móréá chammy kaptant ke kadhokki pádé dapá aty o kapán o pád áyáná rawán at. Á pa delgósh mórá cháragá lagget. Taw ham mani wadhéné ay. May dar pa dari yakk ent. Taw kasánén móré ay o man mazanén.
Mazanén mórá wati é hayálay sará bechkandet… Bale man cha taw démáter án. Báz démáter. Kojá mani janjál kojá taig. Man sorendaháni sarwari án pameshká har chizzá mani bahr géshter ent.
É nyámá mór charáiá say chár gám gestá bitagat. Taw shotay? Mani gappán gósh nadáray? Hayr, sharr ent, gósh madár. Mani hayálá taw ham árámén korshiáni sará nendókén wájháni wadhén béhájaté ay. Bale na… chó naent. Man rad án. Taw wa mani wadhéné ay! Taw mani paymá géshe wati tach o tákán naay. Hayr, taw boraw. Ni man ham rawán.
Á pád atk. Baygy baddhá kot o padá rah gept. Ni kawsh sost at o róchay ásgwárén bránz áiá ganter béwár kanán atant. Zittán á sar dán pád hédréch but. Áiá gón kásagchatthén lankoká péshánigay héd chokorréntant o gám trondter kotant. Gámáni konthi mán é thákén némróchá moptá ráhay shull dayag at.
Zittán á molkéay gwará raset. Gón sabzén kesháráni gendagá dely sárt tarret o molkay patanén banday sará bastagén káparay chérá shot o óshtát. Káparay chérá do barónk hastat o ápá némánén mashké tóki menokká dratkagat. Nazziká kass dará naat. Á pa dam kanagá barónkay sará wapt. Inchok dérá yakkajjá pádán rawagá rand ni edá tachk bayag sakk wassh at.
Damay bálá kanagá rand áiá cha mashká ródé áp pálát o wárt o padá barónkay sará nesht. Hamé wahdá kalamay jahlén tawáré áiay góshán kapt. Chakky jat o chárety. Yakk warnáén shepánké ramagá sar dián o kalam janán pédág at.
Garmay jalá kalamay janag! É wa chath másthariay wadhén káré. Áiá shepánkay sará kandag atk bale padá cha delay konjéá narmén tawáré atk. Belly kalam jant. É ásén garmá kalamay sártén zémer tóst kant. Belly jant… Ni kalamay tawár áiá wassh bayán at.
Wahdé shepánká á dit kalamay janagy band kot. Pasy cha dhegárán passend kahiráni chérá wápéntant o padá káparay némagá atk. Salám o jódhiá rand shepánká ród zort o cha mashká áp pálát o darámaday némagá shahártant. “Wájah! Áp nawaray?”
“Ennán, man anni wart,” áiá passaw dát. “Wájah”ay labzá áiay delá cha shepánká sharteriay máreshté pád kot. Áiá shepánkay némagá cháret ke gaburch gaburchá áp waragá at. Áiá é sótkálén warnáay sará bazzag but ke shakarwarnáiá ham démy krechk kapán at bale delá wassh ham but ke donyáyá choshén mardom hast ke man charáhán har wadhá gehter án.
Hamé wahdá dhegáray banday sará pasé dar kapt o dém pa keshárán maydány kot o áiá yád atk ke man ham békáriay zamángá pa nawkariay har hórkén jágahá anchó drekk zortagat.
“Kecch mer… kecch!” Shepánká barónká tekahén mokki chakápt o pasá sest per. Pas pad tarret. Chath hamé paym reshwatwárén apsaráni sóchákén gappán á cha kárgesán dar kotagat.
Másthará sar chandhént o é nawasshén hayál galléntant o dhegáray keshárán cháragá lagget ke pas pa áyáni waragá atkagat. Keshár anchó hajg o názork atant ke áiay delá ham gosht bwaresh.
Pasay gallénagá rand shepánk padá atk o nesht o másthar hamé hayálán at ke agan shepánk maná métagá sar bekant, sakk sharr ent bale shepánk ramagá chón bekant? É ham gappé at. Áiá cha shepánká jost kot: “Taw Sáhegábádá zánay?” “Haw, haw.”
“Nazzik ent, dir ent? Man hamódá másthar laggetagán.” Áiay delá atk bogoshán ke jalay sará nalay janagay kárá laggetagán.
“Nazzik ent. Man hamódá rawagá án. Man o taw pajjiá rawén.” Shepánká galé chet. Mástharéay hamráhiá bázárá rawag paráiá sharapay gappé at.
“Marchi ódá siré hast; batth o gósht ent, dhohl o nách ent. Dhegáráni sará pameshká kass nést.” Shepánkay chamm trepagá atant. Batth o góshtay námay eshkonagá mástharay dapá áp dát o rótán churr o chár shoru kot. Lebzán ér baráná áiá pa shepánkay wassh kanagá gón wassáchén paréshániá jost kot. “Godhá ramag molkán narawt?”
“Ennán, ennán. Man ramagá sar dián kanán, barán gón kawray kerray óthagá. Ódá kahiráni chérá wápénánesh. Damesh bortag. É garmay jalá hecch jáh narawant. Padá man o taw rawén siray sará. Tará mardom gendant gal bant. May handá wánendagén mardom nést o dhanni másthar najallant.”
“Hummm.“ Másthar mardománi gal bayagay hayálá gal but. Shepánkay danzén démá cháráná josty kot: “Taw parchá nawantag?”
“Man?” Shepánká kandet. Áiay chirká zardén dantánán padá mástharay delá sharteriay máresht pád kot. “May wahdá eskól nabitag. Eshiá hamesh ent say sál ent bastagesh.”
Másthará sar sorént. Padá shepánká kammé hayál kot o gosht: “Wájah! Baré baré man goshán drégatén man máshtharé biténán. Tai wadhá mani zend ham sharr bitagat o chokkán wánénóké ham rasetagat.”
Másthará hayrán hayráná áiay némagá cháret. Shepánkay zerén chammáni tahá mortagén wábáni jón trappal atant. Goshay hamé sahtá másthará wati nawkari sakk dóst but.
Nágomán