(Hamá sarmacháráni námá ke pa mátén golzeminay ájuiay ráhá wati sáh o málesh nadr kotagant.)
Begend kesmatá mani
Bechár kodratá mani
Che rangén sohl o trán kant
Che dhawlén gapp bayán kant
Pa hakkay háterá wati
Zeminá ázmán kant
Sharáb bárén wárt nawárt
Padá ón tattarán kant
É kóhsár o dhák o dhann
É bág o kahchar o chaman
Gwazant máh o sál o san
Azáb o bazzagén watan
Wati delá man rájay yakk baláhén mehrwáné án
Wati delá man gongéay nagoshtagén zobáné án
Wati delá man golzeminay yakk bolandén ázmáné án
Man belly piriay hazárpándén menzelán cha gwastagán
Bale chó áloku man angatá narostagán
Man ché goshán o dar bárán
Kojá rawán o dam barán
Man o Golám o Shér yakkén markabá sawár atén
Má sakkiáni yár atén
(Moniray kessahá makan)
(Moniray kessahá makan)
Gón béwapáén chashmaká
Gón béryáén tasbiá
Monir chincho bazzag ent
Man ché goshán? Man ché goshán
Zamánagá hazár pand borretag bale dán angatá hamá wadh ent
Zamánagárá kai gelag per ent zamánagá
Zamánagárá jost o pors kay bekant?
Zamánagárá ars o pors kay bekant
(Moniray kessahá makan)
Mani delay nagoshtagén é goshtenán delá makan
É kessahán delá makan
É ráh báz moshkol ent
Watá gón hecch gelah makan
É jang gón zamánagá shobén o chahr o tahr kant
É jang márá hór kant, é jang márá bahr kant
É jang nagdén mósomán cha mósomán zebahr kant
É jang dán kyámatá hamé wadhá rawán kant
Ke márá báz pand borragi ent angatá watan
Ke márá golzeminá nendagi ent angatá watan
Watan, watan, watan, watan
É hón pa taw hecch naant
É ars pa taw házer ant
É ástáptagén badan tai gamáni mennat ent
É shayr o gál o gapp o trán
É labz, goshten o bayán
É golzemin, é ázmán
É sháhegánén dhák o dhann
Baheshtgónagén chaman
Má anchó wat pa dém wáb wábéá nageptagant
É bébaháén ták o pann
É kóh o kahchar o daman
É zer ke kerdagár kant
Gón chawlán hirr o hár kant
Hodáay yakk nadátagén hesábéá nageptagant
Esháni poshtá hónay yakk morádbátén kessahé
Balóch kodratá gón mayl kant chó ke zahgéá
Balóch taháriá gón jang kant modám chó cherágéá
“Chedá naent”
Balóch marzbómay yakk mojjati mosáperé
“Dadhiay Kóth”, kawray del, mán jolgahén Karáchiá
Lyáriay gathar maná chó sáhay paymá dóst bant
Man o Golám o Shér yakkén markabá sawár atén
Moniray kessahá makan
(Saádatén Mári taw anga zendag ay namortagay)
(Zarinah bárén tángor ent?)
É marzbómay háterá medhán bón, merón, rawón
Merán yá ke dozhmená koshán bón rawón
Dán sáhay sáz rawt o kayt
Má goshtenán goshán bón
Kaláshay démá Dhádhari palitagán medhán bón
Cha Kóhalu dán Cháhbár
É jang kerdagár kant
Hazinagán bahá makan
Zamánagán tahá koshit
É jang barjám ent modám
Dán sáhay goddhi simsarán
Dán omray rand o ásarán
É jang tahná yakk Balóchay golzeminay jang naent
É jang tahná may kesás o kayl o pársang naent
É jang dán hesábay róchá káem ent o dáem ent
É jang tamám káenát, é arsh o korsh hór bant
Edá gón zendagiá margay hast o nést tór bant
Baré baré medhay pedhá tawán ham lagór bant
(Begend Kázi possagá gón nárawáén kessagá)
Che rangá bahr o báng bant deláni mehr o sangati?
Che rangá jatth o wáng bant gón Chákaray nezóriá
(Baré baré man Kambará gón ráhá mán gisshetán)
“É kawr abbá bárt tará, é kawr abbá bárt tará”
Bale pa man ajab naent ke angatá nabortagy
Delá cha mátén sarzeminay hákay gam nazortagy
Seláhband butagán pa sardhagáray háterá
Man o Golám o Shér yakkén markabá sawár atén
Moniray kessahá makan
É hón ke zamánagá may dámoná shaléntagant
É hónay kessahá makan
É hón chó ke henniá may andará rajéntagant
É hónay kessahá makan
Balóchay zagrén hón zendagiay dámoná kapant
Balóchay nagdén gál bandagiay dámoná kapant
Man o Golám o Shér yakkén markabá sawár atén
Moniray kessahá makan
Má koll cha róch bondará
Balóchay dardwár atén
Gesar cha jenday sáhegá
Má rozhnay rázdár atén
Lagóray marg o zend ché?
Nezóray pád o pand ché?
Abayd cha é bondará
May zendagi, may jend ché?
Delá man chón zort bán cha pollén hambalán wati
Che paym man shamosht bán shahidén gangalán wati
É ráh dán rawán kant
É sáh ham rawán kant
É ájuiay kárawán wati moráday menzelá hamé wadhá rawán kant
Taniga báz pand borragi ent márá hamsapar
Taniga bázén chapp o chóth may ráhay démá bánth bant
Taniga man namortagán
Taniga dam na bortagán
Mobárek Kázi