Á shapi mani sará goshay ázmán kaptagat o delá ás rók at. Maná wati marday sará sakk konnat bayagá at. Man grét o watá dhóbáret. Lógay haryakk chizzé maná chó zimmá dajagá at. Gwaray pashk maná konthag janagá at ke áiá dast jatagat. Del goshagá at ke lógá gón wati hamráhiá mán dár bale hamé damáná mani lápay panchmái chokká mani láp lagat jat o mani hayál thagaléntant. Man doén dast zortant, wati láp shahmát pa shahmát kot ke áiay tókay chokk ham hamáiay bar at. Man áiay zahrá wati o wati lápay chokkay sará kasshagá etán.
Del tosagá at. Chamm ars etant. Man nepádáni sará tachk bitán, dém gón diwálá kot o jédhagá laggetán ke choshén mard wa éoká mani naent. Chágerd cha choshéná porr ent. É zál che paym gón áhán zend gwázénant, che paym chokk kárant, chón áhán saggant? Sajjáhén zendá wa cha é rástiá nááshná nabant! Man bomorténán géhter at cha é marday geragá. Sajjáhén zendá kalmánth biténán sharter at.
Darwázagá tawár kot. Áiá wár wárá darwázag pach kot o atk o mani poshtá wapt. Man palangay kerroká etán o géshter jágah pa áiá yalah at.
Mani zahr pa áiá waddán at. Á chó badén buéá lógay tóká sheng at o mani sáhy béwár kotagat. Mani delá gosht pád á, áiay gotthá beger o kans kan, haminchok shahmáty bejan ke démy chárag mabit.
Shap goshay drájter at. Nazánán che wahd at. Maná hecch sabr bayagá naat ke kadi sohb bit o man cha é badén buá gestá bán! Mani sar cha dardá trakkagi at.
Haminchoká á anchó wáb kapt o trond trondá garrádhagá lagget. Áiay garrádhag mani kénagá pa áiá gésh kanán etant. Man cha tahtay sará pád atkán, shotán boná tachk bitán. Mani delá é lógá ásé rók at ke maná sóchag o por kanagá at.
Anagáhá man wati góshay sohray nálokáni tránagá kaptán. Pád atk o neshtán o nálokán kasshágá laggetán. Mani del anchó gréwagá at ke ars yakshalá rechán etant. Nálok man kasshetant o sardast kotant yakkerréá. Yakk baré delá gosht nálokán zir, sengay sará chóp bale maná oshteri kénagé mán at. Pa nálokáni chópagá chón halás bitagat?
Nonnokay lagat gésh bayán etant. Á saht o damán mani lápá lagat janagá at. Begenday goshagá at ke maná dast jan, samár, sard bi, man béwár án. Bale mani delá nonnokay lagat éoká mani zahrá pa áiay petá gésh kanán etant. Mani máti mehr nazánán kojá shotagat. Cha mardá rasetagén dard cha é mehrá zóráwarter at.
Man gón doén dastán wati sará prenchagá etán. Chamm sochagá etant. Wáb gár at. Anchó anchó dán molláyá pajaray báng dát. Man pád atkán, wati cháder cha almáriá kasshet o sará kot. Maná anchó samá but ke cháder ham áiay jónén buá kanagá ent. É cháder man hamáiay zarráni sará zortagat. Man cháder padá almáriá chagal dát o hamá cháder ke mani gohárá maná sirá sawgát kotagat, shóház kot o sará kot.
Agan mani dastá bitén, man wati jánay póst ham lagóshtag o chagal dátagat ke gón áiay jáná yajjáh bitagat.
Mani pandólá har zarré ke mán at, man kasshet o lógay delá kurrátant o cha lógá dar atkán o shepádá dém pa wati bonokki métagá ráh geptán. Mani champal ham hamáiá chizzé róch pésar zortagetant. Delá nagosht ke pádá bekanesh.
Métag dir at bale mani tahá anchén háthigé atkagat ke man dam nabort o róchá gwar bastagat ke man métagá sar bitán.
Mani é jáwará drost paréshán kotant. Maná áp o támesh kot bale mani delá hecch nakasshet, bass do gotth áp wárt.
Man pa zóré wati chammáni ars dáshtagetant. Man ke gég o gwar bitán, lógay drostén mardom mani kerrá neshtant, mani mát, pet, gohár, brát o neshár. Kass hecch goshagá naat bale drostáni chamm cha jostá porr etant.
Mani mátá gón larzókén tawáré jost kot ke ché bitag? Tai mard koj ent? Man watá dásht nakot o dape porrá gosht ke sótkag man é mard.
Mátá yabbará mani dapá shahmáté jat. Mani zenday awali rand at ke mátá maná shahmáté jatagat. Man gréwáná téwagén hál dátant.
Drost gong bitant. Kassá hecch nagosht. Mátá pa pashómáni maná gept o goláésh kot. Man gréwagá etán. Áiá maná tassalá dát o sahdhént. Brátá gosht taw hecch paréshán mabi, má chareshiá tai sawnán gerén.
Mani delay bár kammé sobakter but bale mani del angat bon at. Áiay hasti maná hecch paymá bardásht bayagá naat. Wati halkay bégwáhén o shahid bitagén warná o áháni mátáni aks mani chammáni démá óshtátag etant. Man hecch wadhá táhir geragá naetán. Mani delá gosht pád á, boraw masitay lódhay dapá jár bejan o bogosh ke mani badbuén mard chárigé.
Sábedah Barkat