Má doá wánagá atén. Yakk róché ostádá, wájah Monirá gosht, “Man josté kanán. Hamá ke zánt, dastá chest bekant, agan nazánt o chest kant, chámpathé wárt! Jost esh ent ke má ginná tahá barén, kojám gays hóná rawt?”
Siay tahá chárá dast chest kot. Morád Jáná, Belárá, Hammalá o Man. Wájah Monirá awalsará Belár pád kot. Belárá gosht, “Kárban dháiáksáidh (CO2).”
Maná kandag atk bale wájahay torsá nakandet. Wájahá cha Hammalá jost kot. Áiá ón gosht Kárban dháiáksáidh.
Padá wájahá Morád Ján pád kot. Morád Jáná mokket o mokket o gosht, “Á…ák…si…si…jan!”
Padá mani bárig atk. Man gosht, “Áksijan.”
Wájahá gosht, “Roksár o Morád Ján! Shomay passaw rást ant. Shomá byáet o Belár o Hammalá chámpathé chámpathé bejanet!”
Morád Jáná damáná shot o áháná chámpath jat chiáke Belár o Hammalá yakkashá Morád Jánay mokkagáni gégán gept.
Maná bazzag but. Man gosht, “ Man najanánesh.”
Wájahá gosht, “Agan tawesh najanay godhá Hammal o Belárá parmáyán, bellé tará chámpath janant!”
Godhá man ón pád atkán o doénáná chámpathé chámpathé jat. Wájahá gón Belár o Hammalá gosht, “Borawet, benendet bale áksijaná yád kanet.”
Belárá wár wárá gosht, “Ásiján yád bit nabit, chámpath yád bit!”
Roksár Balóch