Peknek

Sáchánén sabáhé at. Wasshén kawshé kasshagá at. Man lógá neshtag o hayál kanagá atán ke mósom wassh ent, marchi rawán dém pa sayl o sawádéá. Hamé wahdá gwandhué tacháná atk o maná hály dát ke tará Lál Bakshay dokkáná lóthagá ant. Man delá gosht peknekay bu ent.

Kammokéá rand wahdé man Lál Baksh Ázátay darmánjáhá sar bitán dán haw, thóli sádhi at. May peknekay thóliay hapt mokimi básk atant. Lál Baksh Ázát, Golám, Supi Nezar, Máshthar Sakidád, Mahmad Jagar, Máshthar Háled o Mollá Morád. Baré baré ke man cha shahrá lógá atkán, godhá man ham gón atán.

“Byá adhay! Taw cha lógá dar nayáay. Goshay haykáni sará ay.” Gón mani gendagá Máshthar Háledá dap pallagósht. Mani passawá pésh Máshthar Sakidádá gosht, “Haykáni sará naent, nekénkay sará ent!”

Drostán kukkár dát. Wahdé kandag o krishtagán tam kot, godhá Mollá Morádá jambaráni némagá eshárah kot o patwá dát, “Pekneki mósomé!”

Dér nagwast má parpathán doposhtag but o borzád bitén. Marchi peknek Mollá Morádá dátagat o áiay parmáeshá nókén jáhéá shotén. Peknekay é nókén jágah machkedagé at ke kawréay kanekká at. Domi némagá práhén getáné at. Kawr, machkedag o getánay góricháni némagá kóh at. Jágahay zéd wassh at.

Jambar sará atant, pameshká gón peknekay jágahá sar bayagá harkas káréá gédh but. Lál Bakshá shircháhé per kot. Sakidádá taparé baddhá kot o dáray chenagá kawrá ér kapt. Supi Nezar wati thuthuá sar o poth but ke rawán morgay shekárá. Mahmad Jagar poránigay ártay tarr kanagá lagget. Máshthar Háled pa poránigay pachagá pogonzay shóházá gédh pa gédh but. Golám ke may kanwari at, góshtán poll pollá borragá lagget. Mollá Morádá mósomay “chárag” kot o cha lánká bótalé kasshet.

Mani wandhá salád tronsagay kár kapt bale angat pa saládá wahd hast at. Man sawás pádá kotant ke rawán kash o gwará saylé kanán o nókén jágahá chárán.
Máshthar Háledá maná rawagá dist. Kukkáry kot, “Ódá ke kár ent, márá che kár ent.”

Dozzay del jant pameshká cha man pésar Mollá Morádá chakk jat o gosht, “Bachakk, balkén taw mani góshán janagá ay?”

Háled nagég but. Goshty, “Ennán Mollá! Tará nagoshán, bondhoká goshán.”

“Bondhoká harchi goshay bogosh bale “bondhay” námá nageray.”

Supiá porráporrén Mollá Moráday némagá cháret. Drostán prisht kot kandag. Mollá ke awali paygá yatteng kanagá at, sharábán trojjet. Kandagá wár nadát o sharáby cha pónzá dar atkant.

Hamé kandag o kukkárán cháh jádhi but. Lál Bakshá pálát o márá dayán kot. Man kópé cháh wárt o kawrá borzád bitán.

É kawr cha gazz, pissh o pensén koner o jawrá porr at. Man dán dérán kawrá tarretán. Koner chet, killadh gwatk o wárt. Dán kammokéá kawray é chóth o pará chóthá tarragá rand kóhéay thollá sar kapt o neshtán. Mósom sakk wassh at. Kawshé botkagat ke dely mán ropt. Chedá Gwahrag dán Kánig téwagén Negwar dará at. Dán sharrén damáné man hamedá nesht o nedárag cháret. Padá ér atkán o dém pa bonjolá rahádag bitán.

Warag tayár at. Man kárch dastá kot ke saládán tronsán. Golámá gosht, “Á déri Molláyá addh kotant.”

Man gosht, “Taw Mollá maparmátén.”

Goshty, “Man naparmát. Do paygá rand wat goshty -hoshkén nendagá náhay gaddhag kanag – o shoru but saládáni tronsagá.”

Warag jádhi atant bale Supi Nezar angat gár at. Kammokéá rand Supi sholámag sholámagá atk. Shekáry dast nakaptagat. Mollá neshah at. Démy gón Supiá kot. “Supi! É báli kapót ant, lógi kapót naant ke har wahdá del lóthit, shekár kanay.”

Drostán kukkár dát o kandet, chiá ke Supiay lógiay nám Kapót at. Yakké shekáray dast nakapag, domi kalág o kandag. Supi koppet o nesht.

Kammokéá rand Golámá jár jat byáet waragá bwaret. Má drost neshtén. Warag sakk wassh atant. Mollá gotth o goláthá at. Goshty, “Golám! Taw janéné biténay man tará geptagat. Choshén wasshén waragay grádag!”

Supiá bér geragay móh rast. Darráénty, “Anchó begery Mollá! Pa taw rawá ent.” Drostán kandet.

Golámá gosht, “Supi! Dege paré man waragán sóchák kanán.”

Supiá sócháki konnat at. Wahdé wárty, sajjahén róchá hekkety.

Waragá rand pattái shoru but. Mollá zabr at, márá borty. Wahdé má pattáiá dam bort godhá Mahmad Jagará, Barkat Ball wáláay gégán geptant o márá kandént. Wahdé Barkatay gapp halletant, náeb o názománi baddhá kapt. É róchi Mahmadá Máshthar Háled wár nadát ke náku Mussá o Mir Mahmad Aliay kessahán byárit.

Jambar baz tarrán at. Rózardá hawrá ér dát. Má goshád goshádá sámán chetant o dém pa lógán rahádag bitén. Dánke métagá rasetén, hawrá márá alkápá missént.

…………..

Kamáshá ródaptar band kot, korshiá tekah dát o chamm nazz kotant. Har wahdá ke jambar mán shánant o mósom sáchán bit, á darándhéhén kamásh wati warnáiay ródaptará pach kant o anchén róchéay sargwastá wánit ke hawr o jambari bitag o á gón wati métagay sangatán peknekéá shotag.

Nágomán