É áiay awali báli sapar at. Zenday bist lápmóshén sáláni awali bál at. Á Shálkóthay báli patthay rawánagi láunjá neshtagat o wadárá at ke kadi Torbatay báligorábá sawár bayagay jár janag bit.
Áiay delá wasshiay jambarán bastagat bale yakk górichén hayálé ham narm narmá soragá at. Á górichén hayál esh at ke chó mabit ke bál kanagá rand báligoráb bekapit o thokkor thokkor bebit. Wasshiay jambar o torsay górich dém pa dém atant o á sópahay sará anchó neshtagat goshay end ná endá pád kayt.
Yakk démé garibiay katth, domi démá wánagay harch, báli sapar paráiá wábé at. Áiá modám basá sapar kot. Torbat dán Shálkóthay kaccháén daggá danz o ditt kanán, jamp o jól janán, panchar o ayrlák bayán, hóthal o masitán dáráná jabzagén basá 800 millay pand 40 kaláká borret. Masterén tamáshah basay tahá at. Tawámén ráhá danz, segréthay ditt, zhandén bádhi o kalandhén thaypay shór o shár, mosáperáni cheshag, kollag, hókárag o shánag. Saparé naat, shezáé at. Zyádahén nendagá pád gwát geptant. Nendjáh sotkant. Shór, danz, ditt o béwábiá sar cha dardá trakkagi but bale menzel gár at.
Harwahdá ke áiá é basán sapar kot áiá hayál atk ke man mardomé naán kermé án o lápmóshán rawagá án. Baré baré ke áiá wati sangatáni bayg o shantáyáni sará báli saparay thayg o thappah ditant, áiay delá chó kabassá bandén morgaygá parparroki jat. Áiay delá lóthet charáyán jost bekant ke bál kanag chón ent? Chinchok wassh ent? Bale áiá hemmat nabut. Chónén tepli jost ant. Harkas mani sará kandit. Moptá sobakk bán o garibiay máná é naent ke cha wati nezarán ham bekapán.
Choshén sáhatán áiá wati garibiay gwarjigá gept. Áker man dán kadéná chó kermá lápmósh bán? Mani kesmatá zánán chó sháhiná bál kanag nést? Bézobánén garibéay lonth hoshk o chamm áp bitant. Passaw béwánki at.
Yakk róché áiay wábén kesmat pád atk. Sarkárá kálejáni hakdárén tálebáni wástá cha zakátá kammok zar dayagay jár jat. Áiá ham panch hazár raset. Áiá zarráni ném chakkásay pisán dát o ném zort o báligorábay theketh kot.
Áiá thémb cháret. Angat wahdá hastat. Áiá nazziká érén hálták dastá kot o cháret. Háltákay sarhál at: “Amrikahay mosáperkasshén báligorábé kaptag o sawárén dráhén mardom mortagant.”
Cha torsá goshay áiay del chére poppán shot. Ched o dém áiá want nakot. Donyáay shahzóray nókén báligoráb kapant godhá Pákestánay é kalandhay hál bárén ché bit? Áiá hálták padá ér kot.
“Yá Alláh! Tai lakk shogr ent.” Yakkéá gón borzén tawáréá Alláhay shogr gept. Áiá chakk jat. Yakk kamáshé ke áiay póshák, rissh o koláh dráh espét atant, nazziká sópahéay sará neshtagat o tabzi janagá at.
Lakk shogr? Yakké na, do na, pura lakk shogr? Hmmm, sarpad bitán. Eshiá mani wadhá báligorábay kapagay tors ent.
Gón é hayálá goshay áiay del kammé sobakter but o pa hamdardi wati torsay hamráhá cháragá lagget bale cha kamáshay démá hecch wadhén tors yá parésháni dará naat. Á árámá neshtagat o tabzi thekkénagá at. Goshay Hodáay shogray gerag áiay tors naat. Hél at, shogol at, wahdtéli at.
Áiay chammáni hamdardi padá gár but. Áiay delá atk ke pirmardá bogoshán:
“Mollá! Hodáay shográ hamá wahdá beger ke mardomá makoshit. Yakkén damáná bárén chont koshit o taw angat neshtagay shogr geray. Padá shográ kai geray? Koshókay jenday! Mollá! Báyad ent taw é gappá bezánay ke koshókay shogray gerag táhaté naent, kásagchatthié, lagórié.”
“Yá Alláh! Tai lakk shogr ent. Taw maná ganj dátag.” Hamé sahtá molláyá padá Alláhay shogr gept. Inchok shogray gerag? É mollá anchó Hodáay shográ geragá ent goshay Hodáyá eshiárá nebeshtah kotag o dátag ke man tará nakoshán o padá goshit taw maná ganj dátag. Tará ché háky dátag? Sharrén mál zend ent. Wahdé tai zendá pach gipt, ganjá ché kanay, sará janay?
Ni á padá béárám bayán at. Á padá éok at. Pa wati paréshánén hayáláni táchénagá áiá nádelgóshiá padá hamá hálták dastá kot bale gón sarhálay gendagá háltáky dawr dát o cha kissagá báligorábay thekethy kasshet o bémaksadá patthagá lagget.
Wahdé thekethay pattahgá damy bort godhá neshtagén édege mosáperáni némagá cháragá lagget. Mardom anchó árámá neshtag o gapp o rappá atant goshay á delá jazm atant ke é báligoráb nakapit. Áiay delá lóthet ke Amrikahay báligorábay kapagay hálá kukkárá bwánán dánke dráh beshkonant o cha torsá belarzant o anchó deltrakk bebant ke dege pará báli sapará tawbah bekanant.
Chizzé meletthá rand báliá sawár bayagay jár janag but. Dém pa hamángor rawáná áiay chamm báligorábá sakk atant. Á awali randá inchok nazziká bálié gendagá at. Chamm anchén dróg bandant ke dap gong bit. Hamá ke ázmánay démá morgéay kaddá at nazziká chó kóhá at. É baláh bál bekant nakapit? Torsay górichá shikkagé jat bale á ni báligorábay padánká sar kapán at.
Anchó ke áiá báliay darwázagá pád ér kot cha nazziká janéni tawáré áiay góshán kapt.
“Salám alaykom.”
Áiá hamé némagá cháret. Báligorábay dhawldárén jenekké darwázagay nazziká óshtátagat o haryakk mosáperéá gón bechkand salám diagá at. Á basay charsién, chellién kelindhar o monshiáni tránagá kapt ke na wati ezzatesh zánt, na mosáperáni. Domi némagá é jalwanákén jenekk at ke gón mosáperán péshsalám at. Áiay bechkand delay naat éoká lonthánig at bale áiay pollén lontháni chárag wassh at. Áiay shahdén tawáray gósh dárag wassh at. Cha basay hakk o delén béezzatiá báligorábay wassáchén ezzat démáter at.
Wahdé báligoráb tagráhay sará téziá tacháná bál gept, áiá anchó gomán but ke man wat gón wati jenday pádán tachán tacháná bál kotag o ázmáná rawán án o wassará wat áiá hayál atk ke begenday yakk zamángé borzay Hodá ham zeminay sará ábád bitag o yakk róché báligorábay paymá tacháná báli kotag o ni anchó borz shotag ke gendag nabit.
Báligoráb cha zeminá dir bayán at o á wáng at o ázmáná cháragá at. Goshay awali randá gendagá aty. Wati zendá awali bará áiá samá but ke ázmán cha zeminá báz washter ent. É park páselahayg at yá chammáni? Áiá zánt nakot bale anchó márety ke nillén ázmán hamé wástá wassh ent ke Hodáay lóg ent o abadmániay máreshté dant o zemin gón wati béshomárén rangán é wástá delá grán ent ke edá kabrestán ábád ant… o áiá zánt ke Hodá padá chiá zeminá nayayt.
Wahdé báligoráb cha jambarán borz but, áiá dit ke cha borzá jambaráni chárag sakk wassh ent. Zeminay sará óshtag o jambaráni chárag inchok wassh naent chó ke jambaráni sará óshtag o áyáni nedárah kanag. Jambar ázmánay démá potthah potthahá anchó sheng atant, chó ke ábdárén zeminé ápay hoshk bayagá rand tal tal bit. Potthah potthahén jambar o talkárén zemin hamrang atant. Yakké áp at o yakké hák. Áp o hákay nyámá é hamrangi bass nezarayg at o gón arsh o parshay yakk kanagá áiá zánt ke chamm dróg bandagá ant bale á hayrán at ke chammay bastagén drógá del chiá báwar kant?
Ni báligorábá wati borzi geptagat. ázmánay démá jambarán borz bál bayagay máreshtá áiay jánay poth punzhartant. Gomán o yakinay nyámá áiá anchó samá but ke man ahdi dástánéay shahzádagé án o é báligoráb dárá jódh bitagén jádui apsé ke rástén góshay táb diagá bál kant o chappén góshay táb diagá Kóhe Kápay sharrangterén parigay mádhiay sará nendit.
“Ekskiuz mi (Excuse me)…”
Báligorábay jenekkén tákemay tawárá á cha hayálán kasshet. Zébáén jenekk gón delkasshén bechkandé áiay kerrá óshtátagat o waragáni sini áiay dastá at. Kóhe Kápay parig shahzádagay sará mehrabán bitagat o dáray aps borzbál at. Áiá parirangén jenekkay némagá cháráná wati shahzádgén hayálay sará bechkandet.
Wahdé áiá cha waragán awali dapár zort o dapá kot, áiá gomán but ke zeminay warden agan ázmánay démá warag bebit, anchén támé kárit ke jannatay gallahay bitag. Hamá washtámén gallah ke paráiá Ádam o Hawáyá Hodáay pábandi prósht o shahdén zendárá margay jawrén tám nasibá dát.
Waragán o rand tákemá sharbat o cháh áort. Áiá sharbat pasond kot. Washtámén sharbtán á zendápay tránagá perrént o áiay delá gongén dwáé lóthet ke é saht abadmán bebát. Man dáem hamé paym ázmáná bátán. Cha hurán sharrangterén é jenekk gón porlezzatén waragán hamé paym mani démá bát. Bale é támáni tahá jannatay gallah mán mabát o na ke may tahá Ádam o Hawáay dózehén náparmáni.
Warag o charagá rand áiá tekah dát o gég nesht. Sitthay kissagá ketáboké mán jatagat. Áiá zort o patthagá lagget. Ketábokay tahá bázén sar o sójé nebeshtah at. Áyáni tahá yakké esh at ke kazáay wahdá mardom láep jaykethá chón gwará bekant. Á padá báligorábay kapagay hayálá kapt.
Sawár bayagá pésh á hamé torsá béwár kotagat bale ni é porkaypén sáhatán ke á ázmánay démá bál at, áiá hayál atk ke báligorábay kapag, zemini zenday é ázmáni ásar, cha margay dráhén dróshomán dhawldárter ent. Nádráhi, gádhi, tir, ás, áp, zahr, páhu… cha kollán jedá, cha drostán boster.
Hamé wahdá anágahá báligoráb lolloret o á pach larzet. Áiay sréná goshay karanthé tatk. É torsay máresht at. Áiá édegeráni némagá cháret. Drostáni rang bar gashtagat. Hamé wahdá jár janag but ke báligorábá kóhéay sará gwazgay sawabá sambaké jatag. “Paréshán mabet.” Mardomán sártén ginné kasshet.
Báligorábay yakkén chandhagá dhawldárén margay neshah prósht. Ni á hayál kanagá at ke marg har dróshomá bebit, torsnák ent. Na borz ent na past. Marg bass marg ent. Zemini zenday ázmáni ásar! É hoshkén labz ant. Labzáni wasshén red o band ant. Margay zébdárén bayán margá brahdár nakant.
“Yá Alláh! Tai lakk shogr ent, parwardegár!” Pirén molláay tawárá á padá cha hayálán kasshet. Áiá chakk jat o cháret. Mollá nazziká sitthéay sará neshtagat o wati dasti baygay tahá chizzé patthagá at. Molláyá cha baygá do pattá góli dar kot. Cha haryakk pattáéá yakk o yakk gólié zort o gón gelásé ápá wártant. Drájén ginné kasshety. Cha risshán petthókén ápy pahk kotant. Yakk baré padá Alláhay shogry gept o shoru but tabzi janagá.
É pirmardá cha nádráhiá torsit. Áiay delá paré kamáshén molláyá padá hamdardié pédá but. Tors násalámtiay bebit yá báligorábay kapagay, máná yakk ent. Hardoén ráháni menzel yakk ent, mawtay menzel. O cha mawtá harkas tachit. Dráh zenday lóthók ant. Hamá zenday ke áiá marg per mabit. Bémargén zend ke Hodái chizzé, harkasi delay armán ent. Dráh chó Hodáyá dáemi zend lóthant. Hodái lóthant, Hodái!
Padá anágahá áiay ázmánén delá gerókén hayáléá shahm kot. Hodá dáray apsé ke mardomá tráshtag. Zikkén dáray aps marchigén báligoráb ent o marchigén Hodá bándátay ensán ent.
Gón é hayálay áyagá áiay jánay poth punzhartant o á, sar dán pád larzagá lagget. Á anchó jóshá at, anchó gal at goshay hazánagé dasty kaptag. Áiay delá lóthet ke kukkár bekanán o bogoshán: “Oo donyáay mardomán! Man Hodáyá zánán. Sharriay sará pajjáhy kárán. Wati dóstén Hodáyá. Mehrabánén Hodáyá. Hodá yakk wábé ke mardomay delay ágahén chammán ditag. É wáb róché na róché watá ham máná dant o mardomay bémánáén zendá ham.
Chón wassh ent mani zenday é damán! Chónén abadi rangé é sahtá mán! Chón wassh ent Hodáay sarpad bayagay máresht! Ni man bemerán ham maná ranj nabit. Man wati Hodá zántag. Wati hamráh o sangatén Hodá.”
Áiay sénagá zagrén wasshiay bégwázén zeré chawl janán at o margay tors chó proshtagén bójigá wasshiay é mastén zerá zéráp bitagat. Wasshi… zagrén, nagdén wasshi. Hamá wasshi ke áiay tahá hecch tors, hecch bandesh, hecch kammi néstat. Anchén ázát, sarjam o abadi wasshi ke tahná Hodáay nasibá bit ke margay torsy nést.
Wasshiay tuppáné áiay delá chest at. Áiá anchó gomán but ke wasshiay é tuppán áiay delá derrán o sénagá prósháná dar kayt o tawámén jaháná mán patáit. Cha békesásén wasshiá áiay chamm homár atant.
“Shomá zánet Hodá chéé?” Anágahá áiay borzén tawár mán báligorábá jakset. Á pád atkag o óshtátagat. Haryakkéá chakk jat o ajakkahi áiay némagá cháret.
“Man shomárá goshán gón Hodá chéé,” á wati jóshá goshagá at. “Hodá dáray apsé ke mardomá tráshtag.”
Mardománi gósh mekk bitant o deláni krechk péshánigá atkant bale á chareshán bésamá goshagá at.
“Mardomá é dáray aps é wástá tráshtag ke á Kóhe Kápá rawag lóthit, Kóhe Kápay sharrangterén parigá gerag lóthit. Zánay Kápay máná ché ent? Kápay máná ent: kodrat, kuwat. Taw Kóhe Káp gept godhá bezán har chizzay sará káder bitay. Kóhe Káp karámátáni sarzemin ent. Ódá hecchi nábuteni naent. Harché del bolóthit, bit. Mussáay asá, Solaymánay tahte rawán, Alladinay jenn… dráh hamódá ant. Shomá sahi naet bale é báligoráb dém pa Kóhe Kápá rawán ent.”
Shahzádagén mosáper hayrán o paréshánén zeminzátáni démá Kóhe Kápay kessahán árán at o dáray aps borz bál at.
Dáray aps borzbál at o raptáry ham téz at bale eshiá yakk baláhén aybé mán at. Dáray apsay chappén gósh gár at, o é aybay némagá na sarjóshén goshtánk diókay hayál gwar at o na ke wángén gósh dárókáni!
Nágomán