Damáné jall!
Damáné jall mani chammáni rozhnái
Mani tahnáiáni omray mósom sáhaté dam kan
Tai getrángén anárkán ázsgwárén kammokén chárán
Mani háménén zerday sraptagén yátáni hajgén poll
Mabátán kahrabárang tai kolónthén nawjawániá
Delon armán kant chó gozhnagén barwár pa tai pógasén rakkán
Pa armáné tai áski didagán chárán
Hazár tupán delá kárán
Bon ent arwáh gón arsán
Jagar rók ent gón páhárán
Man anchén zernegáhén dróshomé chammán kotag andém
Tahári dur oshtit kondhéá lonjén, nedárah kant
Mani chammáni béwábi maná pa bash bashé chárit
O borzá dur mán ázmáná jédhit máh gón estárán
Bagal nambén bant róchay
Seláhán dawr dant daryá
É tahnái ke omray mósomá dátag
Gón hecch néstá nabit ásar
É dáem hast o barjáh ent
Damáné jall mani zaymén delay barbádiay mahram
Delon band ent ke tai hennirajén mórdánagán chokkán
Homáráni abadmánén zerá bokkán
Bayán chágerd tai gomráhén báláday
Tai warnáiay ásá sochán chó kréch o agréchá
Tai thahláni maná dróhi
Tai chammáni sawgend ent
Maná bé taw dege kass nést
Mobárek Kázi