Man panch sálay drándhéhiá pad métagá wátarr kotagat. Á wahdá ke man métag yalah dát, á wahdá ham jang at. Á wahdá ham mardom chest kanag bayagá atant. Har róch jangal o patth o maydánán Balóch baccháni shirtetagén lásh dast kapagá atant. Harkas torsay ámách at. Harkas deltrakk at ke é dam na á dam nun mani bári ent. Zendagi sakk grán at. Shapá kassá wati gesá bápén nepádáni talá wapt nakot. Métagá anchó ke laythéá shahm kot, sajjahén mardén dém pa machkadag o kawr o janglán tatk o chér butant. Esháni tahá géshter warná atant. O man métag yalah dát o drándhéh bután.
Darmolká man ázátén chagerdéá neshtagatán. Na kaséá may lógán dawr kot o sajjahén kondh patthetant, na janglán lásh dast kapt. Kassi delá torsé néstat. Harkasi zend wassh o wasshál at. Bale may Balóchestáná ás hamá wadhá rók at, anga géshter jambur butagat.
Róché hálé atk. Baré cha wánagjáhéá nódarbaréay gár o bégwáh kanagay hál at o baré cha espétálá dáktaréay. Wánendah o nawánendah, pirén o warná, syási galéay básk yá gayrsyási mardom, har róch hálé atk: pawj pelán métagá mán retkag, cha pelán bázárá do warná barag butag, mazanén shahray ráhay kashá láshé dast kaptag. Métagáni métag pawjá mán dashtagant. Hayát jánay rangén sálónkén warná keshk o chárráháni sará koshag o dawr dayag bayágá ant. O darmolká mani zend asarmand bayagá naat. Pameshká man hejbar é andázah jat nakot ke é chónén gránén sáhat ant. Zendagi chón azáb bit, agan pawj lógá dawr bekant o kondh kondhá patthán bebit. Mardomán chest bekant o gár o bégwáh bekant.
Bégwáh kotagén mardoméay mát o pet kojám dard o dóráni démpán bant? É baláhén gránén dard ke bégwáhén mardománi lógay mardomesh saggant, maná é dardáni hecch andázah néstat. Lahté mazanjagarén pet wati bacchay gár bayag o padá láshay dast kapagá rand ham démá jonzán kant, bale mát wati chokkay wátarr bayagay ométá, cha bázén wadárá yá wa ganók bant yá é dardá sagget nakanant o merant.
Nun ke man wátarr kotagat o molká atán, nun zánagá atán ke é chónén gránén dardé? Man nun zánt ke kaséay bégwáh bayagá pad lógay mardom kojám hálá bant. Áyani chammáni wáb ham bégwáh bit o delay karár ham.
Man ke wátarr kotagat, nun man dist ke métagay chárén némagán lashkarián bonjol jódh kotag. Eskól, mardománi lóg, masit, hecch jágah pasht nakaptag. Har jágah pawjián chawki bastag o neshtagatant. Harkas torsá gár at. Hamé torsá hamok mardomá watárá cha wati brát, syád o azizán dur dashtagat.
Man ke wátarr kotagat, man dist ke métagay doén kabrestán master butagant, kabr géshter ant. Bárén chont sálónkén sar hamé kabrestáná nun pa émeni wáb at o angat bárén chont zeminzádagén sará kabr ham nasibá nabutag. Kabráni sará jatagén bayrak ham gár atant.
Bale man sakk gal atán ke man panch sálá pad molká atkagán. Mani pád cha galá zeminá ér nabutant. Gón mani áyagá goshay golzeminay pád ham galá chest atant o ázmáná ham watárá pa dábé mán póshetagat.
Yakk róché hawr but. Tramp ke golzeminay delbandá kaptant, mani chárén átrápán hákay washbu shenget. O man dist ke molkay hamé yakkén chizz matth nabutag, é washbu nun gwashy angat géshter meskátár at.
Cha hawrá pad man drekk bután o shotán ke shépáni ápán sayl kanán. Chárán, gwast chó granchéá botk. Hawrá pad sanjá jat. Shépá áp áort. Sarjamén bázár shépay ápáni cháragá dar atk. É hawr o sanj, é kawr o nókáp, é mardománi mocchi, gapp o kandagáni tawár ke wasshén zémaréay wadhá tálán at, mani delá táhir dayagá atant. Hawray domi róchá kasé dém pa kóhá pekneká shot o kasé komb o garáni ápá jánay shódagá… hamok damán sakk wassh at.
Molká jang wa hamá paymá barjáh at, bale hawrá ke gwart, métagay mardom cha torsá kammé perámósh butant. Hawrá métag brahdárter kotagat. Hamé ger o chillán goláésh atán o hecch samá nabut ke kadi wáb kaptán.
Baláhén tawáré but o man jáh serretán. Purah baláhén grandéay tawár at. Gendán mátá tálé gón o lógay rétkagén ápán sholonchagá ent. Mátá gwasht: “Bwaps. É tawár nun zendagiay bahr ant.”
Shap tahár at. Bambáni tawár gésh bayan at o dur durá kochekkáni chángagay tawár ham pédák at.
Sadganj Balóch