Chárdahi Máh
Shapá chárdah at. Cha máhay tanakkén rozhná gédiay dráhén hasti jánshód at. Sadu Káparokay sará wati nepádáni sará neshtagat. Áiay sohrchakén mudán gwát shengénagá at, o máhay rozhná cha áyáni tahá yakk jalashké wadi bayagá at. Áiay tanakkén lonth larzagá atant, o áiay arsá golgolén bádámién chamm máhá sakk atant. Áiay espétén dém goshay morwáredi ápá gón shoshtagat. Saduay surá marchi chár sál sarjam at. Á máhá chárán o hayáláni bójigá swár at.
Surá dah róch gwastagat. Namrózay wizá halás bayagá at. Áiá gón wati mátá gosht ke á nun darmolká narawt o Saduá yalah kot nakant.
“Mani cho(kk)! Sadu lápé wa lóthit. Edá ché hast?”
Pa delnakasshi o mátay bázén goshagán Namróz pa rawagá sádhi but. Á shapá ón máhá chárdah at. Á har do wati nepádáni sará neshtagatant. Saduay shengén mahparán samáráná Namróz áiá goshagá at.
“Sadu, mani poll! Man bé taw darmolká barbád bán. Ammáyá bogosh bellé Namróz hamedá ent, hamedá kár kant.”
Saduá ón pa mehré á cháret o gosht.
“Ammá bale kojá pahmit. Taw bale raway godhá wati rawagá pa áyag bekan.”
Rawagá pad har shap Namrózay pawn atk o Saduá pawn zort o tatk dhanná shot. Namrózay mátá baré norondhet o baré kandet. Dánke chár panch máh gwast. Kamm kammá Namrózay pawn kamter bayán butant. Rócháni badalá haptagáni sará, padá begenday máhé yakk baré áiay pawn atk. Sadu béchádh at bale Namrózay mátá á tassalá dát ke kár o kasabá ent, bazzag gasi ent, incho nun pawn kojá bit. Á wahdi shomá nóksur butaget.
Sáléá pad darmolká Namrózay sangaté atk. Sadu abéd cha truay jostá, áiay cháragá shot o josty kot ke, “Namróz chón ent, pa man chizzé démy dátag ke ennán?”
Áiá sar jahl kot o passaw dát:
“Mani gohár! Man ché bogoshán, Namróz ódá gón sangat o jenekkán zawál ent. Róché yakk jenekké áiay sangat bit o polity. Man chincho sar o sój kotag. Mani sar o sójáni sawabá marchán maná anchó ráhá gendit, wati ráhá táb kant. Mani wa del goshit chamé jenekkán yakké geptagy.”
Sadu pád atk o gréwáná lógá atk o dém pa chér kapt. Chont róch o shap áiá warag dap najat. Namrózay mát hamsáhegáni kerrá shot ke chokkay pawná bejanet o bedayet bale áiay lambar band at. Hamokk róch Namrózay mátá bass Sadu tasallá dát o Saduá ach é tasalláyán chedo gésh grét. Saduá hamokk shap nesht o jédhet ke é wadhén mehr kanókén Namrózá ché but?
Enshapi ón á jédhagá at ke dán kad á máhay tanakkén rozhnay chérá éoká benendit o pa Namrózá bejédhit…?
Andalib Gechki