“Elyás!”
“Hán náku!”
“Mani chokk! Maná démá jágah bit?” Náku Mazárá cha basay ostádá jost kot. Á basay démi darwázagay dapá óshtátagat o sitthán cháragá at ke mardomán geptagatant.
“Ennán, náku! Démá jágah nést. Sitth mardomán geptagant. Taw boraw poshtá benend.” Elyásá gón náku Mazárá gosht o padá kelindhary tawár kot.
“Piral! Oo Piral!”
Piralá cha basay poshtá tawár pad dát: “Hán ostád!”
“Náku Mazárá sharrén jágahéá nádén.”
“Sharr ent ostád! Byá náku byá!” Kelindhará chamódá kukkár kot.
Náku Mazár latthá jekk diáná kelindhar Piralay némagá rawagá lagget. Man ostáday poshti sitthá neshtagatán o áyáni gappán gósh dáragá atán. Maná kamáshay sará bazzag but. É pir o ájezén mard basay poshtá mercháni góni o pélkáni sará, inchok jamp o jólay tahá chón nesht kant. Eshiá abayd mercháni trondén buá maná béwár kotagat o dam pa saht cheshán atán. Man náku tawár jat.
“Oo náku Mazár! Byá démá, pa taw jágahé hast.”
“Haw, mani chokk? Jágah hast?” Náku gal but.
“Démá wa jágah nést, Nágomán! Taw nákuá chiá tawár kanagá ay?” Ostád Elyásá mani némagá chakk jat o gosht.
“Man nákuá wati jágahá nádénán,” man passaw dát.
“Godhá taw? Nayáay gón zánán?” ostádá pa hayráni gosht.
“Chattá rawán.” Man pónz kechént ke mercháni buá palpathagá at.
“Chattá raway? Parchá? Hamedá benend. Gappé janén.”
“Ennán man rawán, edá merchán…” Maná cheshagá wár nadát o ostád Elyásá kandáná gosht: “Chón kanén yár, may rózig ent.”
Man náku wati jágahá nádént o wat borzá sar kaptán o tájay tahá cháderé pach kot o tachk bitán. Garmági róch atant bale garm naat. Yakké wa daningah sohb at o domi jambarán sáchán kotagat o kawshé kasshagá at.
Basá kamm o gésh kaláké bitagat ke Torbatá rawgay chen o lánchá at bale daningah nagisshetagat.
Chónáyá cha Ball Negwará har róch yakk basé Torbatá shot o degeré chódán Ballá atk. Hamé doén basáni barkatá Ball Negwaray dokkándár, hóthali, bági, nádráh o édege mardománi kár sawár bitant. Cha Torbatá basán pa mardomán ráshen o dege sámán áort gón o cha Negwará pas, dár, merch o limbu pa baháyá Torbatá bort.
Anni kesás do haptag at ke domi bas haráb at o pa addh bayagá Karáchiá shotagat o ni ostád Elyásay yakkén bas ke yakk róché cha Ballá Torbatá shot o domi róchá chódán edá atk, sakk rassh at.
Harkasá ke Balóchestáná sapar kotag, á sharriá zánt ke edá pa rawwáyá chónén del o jagar lóthit. Ball Negwar cha édege handán angat ganter ent ke gádhi o ólák kamm ant, sapar kanók báz ant o dagg sakk haráb ant. Bas ke rawt eshiay tahá haminchok danz o hák chest bit goshay syahgwátéá mán shántag. Basay bádhi anchó dhakk dhakk, thók thók o theling theling kant goshay borré ostakár dém pa dém neshtag o dás o tapar thappagá ent. Hák o danz, jamp o jól o thóká thákay pajjiá basay thaypay gazháng gazháng góshán karr kant o harkas géshe wati ger o dárá nabit.
Basá kalákéá gésh at ke rawgay chen o lánchá at bale daningah pa rawagá jádhi naat. Basay chapp o chágerdá mardom mocch atant o basay monshiá yá dege raókéá kár o kolah gón kanagá atant.
“Adhay, oo Payz!”
Mani góshán náku Mazáray zahg Shahdáday tawár kapt. Monshi Payz zánán dazgatth at ke kukkáry kot: “Hán Shahdád! Kammé sabr kan, pédág án.”
Man jahlá cháret. Hamé wahdá Shahdádá maná dit.
“Adhay Nágomán! Taw Torbatá rawagá ay?” áiá kandáná jost kot.
“Haw, kár o kolahé hast bogosh.”
“Ennán, ján! Dege kár nést. Bass mani pet tai hamsapar ent. Torbatá náku Bahádorray lógá ér kayt, awal Hodá o randá tai mayár ent.”
“Bémayár ay, Shahdád! Nákuay hayáldáriá man bé goshagá kanán.”
“Mani chokk Shahdád! Bégam bi.” Náku Mazárá cha basay darigá sar kasshet. “Nágomán jáná anni wati sitth maná dátag o wat shotag borzá neshtag. Hodáy sabz kanát.” Náku yappaymá maná nékdwá kanán at.
“Hán dhay Shahdád! Tará che kár hast?” Monshi gisshetgat o dém pa Shahdádá pédág at.
“Pa man keréthé hayk byár gón.” Shahdádá lahté zarr monshiay némagá shahárt.
Monshiá zarr zortant o kashi kissagá kotant o kápiay tahá Shahdáday kár nebeshtah kot. Shahdád dém pa wati hóthalá shot. Man padá cháderay sará tachk bitán.
“Torbat… Torbat… Torbat… Byáet. Jaldi kanet ke bas chotthagi ent.” Piralá wati kelindhari gwánk jat.
“Payz! Oo Payz!” Mani góshán náku Abdelahay tawár kapt ke monshiá tawár kanagá at.
“Pédág án, náku!”
“Pa man do keréth amb o keréthé chamáthah byár gón. Bezir zarrán. Agan chamáthah nabit, batháthah byár gón.”
Man tájay tahá waptag o mardománi gappán gósh dáragá atán ke anágahá Barkat Ali Sajjádá sarokk kot.
“Adhay Badgomán! Taw edá neshtagay, bimán?” gón mani gendagá áiá kukkár kot. Á harwahdá maná Nágománay badalá Badgomán goshit o man ham áiay nám karótkag… Man áiá barkatén bezán barkat bitagén sháer goshán.
“Ohoho…” man pád atk o neshtán. “Adhay barkatén sháer! Taw é badhi pajará ham may sará nakapay?”
Sajjádá kandagé jat o mani kerrá cháderay sará nesht.
“Taw kojá rawagá ay?” áiá jost kot.
“Man Torbatá, o taw?”
“Man ham Torbatá.”
Man kandet.
“Chiá kanday?” Sajjádá gón hayráni maná cháret.
“Hamé bépáydagén jost o porsáni sará maná gappé yád atk.”
Sajjádá sártén ginné kasshet o gosht: “Kojám gapp?”
“Yakk randé baséá do karr kash mán kash neshtagat. Awali karrá cha domigá jost kot:
‘Taw Shálkóthá rawagá ay?’
Domigá passaw dát:
‘Ennán, man Shálkóthá rawagá án.’
Awaligá darráént:
‘Balay balay, man gosht zánán taw Shálkóthá rawagá ay!’”
Sajjádá ohu ohu kandet. Wahdé kandagy bass kot, godhá man jost kot: “Taw bárén nókén shayr mayr per nabastag?”
“Balay, per bastag. Chiá zánán?” Sajjádá cha kissagá hokkah kasshet o dapé moshók dapá kot.
“Shayré bejan,” man parmáesh kot.
“Taw wa shayrán sarpad nabay, moptá parchá zawálesh bekanán?”
“Tai shayr, shayr wa naant, goshay Pirbakshay gapp ant.”
“Bimán! Ohu ohu ohu…”
Ostád Elyásá do say bará háren jat o dér nagwast ke bas dém pa Torbatá rahádag but. Wahdé bas cha Ball Negwaray bázárá dar atk, ostádá raptár téz kot.
Jambarán sáchán kotagat o ni cha basay tachagá kawshá shikk shikké chér at. Sajjáday sháeri ragá jáh jat o bé goshagá dastunké dapgál kanagá lagget.
Bas kammé shotagat ke man dit ke dir pathakkén mardé óshtátag o basá cháder kanagá ent. Nazziká rasetén dán Thálwigay Shapokk at. Námy Shapi Mahmad at bale harkasá Shapokk kot. Garibén mardé at. Góshy dhámp atant, chammy kánth atant o sará sobakk at. Áiay kár o dandá esh at ke keréthé do keréth sabzi o nibagy lótháént o wati métagá baháy kotant o wati lápy dar gétk.
“Á Shapokk ent, bimán!” Sajjádá kukkár kot.
Shapokkay kerrá basá dásht. Shapokk basay démi némagá mán tarret o monshiay némagá rawagá lagget. Ostád Elyásá shaytáni kot, zórán háren jat. Shapokká chó hazetagén hoshterá trás kot o ostáday sará norondhagá lagget.
“Kalám bejant tará! Gósh taw may karr kotant, kambahtén dertarissh! Cha góshá má pésará ellellá én.”
Mardomán prisht kot kandag.
“Shapokk pa taw ché byárán gón?” monshi Payzá jost kot.
“Pa man keréthé amb byár gón.” Shapokká cha kissagá zarr kasshet o monshiá dátant. Monshiá áiay kolah wati kápiá nebeshtah kot.
“Ambá ché kanay, bimán?” Sajjádá cha tájá kukkár kot.
Shapokká nazánt ke tawár cha kojá atk. Áiá gosht zánán kelindhar Piral ent parchá ke Piralá modám Shapokk kalág zort o anni ham Shapokkay kerrá óshtátagat. Shapokká dém tarrént, panché Piralay sará jat o kánthén chammy dar áortant.
“Óhe tai sar bát, kambahtén dertarissh! Inchok nazánay ke ambá mardom ché kant?”
Jahlá kandag o kukkár but o Sajjád tájay tahá lápléthi waragá lagget. Bas padá rahádag but.
Drachkóhá basá dásht o Hán Mahmad Pasiá wati si dánag pas o mésh chattá laddhet o wat ham sar kapt o may kerrá atk o nesht. Dege hamráhé ham gón aty.
Wahdé bas óshtátagat, dalwatán dráhén bas pa dódag o bánrag sará zort bale wahdé bas rahádag but, dráh bé trekk o tawár bitant.
“Hán Mahmad, eshán kojá baragá ay?” man jost kot.
“Torbatá,” Hán Mahmadá passaw dát.
“Baháig ant?”
“Haw…. adhay, marchán é bas sakk rassh ent. Man shotán basay tahá sarokké kot. Lellek lagatt bit,” Hán Mahmadá darráént.
“Domi bas pa addh bayagá Karáchiá shotag, hamé wástá é rassh ent,” Sajjádá passaw dát.
“Kai? Ostád Emám Bakshay bas shotag?” Hán Mahmadá padá jost kot.
“Haw,” Sajjádá sar sorént.
“Bale marchán áiay ostád Emám Baksh naent, Morád Baksh ent,” man darráént.
“Morád Baksh kay ent?” Hán Mahmadá jost kot.
“Emám Bakshay brát ent. Doén náku Omaray chokk ant. Náku Omará ham wahdá Karáchiá gádhié gón bitag.” Man yakk o yakká sarpad kot.
“Haw, haw,” Hán Mahmadá sar sorént. Áiay hamráh bé trekk o tawár neshtagat o may gappán gósh dáragá at.
Sebdáná basá dásht o yakk o do mardom sawár but. Lahté pa péshápá ér atk. Wahdé bas óshtátagat do pas medhagá lagget.
“Doshambeh!” Hán Mahmadá wati hamráhá gosht, “boraw shummán gisshén. Edá medhagay jágah ent? Ni watá perrénant, bépir!”
Doshambehá pas gisshéntant o atk. Bas padá rahádag but bale dér nagwast ke dege do adhet.
“Abá, é shumm márá árámá nendagá naylant.” Hán Mahmadá gosht o é randi wat o hamráh doén shotant. Pasesh gisshéntant o padá hamódá chattay kalánthagay ásenesh dásht o neshtant ke pasáni delgóshdáriá bekanant.
“Pasáni kessahé byárán?” man gón Sajjádá gosht.
“Haw bárén.” Sajjád delgósh but.
“É gapp mani jenday sará gwastag.” Man wati kessah bongéj kot. “Yakk randé basay chatt cha boz o méshá marchigén wadhá laddhetagat o man ham anchó tájá neshtagatán…”
“Kojám bas at? Esh at?”
“Ennán, domig at. Á wahdi ostád Emám Bakshá gón at. Mani ádat ent ke maná saparay wahdá wáb gipt. Man ke kóchandhagá laggetán godhá cháder pach kot o hamedá tájay tahá tachk bitán o wáb kaptán.”
“Hawww!” Sajjádá moshókién tokké jat o “haw” drájkassh dát.
“Bale dér nagwast ke cha dháh o shórá mani chamm pach bitant. Man jah serretán, gendán dán bas óshtátag o mardom chattá dalwatáni chapp o chágerdá mocch ant. Yakkéá gosht: “Méshé o bozé medhetag…”
“Ché? Méshé o bozé?” Sajjád hayrán but.
“Haw. Man chamme wat dit ke méshé o bozé dém pa dém óshtátagant. Cha medhagá damesh bortag o hisk o hampán ant. Ostád Emám Bakshá zahrá zahr jost kot chiá medhetaget shomá?
“Cha dalwatán josty kot?” Sajjád padá hayrán but.
“Haw, man wat hayrán atán ke Emám Bakshá cha dábawán choshén jost parchá kot. É gongodám chón passaw diant. Bale domi sahtá man bah mantán. Pas chó mardomá gappá laggetant…”
“Ché? Bimán choshén dróg chiá banday?” Sajjádá nábáwari kandet.
“Adhay taw gappá sarjam bayagá bell. Man wat hamódá bitagán. Man dit ke dalwatáni gapp janagá kass hayrán naat. Goshay é gapp pa kassá nók naat. Ostád Emám Bakshay passawá boz o mésh doénán hórá dap pach kasshet godhá ostádá hakkal kotant o gosht: ‘Yakk baré yakké gapp bekant.’ Méshá gréwáná gosht: ‘Ostád Emám ján! Bááán… bááán, man óshtátagatán ke é bozá gosht taw chedá dir á, man wapsán. Bááán… bááán. Man gosht edá márá óshtagá jágah nést. Taw goshay man wapsán? Godhá bozá maná hakkal kot ke chetawr jágah nést. Jágah diay beday, nadiay anchén chappuigé janán ke chó pazhmá bál bekanay. Bááán… bááán.’ Bozá kukkár kot: ‘Dróg bandit wájah! Syáhén dróg bandit…’ Emám Bakshá boz hakkal kot: ‘Taw bass kan anni, randá wati gappán bejan.’ Mésh padá shoru but: ‘Man gosht zánán é jágah taig ent ke maná chó gorr o neherr diay?’ Bozá chamm dar áortant o gosht ke jágah zánán tai petayg ent? Wájah Emám ján! Bááán… bááán!, wahdé mani petay námy gept godhá man ham bér dát. Padá bozá maná gón dhakkarán mán bast…’ Méshá wati gapp hallént o gréwag o lempay sholuppagá lagget.”
“Adhay Badgomán! Taw sakk zabr ay drógay bandagá, bimán! Kadi dalwat gapp kanant? Agan hakk o del dalwatán gapp kotén godhá é hál kollén donyáyá sheng nabitagat? Man bárén ched o pésar é gapp naeshkotag.” Sajjádá kukkár kot.
“Adhay taw gappá gósh dár, é mani sargwast ent. Mani jend hamódá bitag.” Man zór murk mojéntant.
“Haw? Sharr ent… sharr ent, zabarry, bárén démá ché but?”
“Wahdé méshá wati gapp jatant godhá bozá wati kessah áort. Bozá gosht: ‘Wájah Emám Baksh! Maná do say róch bit wassh wassh naán. Anni wahdé man basá sawár bitán godhá cha basay jamp o jólán mani pád drahetant. Man méshárá gosht kammok kenz ke tachk bán. Nádráh án, óshtát nakanán. Godhá méshá chestá darráént: ‘Taw ham ganók ay. Edá wapsagi jágah koj ent?’ Man dast bastant bale é shummay delá rahm nashot. Godhá man gosht, jágah diay beday, nadiay man watá dawr dián… o man watárá sheleng kot o dawr dát o mésh maná janagá lagget. Bééén…bééén, mááán…mááán.’ Boz shoru but gréwagá. Ostád Emám Bakshá wári o azábié áyáni saláh o benáh kot o wasshán kotant.
Man cha pirén gorándhéá jost kot, ‘Taw ché goshay, kay mayárig ent?’ Gorándhá boz o méshay némagá gón zahrnáki cháret o darráént: “Mani hayálá é doén chapurt ant o doén mayárig ant, becháresh ni pashal ant. Adhay kadi saparay dargatá medhag o delranji bitag? Sapar anchén chizzé ke zahrénán wasshán kant bale é shumm medhetagant. Bon béagli ent.’ Padá gorándhá bechkandáná gón man gosht: ‘Chónáyá, wájah Nágomán…’”
“Ya, tai nám gorándhá chetawr zánt?”
“Man nazánán, man wat hayrán atán ke gorándhá mani nám chetawr zánt. Hayr, áiá gosht: ‘Mosáper wadh wadhén hast. Lahté harábén mosáper ant ke édegarán ham janjál kanant, chó ke é náshar ant.’ Áiá boz o méshay némagá dast shahár dát ke pirén gorándhay gappán pa delgósh gósh dáragá atant. Gorándh goshagá at: ‘Lahté sharrén mosáper ant ke áyáni hamráhiá del sér nakant o lahté anchén azábén, garibén mosáper ant ke kassi kárá kár nadárant o bétawári sapar kanant. Goshay gón naant.’
‘Haw,’ man gosht o gorándhay némagá cháret ke á wati gappán barjáh bedárit parchá ke maná gorándhay dorrén dánk wassh bitant. Gorándhá kukkár kot o gosht: ‘Ennán.’ Man hayrán bitán ke áiá parchá chó kukkár kot o ennán gosht ke hamé wahdá gorándhá trondén dhakkaré mani péshánigá jat… o man cha basá jahlád bitán.”
“Ya! tará koshty wa. Taw zánán ché kot?” Sajjád hayrán at.
“Man hecch nakot. Áiá wassará maná dhakkaré jat. Man chamm pach kotant. Basá Syáhaluá dáshtagat o berekkáni janagay sawabá mani péshánigá gón ásenéá dhikkar wártagat o mani wasshén wáb chamedá ásar but.” Man wati gapp halás kot o bechkandáná Sajjáday némagá cháret.
“Pokkooo!” Sajjádá drájén pokkoé kasshet. “Adhay Badgomán! Taw godhumbé ay. Inchok drógay bandag!”
“Drógé naat… wábé at!”
“Wáb wa dróg ant, bimán!”
“Baré baré wáb rást ham bant. Man dalwatáni medhagay wáb ditagat. Esh ent marchi medhetant,” man passaw dát. Sajjádá hecch nagosht o kandet.
Bas kammoké shotagat ke Sajjádá kukkár kot: “Á Syáhaluay hóthal ent.” Sajjádá gón hóthalay gendagá galé chet. Shodá zánán zór per dátagat.
Basá hóthalay dapá dásht. Mardom ér atkant o hóthalá shotant. Naganay warágá rand man pád atk o péshápéá shotán. Wahdé wátarr bitán dán gendán ke mardom basá sawár ant bale ják o jallal ent. Man basá potertán. Sajjád nazziká óshtátagat. Man jost kot: “Che gappé?”
Sajjádá passaw dát: “Do mardom sittháni sará medhetag.”
Man medhókén mardománi némagá cháret. Yakké Changéz at o yakké Delbód. Do sál at ke doén dhegáréay banday sará adhetagatant o har róch péshi páshiá Torbatá rahádag atant.
Changéz goshagá at: “É jágah manig ent. Tará zánán baragi ent, bogosh.”
Delbódá gón hayránén chammán Changéz cháret o kukkár kot: “Sitth manig ent, taw zóránsari kanay, dege gappé.”
Changézá dap pach kasshet: “Chetawr taig ent? Tai hósh ni pahká gár ent. É sitth man pésará geptag.”
Delbódá ham dap pésar kot: “Hósh mani na, tai gár ent. Sebdáná ke man sawár bitán, é jágahá kass naneshtagat. Man hamedá neshtán. Ni taw drekkay o káay ke jágah manig ent?”
“Adhay, bémennat!” Changézá kukkár kot. “Sebdáná ke basá dásht o taw sawár bitay, é wahdi man péshápéá ér atkán. Man anchó ke atkán bas rahádag but. Pameshká man darwázagay dapá óshtátán. Man tará dit ke taw mani sitthay sará neshtagay bale man hecch nagosht ke Syáhaluay hóthal nazzik ent. Kammoké óshtagá maná hecch nabit.”
“Haw, adhay! É jágahá pésará Changéz neshtagat,” dege yakkéá ham Changézay gapp gept gón.
Man démá kenzetán o gón Delbódá gosht: “Adhay Delbód! Parwá nést. Taw kammé bósht yá borzá byá mani kerrá. Belly Changéz nendit. Shomá mamedhet, brát bet. É choshén gappé naent.”
“Man parchá bóshtán?” Delbód bránz gept. “Parchá borawán chattá mésháni tahá benendán? Man chell kaldár bádhaw dátag.”
Man pad kenzetán.
“Taw agan chell kaldár dátag, man ham hoshká sawár nabitagán,” Changézá jabazzah kot.
“Taw wazzánay wati chellén kaldárán, é jágahá man nendán,” Delbódá adhi kotagat.
“Nenday benend… jágah tai bon ent,” Changézá gosht o sitthay sará nendagá lagget. Delbódá á télánk dát.
“Adhay sitth zánán tai petayg ent?” Changézá chamm dar áortant.
“Godhá zánán tai petayg ent?” Delbódá bér dát.
“Báz pet pet makan. Sellén zobáná lagám day.” Changéz cha zahrá péch o táb waragá at.
Delbód hezhm gept o Changézárá shahmáté gózhbonáy gwar dát.
“Taw… taw maná jat? Tai mátá man…” Changézá máti záhé dát.
Delbódá áiárá dege sóchákén shahmáté dapá jat. Changézá goshádiá lánká bastagén watás kasshet o Delbóday delbandá do tir pad mán pad dág dát.
“Bezir sitthá kinná kan… bégayrat!”
Cha Delbóday delbandá hónán pinzhár bast o Changézay dap o dém o poccháni sará retkant. Gón tiráni laggagá Delbódá peryáté jat o boná kapt. Gón watásay ás baragá basay mardomán ham kukkár o wáhi bená kot o pa dar áyagá yakké domigá télánk dayán bitant.
Changézay zahr angat ér nayatkagatant. Áiá pa saymi tiray janagá Delbóday némagá watás tachk kot bale hamé sahtá cha poshtá kelindhar Piralá Changézay dast gept o táb dát. Watásá ás bort. o é randi Changézá chihánthé jat. Tir áiay gotthá mán atkagat. Watás charáiay dastá kapt o á wat chó goddhetagén drachká Delbóday sará kapt.
Mardománi shór o shár géshter bitant. Haryakké pa dar áyagá domigá télánk dián at.
Bale Sajjád konth at o óshtátagat. Do mardom áiay démá bé mawtá mortagat o áyáni jón gón zagrén hónán kaptagatant. Sajjád anchó molur at, goshay end ná endá grét.
Godhsará dráhén mardom ér atkagatant bale Sajjád angat mekk at. Man á dastá gept o cha basá ér kot.
Nágomán