Man cha darigá chamm shánk dátant. Angat hawr at. Bébramshén hawré at. Na gwát, na gerók, na grand… bass rechán at. Man cha darigá chamm kenzéntant o wati jan Máhekánay némagá cháret ke gwánzagay nazziká jollay sará neshtagat o nonnoká méchénagá at. Lógay tahá, dhanná har chizz pa ajám at, bétawár at o man shezár bayán atán. Hawr o áp mabutén man shotagatán bázárá wati dokkán pach kotagat.
Garmági némróchán choshén bétawárén hawr maná dóst bit bale marchi nazánán chiá del lóthagá at ke hawray pajjiá anchén trondén gwáté bekasshit ke tramp chó tirá bebant. Gerók anchó chilk bejant ke ázmán bederit. Jambar anchó begrandit ke gósh karr bebant. Nonnok bogodhit o gréwagá shoru bekant o Máhekán paráiay sahdhénagá názénk bejant. Har némagá kukkár bebit, Jaggá bebit.
“Marchi sohbá ábbáyá pawn kot. Tará salámy kot. Goshty démay ádénagá káyán.” Máhekáná bétawári prósht.
Man áiay némagá cháret bale hecch nagosht. Maná washtab o maskarábázén nákuay gappé gir atk. Wahdé sirá rand do say máhay tahá Máhekánay láp porr but godhá nákuá gón man maskará kot: “Bachakk! Taw chokkay tráshagá zabr ay bale é chokk ke pédág bit, tai janá cha taw bárt o wati mát kant o tai dap kawshá bit, hoshká nenday… o agan awali chokk bebit bachakké godhá petay nehrá chath dawr dant!”
O marchi ke may bachakkuá kamm o gésh do máh bayagá at, maná samá but ke nákuay maskará dán haddéá rást ent. Hamá ent ke chokk pédá bitag, Máhekán mani hayálá naent. Harwahd gón hamáiá gapp jant. Kandit gón hamáiá, waptag gón hamáiá, bass nán gón man wárt.
“Man petárá gosht ke nonnokay wástá nendagi gádhié byár gón,” Máhekáná mechókén nonnokay némagá pa mehr cháráná gosht.
Péshá é wadhén mastén mósomán ché ché nabut… bale ni á shahdén gapp o majlesáni jágah nonnokay nenadgi gádhiá geptagat. Man nonnokay némagá cháret. Á anchó árámá shir mechagá at goshay maná sóklu diagá ent ke bechár, man chón tai nehr dawr dátag.
“Nonnoká chiá chó rók róká cháragá ay?” Máhkáná pa dábé gosht.
“Taw anchó gappá ay goshay nonnok éoká taig ent o man áiay dozzagá atkagán.” Man bechkandet.
“Taw wa dozzé ay, anchó chárag cháragá mani del dozzet o bort.”
Chokkay bayagá pad é awali rand at ke á gón man wasshén wasshén gapp janagá at. Man cha tahtay sará pád atkán o shotán boná áiay kashá neshtán.
“Marchi shirkenén gapp janagá ay. Dege nonnoké lóthay zánán?” Man bechkandáná áiay chammáni tahá cháret.
“Dir á!” Áiá lajj but.
Man kandáná gón nonnoká gosht: “Adhay o shaytán! É pésará mani jan ent, randá tai mát ent. Sarpad bay? Hamá ent ke taw atkagay, é márá dapi josté ham nakant. Shábásh, ni wati chammán butth, man wati janá chokkán.”
Man gón nonnoká hór á goláésh kot. Nonnok wati o wati mátay sará charé nágatén oroshá delwárag but o dapy pach kasshet o gréwagá lagget. Máhekáná goshádiá watárá cha man gisshént o nonnokay sahdhénagá lagget o áiárá chokkagay eshkerén wáhag mani lonthán sóchán but. Maná padá nákuay gapp gir atk.
Hamé shapá ke hawr angat gwárán at, nonnokay bayagá pad awali randá man o Máhekán yajjáh bitén. Bale hamé wahdá nonnoká wassará wat chiwwalagé jat. Máhekán manigi nabut, goshádiá pád atk o gwánzgay chandhéngá lagget. Chandhénagá nonnoká bass nakot godhá Máhekáná méchént. Nonnoká gréwag bass kot o wáb kapt bale wahdé má padá yajjáh bitén nonnok padá shoru but o é randi na chandhénagá bassy kot, na méchénagá. Man norondhagá laggetán.
“Mátkos! Dege wahdá hecch nagoshit, bass hamé sahtá dapá pach kasshit. Del goshit mány borr ángor.”
“Alláh! Chó magosh nonnoká!” Máhekáná tawret.
“Hummm.” Man jawadháná domi kóthiá shot o waptán. Ni nonnoká panch meletthá grét o panch meletthá bétawár but. Baré Máhekánay názénkáni tawár atk o baré koppagáni. Yakk randé áiá nonnok baddhá kot o mani kerrá atk.
“Nonnoká bárén ché ent. Nazánán chón bekanán?” Áiay lonth lónján atant.
Man tasallá dát. “Hecch makan. É omrá nonnokáni kár gréwag ent o bass.”
“Bale péshá chó nagrétagy. Balkén wassh naent. Dáktaré nayáray?” Áiá bazzag bazzagá maná cháret.
Man thémb cháret o gosht: “Ni shapay do ent. Métagay dáktar wáb bant o padá hawr ent.”
Á gón delgráni shot. Nonnokay chiwwalag o chihánth kamm nabitant. Máhekán padá atk. É randi gréwán at.
“Dáktaré nayáray?” Áiá bass haminchok gosht o hedhekkagá lagget.
Man tawkal kot, parpath zort o hawrá récháná shotán. Métagay espetálay do dáktar atant ke chameshán yakké mani kwahnén sangaté at o eskólay zamángá mani hamjomáet bitagat. Man wa hayr dahá rand wánag yalah dát o petay doén dokkánán yakké zort o neshtán bale áiá want o dáktar but.
Man á cha wábá pád kot o áort. Áiá nonnok dawá o darmán kot. Sangatiay cháragy kot o pisy ham nazort o goshty ke bándá sohbá nonnoká espetálá byár ke sharriá elájy bebit.
Dáktaray rasénagá pad wahdé man atkán dán nonnok o mát hardo wáb atant. Man shot o domi báná waptán.
Sohbá mahlaw Máhekáná maná pád kot. Maná wáb sará at. Trondá trond jost kot: “Hán, ni chéé?”
Áiá gréwáná passaw dát: “Nonnok mortag.”
“Nonnok mortag?” Mani wábá bál kot. Man tattaráná dém pa gwánzagá shotán. Gón larzókén dastán gwánzagay démdár léthént o nonnok cháret. Goshay áiay bénurén dém goshagá at: “Ábbá! Ni man beh nagréwán.”
Cha mani chammán árs shép geptant.
Hamé shapá man wábé dit. Gendán ke nonnok zendag ent. Man o Máhekán nonnokay démá óshtátagén. Man nonnoká goshán byá. Á wati chappén páday chonki lankoká sendit o mani némagá chagal dant o wat mátay némagá rawt.
Man cha wábá godhetán, Ingor ángor cháret. Mahekán nepádáni sará naat. Á gwánzagay démá neshtag o gréwagá at. Man pád atk o áiay kerrá shotán, áiay árs pahk kotant, tasallá dát o áort o wápént.
Chizzé róchá rand dokkánay káréá man Karáchiá shotán. Do say haptag hamángor lagget. Wahdé padá atkán, nonnokay meragá máhé bitagat. Sarzáherá Máhekáná awali nonnokay bérániay gam wártagat o é degeráni wadhá zenday kárawáná gón at. Maná ham anchó samá but goshay har chizz sarjam ent. Hecchay kammi naent. Goshay nonnokay hájat nabitag. Goshay áiay jend beh nabitag.
Hamé shapá wahdé man o Máhekán yajjáh bitén, anágahá á goshay godhet. Pád atk o nesht o ingor ángor cháragá lagget. Man hayrán bitán bale gón narmi jost kot:
“Che gappé, Máhekán?”
Áiá gón arsigén chammé jawáb dát: “Mani góshán nonnokay gréwagáni tawár atk.”
Nágomán