Bráhnagén oppáragáni zahirnálén tawár góshán kapit
Bébramshiay danz o moján!
Yakk náragé, yakk máragé
Báhand parmáit
Mani mehray nasahdhókén delá
Man talwasán
Chó zendagén máhig
Ke bé ápá zarit o palpathit
Holláni bánóri
Golábay sohrchakén pollé srapit
Zenday matáh
Lahdháni nilbómén zerá ógár bit
Man bésamá, béjhk, bé bramsh o tawár
Chó chellagay bémehrén
Mehray mósomá
Wasshi koj ent?
Tai ambarén bikáni sáhélá
Ke tákáni shamá
Sój beday
Pa má nazántkárán
Tawámén zendmánay
Wasshiáni zánagay mestág bit
Mobárek Kázi
Dasambar-1984, Shál