Shapay bárén che wahd at ke Dinábáday mardomán cha gránén wábá bost kot. Sakk garm at. Harkas cha hédá jánshód at. Cha tonná áyáni nokk hoshk at o del tosagá at.
Shap sakk tahár at. Estár gár atant. Goshay ázmán jambarán yá mojéá póshetagat. Póhám at o garmá ér dátagat.
Wábsarén mardom sarbatag atant ke yakk anágah é che kahré kaptag, che kazáé atkag. Kammé péshter sarshapay wahdá ázmán sáp at. Estár dará atant. Shap rozhná rozhná at o gwát ham kasshagá at.
Garmágay mósomá béásrátén Dinábáday mardománi omét bass hamé kawsh at ke áyáni dely sárt kot. É Hodái gwát ke cha ázmáná atk anchó porkayp at ke áyáni delá lagget o á harwahdá wáb o némwáb atant. Agan baré baré ázmánay gwát sost but, áyán cha pisshá gwaptagén gwátu zortant o watá gwát kot bale enshapigén póhám gwátuay wasá dhann at. Dinábáday mardomán wati yádá choshén garm naditagat. Jannatén shap goshay dózehay tránagá kaptagat.
Garmjatén mardomán garmay tawjil chó kot ke áyán áp wárt, wati pocch kasshet o dawr dátant, ján áp jat, gwátu zort o watá gwát kot. Chareshiá áyáni jáwar kammé gehter but bale janjál esh at ke wahdé áyán gwátu ér kotant, padá garmá ér dát, padá áyáni héd retkant o nokk hoshk but.
Áyán báz bará áp wárt, ján shosht o watá gwát kot. Zyádahén áp waragá áyáni láp trakkagi bitant. Dam pa sahtay ján shódagá lógáni áp halás bitant. Yakkajjén gwát kanagá áyáni dast hoshk bitant. Ni goshay géshter garm at. Chokk o janén gréwagá atant. Mardén paréshán atant. Har némagá kukkár at, áh o zári at. Áyán zánt ke é garm dán sohbá bázéné sárt kant.
Dózehén garmá á bortant o kahn o kahnay kerray óthagá sar kotant. Dér nagwast ke Dinábáday tawámén mardom, janén dán mardén, kasán dán mazan, kahnay ápá atant. Kahnay sártén ápá áyáni garm shosht. Ni áyáni hósh kammé barjáh but o wati sará kaptagén janjálay bárawá hayál kanagá laggetant. Wadh wadhén gapp janag but.
Dinábáday tabibá shakk at ke gwát nádráh ent pameshká kasshet nakant.
Sáens o syásatá hobdárén warnáéay hayál at ke Chágiá bitagén aythomi trákáni tábkáriay sawabá gwát band ent.
Mósomay bárawá kammé báz wákubén dehkánkáréay andázah at ke gwátay bandi áókén tuppánéay nesháni ent. Anchén syahgwáté gón hawrá kayt ke na lóg kellit, na drachk o dár.
Dinábáday péshemámá yakin at ke ázmáni gwátay bandi baniádamay gonáháni barward ent o mahsharay neshánián yakké. Dér nakant Esrápil kayt pa Suray damagá.
Kammé hámóshi but. Padá ched o torsnákén hálán gardesh kot. Esháni eshkonagá haryakké deltrakk but bale kassá nazánt ke é gappán kay jant, é hálán kay kárit. Chamé shegbegán yakké esh at ke molkay nókén bádsháhá gwátay sará pábandi jatag. Bádsháhá goshtag mardom ke mani golám ant, gwát chiá ázát bebit. Eshkonagá bádsháhá dóshi mehter Solaymán wábá ditag o é pábandi hamé wábay máná ent.
Dege hálé esh at ke gwátay tahá mardomi hónay bu hawár bitag, pameshká gwát band ent. Ni hawr ke bit ápay badalá hón rechit o mardom ápay badalá hón warant.
Eshiá rand dege hálé tarret ke Hodá cha mardomay náparmánián nawassh ent o áiá erádah kotag ke gwátá chest kanán, jahánay dege kondhéá barán. Hamódá dege sorendah o sorendaháni sarwari jódh kanán o eshkonagá, gwátá rand wájah Hodá ápá ham bárt.
Tawámén shapá wadh wadhén shegbeg o hál tarret. Yakk cha yakká bimnák. Yakk cha yakká hóshbar. Kassá nazánt ke é hálán kay kárit bale drostán esháni sará báwar kot.
Yakk némagé dózehén garm, domi némagá é wadhén torsnákén gapp o hál. Dinábáday mardománi del kaptagat. Dráh áh o záriá atant, cha Hodáyá dwá o peryátá atant, tawbah o kukoruá atant.
É mahsharén shap pa hazár azábi gwast o shot. Sohbay sará áyán ajabén nedáragé dit. Drachkáni ták soragá atant. Gwát kasshagá at. Gwátay kasshagay tawár ham góshán kapt. Gwát kasshagá at bale áyáni jáná nalagget o kasá nazánt ke é che esráré, che shezáé. Á dege gappéá ham hayrán atant ke é gwát cha ázmáná áyagá naat. É zemini gwáté at o cha róbarkatá kasshagá at.
É gappá zamánagé gwastag. Dinábáday mósom badal nabitag. Angat hamá wadh garm ent. Cha hamá róchá ázmáni gwát band ent o cha róbarkatá kasshókén gwát áyáni badaná nalaggit. Pameshká á shap dán róch kahnay ápá pogoláni wadhá waptagant, pa hamé ométá ke yakk róché kayt ke ázmáni gwát padá kasshit.
Nágomán