Porzemérén dardé nabutag tálehá
Pirén chenáléay boná
Armán chó tákán retkagant
Dam bortag nálókén nalán
Kassé edá proshtadel ent
Damkáni báládá
Namálit mehlabén dwáyán wati
Man gón wati hórkén delá
Delgósh atán
Del chó kapóté béwas at
Na shahmé rostag holkahá
Nayke chedhekkáé balet mán didagán
Ke nágahán…
Dóshi koduán náletag
Átrápay zémer máletag
Dóshi koduán náletag
Addirahán kessah kotag
Zend yakk hanóshén mehlabé
Sohbay hamok chánthay sará
Parréchit zolpá gwaptagén
Wahm o gomanán bahr kant
Shámay teláhén métagá
Kaypáni jué kant rawán
Chó máhekán…
Dóshi koduán náletag
Addirahán kessah kotag
Nawbat gón chawlán chikui
Chóke malangá sarbatag
Menzel janán mastén maláráni sará
Wáb ent o ágáh ent baré
Róchá gón rang o jalwahán
Kant dastay mondriká wati
Dorsén gonáhán tollosén
Mán págay péchán mán jant
Dóshi koduán náletag
Addirahán kessah kotag
Bim chó ramézáni srapé
Béwánkiá shép geptagant
Mán wahday bógáni shamán
Wahmáni dazródén keshár
Chó jangaléá sabzetag
Sohbáni mesk o mehlabén
Pézhgáh gwátá roptagant
Shámay teláhén métagá
Kaypáni juá tam kotag
Danzé ke tálán ent sará
Dardé ke péchán ent watá
Gón zend esmén holkahay
Damkáni dráj o márpéchén lankokán
Na shahmé rostag holkahá
Nayke chedhekkáé balet mán didagán
Dóshi oduán náletag
Addirahán kessah kotag
Monir Mómen
(Yakk Bechilé Ázmán)