Samin gózh dár!
Mani é arz o peryátán
Ke hardén taw gwazay
Cha góragén kolláni érgwátán
Hamódá ke hazárnázén baháray poll
Gón pollén hamsarán neshtag
Hamódá ke golén gránáz o gránmol
Gón wati átárshanzén mahparán neshtag
Bogosh wassh wasshoká gósháy
Ke “Tai é bazzagén áshek
Badén rócháni ámách ent”
Samin gózh dár!
Mani járá
Ke taw hardén gwazay
Cha mir o sardáráni bázárá
Hamódá ke maróchigén jahánay bádsháh
Gón Chákarán neshtag
Hamódá ke wati bárigay wassáchén kamásh
Gón mehterán neshtag
Gón trondén hakkal o gorrán bogosh
“Wájah nun zolmay róch kammén ant”
Mobárek Kázi