Man Názorkén hayáléay wáhond atán, bale chágerdá maná anchosh kot ke man wati názorkén hayál zort o zeminá kall kot, o harróch hamé jágahá man ars rétk.
Mani názorkén hayál rost o nehálé but. É nehál man gón arsán ródént. Nehál rodán but o sawlén drachké but. Drachkay sáheg sakk wassh o sárt at. É drachkay chéray nendagá goshay mani arwáhá táhir raset. Mani kandag o gréwag, gapp o diwán gón hamé drachká atant. Maná anchó gomán but ke drachk maná sarpad bayagá ent o mani gappán pahmagá ent. Man wati harch hayálé drachkay sháháni sará nebisán kot. Harróch yakk dardé man nebeshtah kot. Drachká pa galé mani dard watig kotant o rodán but. Drachk gón man sakk mehrwán at, pameshká man drachkay nám kotagat “Mehrwán”.
Drachk sakk baz at o práh o sháhegán at. Har sabáh shántol o kapót drachkay sará gón wasshén tawárá kuku kanagá atant. Drachk wadh wadhén morgáni hankén at. Drachkay tah o tók cha morgi koduá porr at. É morg maná chó sáhá dóst atant. Bénamageskán é drachkay sará bénag bastagat. Drachk purah bázáré at. Maná é drachk anchó dóst at ke man wati tarr o táb, dhannay dar áyag drost yal kotagatant. Zemestáná é drachk mani górichay panáh at o garmágá lewáray. Drachká ham anchó gón man ádat kotagat ke bé maná, pa mani chammán, goshay molur at. Man pameshká drachk tahná nakot.
Wahd hamé wadhá gwazán at. Zendagi goshay tachán at o drachk róch pa róch borz rawán at.
Moddaté gwast. Drachk sakk borz shot, anchó borz ke drachkay sáheg jahlá nayatk. Drachkay ták cha man dir bitant. Gón drachkay borz rawagá drachkay sáheg shot o maná róchá gept. Man drachkay sháh o lambán narasetán. Mani nebeshtagén hayál cha maná sakk dir shotant o man dobar padá drachkay sháháni sará hecch nebeshtah kot nakot. Mani zemestán sakk sárt bitant o garmágay lewárán maná sótk. Kapót o shántoláni kuku man cha dirá ham naeshkotant.
Padá man wati tránag borzén drachkay boná kall kotant.
Hánol Nókáp