Man thahl án ke gón kégadá sohl o trán ent
Maná ché, zamánag agán delgrán ent
Nun tálán bant porométén delay gam
Ke á sengdel pa maná mehrabán ent
Makan gappán á kwahnén delranjiáni
Maróchán habar kawlig o ji o ján ent
Man nadr án tai yakk baré gendagá gón
Ométáni donyá padá nawjawán ent
Bogwárén wasshi mani gamjatén koll
Ke gol enshapi mayg o tai méhmán* ent
Ay chammán shomá ham kanet gapp o tráné
Gal o wazhdeliá delon nátawán ent
Man nadr án pa ái, á kawlig pa man
Na man delgrán án, na á delgrán ent
Kotant didagy band o gwashty ke Sabzal
Paché maym chó pardagá darmyán ent
Nazánán ke che bogoshán sarpad bebay taw
Do tramp ars parchá mani didagán ent
May wazhdeliá bogosh chón saggit
Mani dozhmenay del padá angarán ent
Bogosh é habar tai dapá shahd o shir bát
Sayad byá ke gón Hánolá sohl o trán ent
Sayad Háshomi
(Hasan Welayj, Karáchi
Sabáhay adár 7,
Doshambeh, 5 Márch 1951)
méhmán* = mehmán