Sarsabzén drachkáni o rang rangay dhawldár o washbuén polláni nyámá pakkáén daggay sará Ométánay kárgádhi wár wárá rawán at. Áiay kashá sharrangén Bolór neshtagat o dhannay delsáchén nedárgán cháragá at.
Jambarán mahgónagéay syáh o bazén malgóráni wadhá ázmán andém kotagat. Sártén kawshé kasshagá at. Ápwárén drachk wati názorkén lamb o thálán loddhénagá atant.
Drachkáni sará neshtagén jengoláni choli choli, koliáni koli koli o kapótáni kukuay bédarwarén zémer sáz atant. Chágerday haryakk chizzé goshay cha galá bál at. Polgwárén bahárgáhay mósom at. Hawrán delay maylá gwartagat. Lad o gyábán, kóh o kuchag dráh ábád atant.
É mastén mósomá Ométán o áiay mahdróshomén dóst Bolór pa sayl o sáwáté dar atkagatant o anni áyáni gádhi sarsabzén jangaláni nyámá wár wárá rawán at. Gádhiay kánch pach atant. Shaytánén kawsh gón Bolóray pachén malgórán laybá at.
“Bolór!” Ométáná áiay némagá pa mehr cháret.
“Hummm.” Á dhannay nedáragáni cháragá delgósh at.
“Taw harwahdá dhanná chiá cháray? Baré baré may némagá ham chamshánké beday. Má ham tai porkaypén cháragáni wáhagdár én,” Ométáná gosht o sanjay dráhén rang Bolóray démá tálán bitant. Áiá Ométánay dapá hazár randá é mehrdarshánén gapp eshkotagatant bale padá ham lajjy but.
“Pachén jágahéá borén. Yappaymá drachkáni chérá bayag wassh naent.” Bolórá kandet.
Ométáná gádhi táb dát. Kawshay trondén kóléá Bolóray drájén mahpar bál dátant o áyáni lamb Ométánay démá shengéntant.
“Bolór! Wati malgórán sarpad kan mani chammán andém makanant. Maná wa pésará tai mehrá anchó chamband kotag ke kollén donyáyá béke tará dege kassá nagendán.”
“Taw wa sháeré ay, Ométán! Man pésará nazántag,” Bolórá kandáná gón thahlé wati drájén malgór poshtá chandhetant.
“O taw shakkalén shayráni anchén ketábé ay ke del goshit harwahdá tará bwán o bwán,” Ométáná anchó gosht goshay hakk o del wasshén shayré wánagá ent.
Bolóray hazárzémerén thahk chárén némagán sheng but.
Kammé rawagá rand gádhi cha borz o bazén drachkáni nyámá dar atk o sarsabzén daynagéá sar but.
“Hamedá bedár,” Bolórá gosht. Ométáná gádhi óshtárént. Doénán kawsh kasshetant o shepádá lahmén káháni sará dast mán dast rawán bitant.
“Chónén wasshén mósomé,” Bolórá ázmánay démá lónjánén jambaráni némagá cháret.
“O é mósom taw brahdárter kotag.” Ométáná áiay dastá gept. Bolórá kandáná gosht: “Hawré bitén mósom ched o washter bitagat.”
“Hawr bit.” Ométáná anchó gosht goshay hawr áiay dastá ent.
“Taw chón zánay?”
“Bass man zánán, hawr bit. Bechár jambarán, chón lónján ant.”
“Balkén nagwárant.” Bolór sabzén káháni sará nesht. Ométáná áiay kerrá srósh dát o wapt.
“Man goshán gwárant.”
“Nagwárant,” Bolórá Ométánay konnat kanagay wástá jáheli kot.
“Shart banday gón?” Ométán pád atk o nesht.
“Haw.”
“Bechár!”
“Cháretag bale shart ché ent?” Bolórá bechkandet.
“Shart… Hán, sharté hast bale tawy mannay?”
“Yabbaré bogoshy gón,” Bolórá adhi kot.
“Chó nagoshány gón, yabbaré bemanny, randá goshány gón.”
“Sharr ent bábá! Mannány,” Bolórá narm narmá gosht. Goshay áiá kammé báz andázah bitagat ke shart chónéné bit.
“Wádah kan.”
“Wádah ent.”
“Godhá shart esh ent ke agan hawr bit, taw maná chokkagé beday. Nabit, man tará dián,” Ométáná kandáná shart gosht.
“Ubábi!” Bolór pád atk o óshtát. “Man é shartá namannán.”
“Ni chón namnnay, taw wádah kotag.” Daningah Ométáná gapp dapá at ke trampé áiay dastá lagget.
“Eshnáyá! hawr ent. Man shart bort,” Ométáná kukkár kot. Bolórá áiay dastay sará kaptagén trampay némagá cháret ke hamé wahdá trampé áiay jenday péshánigá kapt. Áiá shart báhéntagat. Pameshká dasty tokk jatant o tatk. Ométán áiay dombá kapt. Kammoké tachagá rand Ométáná Bolór rasént o poshtokái goláésh kot.
“Ométán! Yalah day na.” Á pa dar áyagá kolkochagá at.
“Parchá?” Ométáná á kajjet.
“Bass maná yalah day,” áiá ném kandán o ném gréwáná gosht.
“Ónhón… chó taw yalah nabay, pésará zobáná mók, randá yalah bay.”
Áiá Bolóray dém gón wat chakarrént o chokkagá gég but ke Bolórá dast wati démá dáshtant. Ométáná á keli kot. Bolórá kandet o dasty sholag bitant o Ométáná áiay sohrén lontháná drájén wásé gept… Trampán ér dát.
Bolórá zór jat o cha Ométánay ambázán dar atk o dém pa gádhiá shot. Bale Ométán padá áiá sest per o gepty.
“Kojá raway?” Ométáná áiay doén dast mohr dáshtant.
“Edá hawr ent. Pocch missant. Hák o gelá mén bant. Borén gádhiay tahá nendén.” Bolór pa rawagá zór janagá at.
“Ónhón… na man wat rawán, na tará kellán,” Ométáná á angat mohr dáshtagat. “Pocch belly missant, belly gelén bant, ché bit? Garmági hawré. Choshén mósom baré baré kayt.”
“Na, man rawán,” Bolórá per léset.
“Ennán, marchi man tará missénán gón. Mani ján! Choshén mósomá agan may pocché mamissit godhá may warnái ché goshit.”
Hamé wahdá anághá geróká trondén shahmé jat o padá ázmánderrén grandéá sarjamén gédi mán patát o Bolór Ométánay ámbázán potert.
Hawr rechagá at. Bolóray pocch missetag o jáná lecchetagatant o áiay warnáén báláday drostén jahl o borz dará atant. Doén tarrén káháni sará waptant.
“Off… chón wassh ent. goshay man wábé gendagá án, Bolór!” Ométáná Bolóray némagá cháráná gosht ke chammy nazz atant o tramp áiay espétén démá rechagá atant o padá chokorráná boná kapagá atant. Bolóray é missetagén zébáiá Ométánay delá goshay ásé mán dásht. Áiay delá hazár báhand chest but o Bolóry gept o kajjet. Bolóray dapá cha lezzat o wasshiá sarréchén oppáré dar atk. Ométáná wati tonnigén lonth Bolóray shakkalén lontháni sará ér kotant…
“Pád á, pád á, taw angat wáb ay, Ométán?”
“Man wáb naán, mani ján! Maná taw o é mastén mósomá bésár kotag,” áiay lonth soretant bale tawár dar nayatk.
“Pád á, bechár, ni róch dar áyagi ent. Angat taw wáb ay.”
Ométáná pa hayráni chamm pach kotant. Áiay mát barónkay sarinnán óshtátagat o áiá náwallagá at. Ométáná wati ambázáni tahay Bolór cháret… Bolóray badalá sarjáh áiá bagalá at o á nedáragay nám o neshán néstat. Áiá wati chamm nazz kotant ke hamá dhawldárén nedárag padá byayt.
“Ométán! Taw pád á. Inchok wapsag? Tará kayá gosht dóshi báskópá boraw? Ni wáb ay o wáb ay. Pád á, boraw chammán shód.”
Áiay mát kalógará potert o á, delá mátay sará norondhagá lagget ke zenday washterén wáby sarjam bayagá naesht. Gón bétahmboli pád atk, chammy shoshtant o cháhay waragá lagget. Shircháhay gotth geráná á, dóshigén pelemay hayálán shot ke wat o áiay shwángén sangat Jommoká cháretagat.
Áyáni métagay hóthalá dér at ke thiwi o pelem atkagat bale ched o pésar áiá hecch pelem nacháretagat. Albat Jommok o bázáray édege bachakkáni dapá tawsipy báz eshkotagat. Wahdé áiá bachakkáni gapp eshkotant, áiay delá wáhag pád atk ke pelemé bechárán o padá dóshi wat o Jommoká shawr kot o shotant.
Pelem áiá sakk wassh but. Nedárag, jang o chóp, nách o sawt… dráh pa Ométáná nók atant. Támoray sharrang o hazárdábén jenekkán yakké áiay pésarigén deshtár Bolóray rang at. Bolór darkasáni áiay námgept at bale Ométánay garibiay sawabá Bolóray jupajatén mát o pet bajjetant o áiay siresh gón Mashkati bachakkéá kot. Harwahdá ke Bolóray hamrangén jenekk pelemá záher but, Ométánay delay drikkag trond bitant. Dóshigén pelemay chárgay wahdá goshay á é donyáyá naat.
Dóshigén pelemay jenekk o wati wasshén wábay hayáláni tahá gár, áiá panch kóp shircháh goláthet. É dargatá áiay mátá say hoshkén lujjar eshkeráni sará patk o dóshigén chárén sertagén naganáni talá dát o shepánkuá kotant. Dhekké náy ham shepánkuá mán kot o kalligy cha ápá porr kot.
Ométáná cháh wárt, shepánku o kallig kópagá kotant, cháder baddhá kot, mokki o nal zortant o wati panchén dánag pas cha wádhá dar kotant. Padá wat o Jommoká bázáray chawakkén pas zortant o ramagá sar diáná dém pa ladá shotant.
Nágomán