May bázárá siré bayagá at. Bachakk o jenekk doén may wati bázárayg etant. Bachakk man distagat. Á may bázáray shepánk at o bázáray chawakky gón etant. Kesás bist o panch, bist o shash sálay warnáé at. Kóh o shépán abayd, áiá dege hecch nadistagat pameshká cha donyáay magr o honerán bésamá sakkén tachk o sádagén bachakké at. Jenekk man nadistagat albat áiay sharrangi o dáb o kehébáni habar modám métagay wadag o áshekén bachakkáni dapá at. Cha áiay har wahday singár o sáp o palgáriay sawabá métagay bachakkán áiay nám “ádénk” bastagat.
Siray goddhi nedárag at. Do mardomá sálónk dastá geptagat o pa lógá gwázénagá pédág etant. Lógay dapá bázén janén o mardéné mocch at. Hamé mocchiay tahá man ham gón etán. Sálónk o bánóray saráni dhikk dayagá pad, wahdé sargwapá bánóray dém dará kot ta goshay chárdahi máhé cha jambarán dará but. Bánór békesás sharrang at, sharrangiay gománá ham démáter…
Áiay kashá neshtagén sálónk hecch hesábá áiay darwar naat. Anchó gomán but goshay bondhéay kashá pollé rostag.
“É jenekk agan máhé gón é bachakká bogwázénit, ganjé.’’Mani dapá dar atk.
O anchó but. Sirá anga haptagé nagwastagat ke áyáni myáná adh o kodh bená but. O dómi máhay tahá jenekká bachakk pahk jawáb kot o pa zór wati sawn geptant.
Jenekk o bachakkay sawn o mohr bayagá anga haptagé nagwastagat ke yakk róché hamá jenekkay mát mani gwará atk. O chó halwatay dróshomá cha man josty kot. “Taw chetawr zántag é jenekk o bachakk nathahant?’’
“Man chetawar zántag?” Áiay charé jostá man ajab hayrán bitán.
“Haw, hamá lógá baragay shapá taw é gapp jatag ke é jenekk dán máhé gón é bachakká bogwázénit, ganjé. Maná yakkéá hál dátag.’’ Áiá mani chammáni tahá cháráná pa deljamén dhawlé gosht. O man ham wati hamé kotagén gappay tránagá kaptán.
“Man doénáni hesáb kasshetag.” Kammé pegr janagá rand man gosht parcháke man chó gosht nakot ke zánán taw wat nazántag, tai hazárnázén jenekk é shéptálén kóhi shepánká nazirit.
É gappá say, chár róch gwast. Yakk bégáhé man wati káparay chérá neshtagetán ke anágahá yakk pathakk o sápgiwárén janéné mani gwará atk. “Man nádráh án, maná táidé beday.” Gón rasagá áiá gosht.
“Tará táidé bedayán? Man táiday wadh o kár nazánán. É kárá molláéay gwará boraw. Bale taw máshallá chó pazzórén gorándhá ay. Tai nádráhi ché ent?’’ Man á jahl o borz cháragá rand pa hayráni gosht.
“Mani é jánay góshtá machár. Man nádráh án.” Áiá yakk nezaré wati bálád o padá maná pa némchammi cháret o gosht.
“Bale bogosh tai nádráhi ché ent? Taw nádráhay wadhá naay.” Mani chamm áiay dastay poshtay treppéá sakk etant.
“Mani dast o pád tosant, bale géshter mani del ent. Drahagá abayd, goshay yakkéá mocchá kotag o dáshtag. Man shakk án mani mardá maná chizzé kotag.” Goddhi gapp áiá pa halwat gosht. “Taw marday sará parchá shakk ay?’’ Man ham pa halwat jost kot.
“Tará á gappá kár nést. Taw bass maná anchén táidé beday ke mani nádráhi borawt. O mani mard mani gappá begipt.’’ Awali gapp áiá gón táb dátagén lónsé dar kot.
“ Man pa del goshagá án, man táiday kár nazánán. É mollái kár o báré. Taw chó bekan mollá Solaymánay gwará boraw. Man eshkotag á pa choshén kárá yakk o thekk ent.’’ Man á wati sará télénagay johd kot.
“Taw sakk zánay. Gón man watá chér maday. Taw peláni o pelániay hesáb kasshetag o anchó goshatag, anchó bitag. Man drostán sahi án.” Áiá hamá jenekk o bachakkay nám gept ke man goshatagat é nathahant, o padá pa dábé wati murky mojént.
O man ni zánt é bánóray mátay kerdár ant. Hamáiá é hál dátag o padá man harchond gosht ke man choshén kár nazánán bale hecch wadhá áiá báwar nakot.
“ Sharr ent, taw anni boraw. Man enshapi pa taw táidé nebeshtah kanán.” Godhsará man láchár bitán o pa táidéay nebeshtahá zobán dát.
“Man bándá mahlahén sohbá káyán. Mani táidá tayár kan.” Áiá pa deljami gosht o pád atk.
Man zánt ke é bándá allamá kayt pameshká áiay rawagá rand, man hamé damáná espétén kágadé zort o hamé kágaday sará hamáiay jenday nám nebeshtah kot. Padá táiday wadhá pétk o wati kissagá kot o bégam bitán.
Édege sohbá wahdé á atk, man cha áiay jostá sári hamé kágad áiay dastá dát o gosht.
“Eshiá yakk sabzén godéay tahá dóch o padá wati rástén dastay báská band bale ján shódagay sahtá bójy parcháke agan ápy lagget godhá kár nakant.’’
“Agan tai táidá kár kot godhá man ham tará béhecch nakanán.” Áiá táid dastá kot o pa názé maná némchammi cháret o pád atk.
Haptagé rand, anágah man cha dirá dist á tachká pa man pédág ent. Yakk baré mani delá gosht pádá betach. Bale padá man hayál kot ke mani mayár naent, man wa nakk jat ke man táiday kár nazánán. Áiá maná pa zór parmát. Man hamé hayálá etán ke á atk o mani démá óshtát. Man dap porr o hálig kot ke goshán mani mayár naent, bale mani goshagá sári áiá darráént.
“Mani nádráhi anchó shotag ke goshay maná hejbar nádráhi per nabitag.”
“Hán??” Maná áiay gapp báwar nabut o cha hayrániá mani dap pach but.
“Man nazántag taw choshén molláé ay. Bezán wájahá watá chér dátag.” Áiá mani chammáni tahá cháret o bechkandet.
Édege róchá yakk ballokéá wati chár o panch sáli nomásagé gón at o mani gwará atk.
“Mani chokk! Mani nomásagá bandé beday. Eshiay résh wasshi nazánant. Dráhén jáná beger dán dast o pádán modám résh dar kayt. Má dawá o darmáná dam bortag. É résh wasshi nazánant. Yakké wash bit, áiay kashá dege yakké dar kayt.”
Balloká wati nomásagay pashk léthént o maná áiay jánay résh pésh dáshtant. Man dist áiay nomásagay ján anchó chell ent ke chellán kochal o tal dátag. É résháni sawabay zánag pa man hecch grán naat pameshká ballokay nomásagay résháni cháragá pad, man hecch ingor o ángor nakot, o bé trekk o tawár yakk espétén bandikké zort o gappadhé gokk bast o padá shot cha wati ordán yakk dhethólay sábuné áort.
“É bandá wati nomásagay gwará band. O é sábuná gón sohb o bégáh áiay jáná shód. É sábun man dam jatag.” Man band o sábon ballokay dastá dátant.
“Hodá tará sabz kanát.” Balloká mani dast chokketant o pád atk.
Do haptagá rand, yakk róché padá balloká wati nomásag gón at o atk.
“Mani nomásagay résh ni wassh ant. O dege résh ham ni dar nayáyagá ent, bale sábun kotthetag.” Balloká wati nomásagay pashk léthént o maná pésh dásht. Man dist ni áiay nomásagá dánagé résh ham per nést.
“Bale ján shódagáy band makan. Agan tará sohb o bégáh wár nabit, parwáh nést. Bale róchay tahá yakk randé allamá jánáy shód. O sábun tori har wadhéné bebit.” Résháni cháragá pad man ballok sój dát.
Ballokay rawagá anga ném sáhat nagwastagat ke anágah yakk némomrén janénéá salám dát. Mani chamm áiay démá sakk bitant. Á mani démá óshtátagat o óshtági jáhá darráénty.
“Máshallá, Omaré résh pahk wassh bitant.” Omar hamá ballokay nomásagay nám at. Padá á mani nazzikká nesht o gón halwat dróshomén dhawlé goshty. “O Dorrén Malek ham cha wati nádráhiá wash but.”
Man áiá rók rók cháragá etán. Man hayálá etán ke é parchá é gappán janagá ent, ke anágah áiá gosht.
“Maná gohárzatké hast. Ni salámati mazan o tawám ent. Záná bahty wáb ent ke daniga kassá wati habar paráiá nayáortag. O ni bázáray mardomán kalmánthay nám bastag. Taw é bébahtá anchén thekk o thakké bekan ke zit yakké paráiá wati habará byárit. Hodáay gwará bésawáb nabay.” Áiá wati gapp kotthént o padá anchén delmánagén wadhé maná cháragá lagget, goshay zánán man hamé damáná mardé cha kissagá kasshán o áiay dastay delá ér kanán.
“Hodá hayr kant.” Abayd engor o ángorá man gosht parchá ke man zánt é ham bétáidá pád nayayt.
“Taw chó bekan. Boraw hapt rangay bandikk byár o maná beday. Man tará bandé bandán o dayán.” Mani gappay halás bayagá gón á hamé damáná pád atk o shot. Áiá cha man dege hecch jost ham nakot. Padá dér nagwast áiá hapt rangay bandikk gón at o atk.
“É bandá wati gohárzatkay chappén báská band. O eshiá abayd ján shódagá, dege hecch wahdá mabój. Enshállá hayr bit.”
Man haptrangén bandikk hór kotant o hapt zandhén gokk bast o áiay dastá dát. Áiá band wati mocchá kot o pád atk o óshtát. Kammé hayál kanagá lagget, áiay delá at gappé bekant, bale padá hecchy nagosht o ráh gept.
Bale é janéná padá mani tám kasshet. Haptagé yakk randé allam mani gwará atk ke daniga hecch nabitag. O man hamok randá hamé gosht o pád kot ke eshtáp makan. Hodá hayr kant. Hamé dhawlá kesás say máh gwast o man ham ni ajab bézár etán.
Yakk róché á cha dirá pédág at. Áiay gendagá gón mani jánay potth pád atkant o maná sakk zahr áyagá at. Man pegr kot marchi man tachká áiá goshán ke dáb bándátá delá bedár. Agan kassá wati habar nayáort godhá póshi man wati habará pa tai gohárzatká kárán.
“Yakkéá wati zámátiay habar áortag.” Áiá pa pachén rué gosht o man sártén ginné kasshet.
“Bale mani gohárá daniga pakkáén jawáb nadátag. Mani goháray delá naent, parcháke áiá sáriá jan o chokk hast. Chónáiga sér o azagárén mardomé o chó sakk pir ham naent. O nomásagay bayag zit siray sará ent. Agan yakké zit sir kant, zit chokk bit o padá nomásag ham zit bit. Ni man tai jostá atkagán ke taw é bárawá ché goshay?” Áiá wat jat o wat maná kot, bale man dist janéná sakk delá ent.
“Man goshán mahtaly makan. Jan o chokky agan hast, záná ché bit?” Kammé hayál kanagá rand man pa eshtáp gosht. “Bale chó chetawar bitag? Man wa kasánénéay wástá band bastagat. Záná gokkán sharriá táb nawártag o shol bitagant.” Man watá kammé paréshán kot.
“Parwáh nést hamincho ganjé.” Áiá darráént.
Mani molláiay hál ni kash o gwaray bázárán ham sheng bitagat, o métagay géshtarén bahréá maná “mollá” gosht o tawár kot. O mani delá ham báz bará holl kot ke risshán bedár o espétén jódhié god gwará kan o esháni hamráhiá espétén kolahé ham sará kan.
Yakk némróché man o mani lógbánok sobáregá etén ke anágah yakk kamáshén janénéá salám dát o potert. É may métag o bázáray naat. Má pajjáh ham nayáort.
“Bibi! Naganá bwar gón.” Mani lógbánoká á waragay saláh jat.
“Hodá shomárá ganj bediát. Man nagan wártag.” Man dist áiay gálewár cha gamá sarréch ent.
“Mollá Golámay lóg hamesh ent?” Kammé bé trekk o tawáriá pad, áiá cha má jost kot.
“Haw, Bibi! Mollá Golám hamesh ent, nagan waragá ent.” Mani lógbánoká maná némchammi cháráná kammé bechkandet o gosht. O man dist janén kammé dege wadh but. Áiay chamm mani bérisshén zanukká sakk etant.
“Haw, Bibi! Golám man án.” Man gosht bale á anga maná pa hayránén wadhé rók rók cháragá at. Goshay áiá báwar bayagá naat ke “mollá” man án.
“Bibi! Taw pa káré atkagay?” Man jost kot.
“Haw, mani chokk! Man káréá atkagán.”
Ni áiá maná “mollá”ay badalá “mani chokk” gosht bale anga áiay hayráni barjáh at.
“Bogosh, Bibi! Tai kár ché ent?” Man warag bass kot o dém hamáiay némagá tarrént.
“Maná… mani… kár…” Áiay chamm mani lógbánoká sakk etant. O man zánt á mani lógigay démá gappá chér dayag lóthit.
“Bibi! É mani chokkáni mát ent. Deljam bebi. Tai gapp páshk nabit.” Man wati lógigay némagá cháret o gosht.
“Man cha Drachkóhá pédág án. Mani sir kotagén jenekkué. Áiay sirá dér ent. Ni salámati chár chokkay mát ent. Pésará mard áiay sará sharr bitag bale hamé do say máh bit ke á yakk janózáméay sará áshek ent o ni pahk hamé janózámá poshtá kasshetag. Wati jan o chokkán hecch jost nakant. Janag o próshag wa choshén gappé naent. Marchán habar do nabit, sawnáni dayagá chest bit. Agan sawnáni bedant godhá é bémát wati chárén gollodhán bezirit o kojá borawt? Maná yakkéá tai sój dátag ke delay tarrénagay thekk o thák zánt. Pa wati Hodáyá bechár, eshiá anchén wadhé bekan ke dely cha hamé janózámá borawt o wati jan o chokkán bezirit. Hodáay gwará bésawáb…” Áiay arsán dawr kot o ched o dém áiá gapp kot nakot.
Maná eshiay sará sakk bazzag but o delá gosht drégatén man é wadhén thekk o thákk bezántén. Man némchammi wati lógbánokay némagá cháret, áiay chamm ápolok etant. Man hayrán etán ke ché bogshán. Anágah áiay gálewárá maná paddrahént.
“Wati chokkáni saray sawábá maná béomét makan.” Áiay gálewárá ométay hamráhiá bazzagi hawár at.
Man yakk nezaré áiay némagá cháret. O padá pád atk o shotán, wati ketábáni kabáth pach kot, dast tóká bort, ketábé dar kot. Ketáb wájah Ji Ár Molláay shayráni daptar “Bazhn” at. Padá man espétén kágadé zort o pa bazhnigén delé ketábay dap pach kot. Lahté tákay léthéngá rand, hamá kágad démá kot o ketábá cháráná kágaday sará nebeshtah kot. “Sabray baré shirén”.
É myáná man dist, janénay chamm yakkajji maná sakk ant o bazzag bazzagá maná cháragá ent, bale hamé bazzagi cháragani tahá man cha áiay démá ométay rozhné ham dist.
“Eshiá bezir, áp yá cháhay tahá boshód o hamé ápán wati zámátá bwárén. Enshállá hodá hayr kant.”
Man hamé kágad pétk o áiay dastá dát. Bale man áiay chamm cháret nakotant. Áiá táid zort o wati dast pandólá bort, cha pandólá yakk gokk bastagén poché dar kot o gokkay bójagá lagget. Man dist pochay tahá chizzé kaldár etant ke áiá mocchá kotant o mani némagá shahár dátant.
“Bibi! Man paré kárá zarr nagerán.” Man gosht. Bale áiá mani gapp delgósh nakot o zarr mani démá boná ér kotant o pád atk. Gón pád áyagá goshádén gámán cha lógá dar atk.
Yakk katrahé man o mani lógbánok yakké dómigay chammán cháragá laggetén bale padá zit man wati démay zarr chetant o áiay randá kaptán.
“Bibi, Bibi, oo Bibi!” Man áiá tawár janán etán. Bale áiá chakk najat o anga wati gám trondter kotant. Man óshtát o áiá cháragá laggetán. Kammé démá á lógéá per tarret o cha man andém but. Man padá béraw kot o lógá atkán.
“Ni taw dege hecch kár makan. May láp sharriá dar kayt.” Mani lógay poteragá gón mani lógbánoká darráént. Áiay gálewárá tazhn hawár at.
Man á zahrá zahr cháret o hecch nagosht. É sahtá maná áiay gapp chó tirá tawragá at.
Zarr mani mocchá etant. Hamá wadhá áiá pétkagetant, hamá wadhá man ketábáni kabáthay kondhéá chagal dátant.
Máhé nagwast. Yakk róché maná hálá gept ke áiay zámátá áiay jenekkay sawn dátagant o hamá janózám geptag. Hamé róchá man kabáth pach kot o zarr dar kotant o hesáb kotant. Yakk panch sadigé at, chár sadig o yak panjáhigé at, chár dahi o do panchig etant, bazán hazár kaldár sarjam at.
Golám Negwari