Har chárén lawhán gédiay
Harch bayramén tákay sará
Rájdaptará pédáwar ent
Yakk dróshomé bédarwarén
Gónápé tangah o nograhén
Yakk námé Agbar Bogthi ent
Gón sháeriay wandawán
Yakk zarnaweshtén kessahé
Mán ent jammárá delán
Dahray dagg o harch nawbatá
Karnáni pahnátá sherit
Mardé Balóché hezmé at
Pa nókén Parangán Hammal at
Mán Chágerday tahlén jáwará
É hastén dawray Chákar at
Rájay sar o sardáré at
Shére Balóchestán at á
Rakkénagá dhéhay wati
Bálesht o kóthy yal kotant
Gár o hashimáni tahá
Gatthén talángáni shamá
But kohmazáré kohdár
Galmásht kotanty daynkár
Báj médhay borty sarjamá
Sar gwast wati haysi sará
Chó Kambará butag shahid
Námy namirán kot wati
Pa randpaday bél o yalán
Tegréchy dar gept menzelay
Bandigiay lonjén shapá
Bálénty arwáhay cherág
Ájuiay dáty neshón
Óo! Golzeminay sarmachár
Ach nókparangén zálemá
Gón zórákiay zórá wati
Érjig tai sar kot nakot
Bágén Balóchestán wati
Pa makkahén mátá wati
Taw hakk wati shirmádaray
Sar nadr kot o dát o shotay
Naksh ent Balócháni delán
Kollén dayár o halkawán
Harch kallag o harch bandená
Nám tai chó shadr o arjalá
Sardár, perámósh taw nabay
Tai zend Balóchi zendé at
Margá tará srahmént nakot
Áshóbay jár ent hargwará
Taw margá pad ham zendag ay
Modám mojjati ay harch delá
Dán áju Balóchestán bebit
Dán menzelá má sar bebén
Rahshón ent tai arwáh may
Hecch pasht nakapt nám o neshán
Kwahnén Parangáni edá
(Bale) Gókpróshá angat zendag ent
Mirén Balóch Hán gón yalán
Nókén Parang ham gár bant
Á, bárig chammán andar ent
Man gendán bándátay tahá
Kóhluay kóháni shamá
Pa gédarén bél o yalán
Mánesh Agbaray bit zyáraté
Mánit Majid dán mahshará
Abdol Majid Gwáderi