Ázmáná áp rechagá ent…
Áiá mani chammáni tahá cháret gosht.
Áp narechagá ent, hawr buagá ent…
Man wati dastay ketáb ér kot o darigá dhann cháret.
Godhá hawrá áp narechit?
Áiá jost kot. Man hecch nagosht, á ham darigay kerrá atk óshtát.
Ázmán parchá gendag nabit…
Golám ché zánant…
Man padá wati ketáb chest kot.
Yakk anágah áiá darigay pardah bastant. Kóthi tahár but o áiá layth rók nakot o shot. Darwázag áiá sakká jatagat…Bale sahté nagwast á padá atk.
Taw pardah padá pach kotant…
Haw…. Kóthi tahár at…
Layth chiá rók nakot…
O áiá layth rók kot o pardah bastant. Kóthi hamá paymá bé trekk o tawár at.
Mani ták léthénag o áiay sáhay tawár bass áyagá at.
Taw habar chiá nakanay?….
Hamé sahtá maná gomán but ke hawrá bass kot. Man zut zutá pardah pach kotant. Dhanná tahár at. Lógáni layth o proshtagén sáhegáni jang at. Hawrá goshay dam bortagat bale angat tramp at… Man bechkandet.
Taw chiá kandagá ay?
Sharr ent, hawr angat hast ent…
O á yakk randé padá delgrán at bale é bari na pardahy kár dásht na darwázagy dast jat o nayke kóthiá dhann shot. Bass áiá habar nakot o hardénke á tawárá cha kapt dán man zánt ke á ach man delgrán ent o padá áiá ketábé chest kot o áort, mani kashay korshiay sará nesht.
Ché wánagá ay….
Man jost kot.
Wánagá naán, cháragá án….
Áiá passaw dát…
Ché cháragá ay…
Nagoshán gón….
Áiay é passawá maná habakkah kot. O padá man áiay dastay ketáb pach gept. Á mortagén bálué at ke koneri tákáni kerrá dér ent hoshk butagat. Maná yád naat ke man kadi ér kotagat o man nazánt ke parchá ér kotagat.
Genday man bálué bebán…
Áiá ketábay saray báluay bánzol wassh wasshá latártant o gosht.
Sharr ent, dastéá kapay, ketábéá band bay..
Taw godhá á ketábá wánay…
Man hecch nagosht…Tawár goshay mortagat. Kóthi cha bramsh o chedhekkahá kaptagat.
Á báluá dazgatth at o man ketábá.
Hamé sahtán gwát goshay sardter but. Darigá áókén gwátá áiay goshán bál dát o padá á at… Kóthi at. Jenekk azáb ant, á jenekk gandater ke goshánáni dombá kaptagant.
Taw pa goshánéá watá kosht o ér kot…
O taw pa ketábéá maná…
O padá kassá gapp najat…. Kassá ham…. Mermeránkén layth at. Gwát o áiay goshán at. Ketáb gón báluá bárén kojá shotagat, man nadist. Man chamm pa ketábay shóházá shánk dayag lóthetant ke hawrá ér dát. Áiá goshán yalah dát o man shóház wayl kot.
Hawrá goshay habar wártag. Bégáhayg ent, bass nakant. Áiá cha darigá dhann kotagén wati dast tahá áortant. Áiay dráhén dast dán mangalikán tarr butagatant.
Taw habar chiá nakanay?
Golám ché bogoshant?
Hawr kadi bass kant?
Golám ché zánt…
Hecch mazán. Golám hecch mazánátant.
Áiá padá wati doén dast cha darigá dhannn dáshtant. Hawr áiay dastáni sará gwáragá at. Lakirán ménagá at. Dastay keshká tachk kanagá at.
Taw watárá golám chiá goshay?
Man abakkah bitán. Ketáb man thébalay sará ér kot. Hamé sahtán maná segréthay talab but bale párkith hálig at. O á wadárá at ke man chizzé goshán bale man dist hawr trond at… Trampáni katárán bastagat. Sarkáray bayrak sarjamá tarr butagat bale angat óshtátagat… Sepáhig atant.. Mardom atant… Darwázag atant o tarr o mántarráni jangalé at.. Bethekk mán ladá ér nakapit. Lad syáh o tahár ent. Golámá che kár ent. Maná may bázáray Balóchok gir atk o padá man modámay dhawlá golámé bután o hecch nagosht.
Shomá bándá rawagá et?
Man anágah jost kot.
Golám habar nazánt. Golám habar kot nakant, bale golám zánt ke man bándá rawagá án. Áiá bechkandet.
Man hecch nagosht. Shap goshay tahte rawáná sawár at. Man sahi nabután ke kadi bámá dar dast jat. Kadi rasetagat. Kadi róch butagat bale man sahi án, á hamesh ent sahté bit ke shotagat. Bale rawagá sári á mani kerrá atkagat…. Gappy najat. Pardahy kár nadáshtant. Bass bé trekk o tawárá hoshkén báluy bort gón.
Koneri ták o ketáb angat mani kabáthá hamá dhawl ér ant….
O cha hamá róchá rand nazánán chiá may lógáni sará hardénke shapá hawr gwárit, maná gomán bit darigá dhann do dast hawray sará ent, tramp dastáni delá kapagá ant, dastay likrandán tachagá ant o mizzán mizzáná mangalikán dast janagá ant, hamé sahtá maná gir kayt áiá goshtagat.
Taw habar chiá nakanay…
O padá hawr, shap o man…. sayén nendén jédhén ke má habar chiá nakanén…Golám habar parchá nakanant.
Anágahá gerók jant. Shap bazter bit o man bé trekk o tawárá koneri tákán hawray sará ér kanán.
Hanip Sharip