Górich atkagat o pa morádé atkagén jambarán kerr kotagat. Mósomay é nágatén tábá dráh béwár kotagatant. Métagay pirterén mardom ballok Shushalá beger dán shakarwarnáén Sayláná dar á ke é gwandhén bázárá yakkén bachakk at ke shahrá dwázdahá wánagá at. Cha górichay nágománén oroshá haryakké nagég at bale kassá wati kár yalah dát nakot. Pameshká á zemestáni némróchá sobáragá rand haryakké górichay wadhá wati kárá dazgatth at. Saylán bánay tahá tahtay sará waptag o ketábé wánagá at. Bánay démi newáná rótábá lahté jenekk neshtag o god dóchagá at. Ballok Shushal rótábá tahtéay sará wati némsónén shálén cháderay tahá dokolkóch at. Ballokay masterén bacch Sádén ke ni másh o kanag at, yakkerrá neshtag o sád chópagá at.
Chágerdá górichay shikk shikk o sáday chópagay tawárá ábayd dege hecch chedhekká néstat. É doén tawáráni tahá yakkéay sázók abram at o yakkéay ensán. Doén tawár deger deger atant bale doénáni yajjáhiá anchén bédarwarén zémeré wadi bayagá at ke áiay eshkonagá Saylánay delá hamé delwasshén bale bépassawén jost pád atk ke áyá ensán ni abramay hamsariá kanagá ent? Chokk petay démá dar áyán ent?
Do say barán áiá ketábay wánag band kot o hamé jostay sará hayál kot bale hecch ásaréá naraset. Pameshká padá ketáby dastá kot. Górichay paymá nagég kanókén jostáni sará hayál kanagay badalá charé ketábá kessahay wánag washter at.
Sahtéá pad Sayláná drájén ginné kasshet. Ketáb yakkerrá ér kot o shálén cháder dán delbandá per dát. Áiá chó shálá báp o wasshén kessahé wantagat.
É kessah chón wassh ant. Esháni kárest chetawr delá poterant. Goshay may wadhá ant bale goshay cha má jedá ant. Áyáni zend, áyáni gapp, áyáni hayál… chónén lahmén dardé mánesh. Man agan kessahay nebeshtah kanag bezántén ballok Shushalay sará allamá yakké nebeshtah kotagat. Wati wáriay chónén chónén kesshán kárit. Warag káhok o pozzhu bitagant. Del pa máhigi gall o náhi gaddahgéá band bitag. Pocch éoká gwaray pashk bitag o bass. Shalwáré ham nabitag. Nepád o gandaláni badal maccháni lotth o puns bitagant. Eskól o Espetálay wa kassá nám naeshkotag. Goshay hazárán sál pésaray gapp ant. Bale na, é ballok Shushalay kasániay rástén gapp ant. Haw, donyá báz badaletag…
Áiá cha lógay darwázagá awalsará tahtay sará dokolkóchén ballok Shushalay o padá jenekkáni némagá cháret ke goday dócahgá delgósh atant. Wahdé é jenekk ballok bant ballok Shushalay wadhá wati kesshán kárant! Áiá bechkandet. Bale Kabgén pir mabát! Dáem hamé paym kasán o sharrang bát!
Áiay chamm kasánsálén Kabgénay sará óshtátant ke ni chokké naat bale janéné ham naat. Warnáiay bendát at o é wahd anchéné ke jánay band band o bahr bahr goshay cha karnáni wábá pád kayt o harkasá wati ágahiay hálá dant. Drostán gésh chamm naóshtant. Baré eshiá chárant baré áiá. Goshay kaséay shóházá ant. Anchénéay ke chabolén chammáni béárámiá ósht o árámé bedant.
Bale… é Kabgénay chamm chiá chest nabant pa mani cháragá? Yappaymá godá sakk ant. Pésará wa á godá gésh gón man delgósh bitag bale ni… Bit kant áiá pésará báz bará cháretag bale man wánagá delgósh bitagán. Haw, donyáyá delkasshén chizz báz ent. Anchén ke cha dóstay mastén cháragán ham washter ant.
Kabgéná kash o gwaray jenekkáni némagá dozchammi cháret. Harkas gón wati kóndhay godá gédh at. Áiay chamm bánay tahá Saylánay némagá shotant. Bétáhirén didagán dhikk wárt. Tonnigén lonthán bechkandet. Zerén deláni tahá wasshiay mastén chawl chest bitant.
Kabgénay chárag o bechkandag chetawr wassh ant! Saylánay del drikk drikká lagget. É wadhén delkasshén adá áiá cha kojá hél kotag? Pelemi jenekkáni o Kabgénay wadhén nawánendag o lógnendén jenekkáni náz o adá parchá yakk ant?
É ajabén yarrangiay hayálá áiay lontháni sará hayránén bechkandé atk. É nyámá Kabgénay chamm padá cha godá dir atkant o gón Saylánay chammán dochár kaptant o Sayláná wati bechkanday passaw raset. Kabgénay bechkand goshay áiárá goshagá at, taw sarpad nabay jenekkáni esrárán.
Nazánán dán kadéná tai chárag o bechkandag mani delá wasshiáni ázmáná bál diant? Sayláná ázmánay némagá cháret ke górichá gobár kotagat. Áiá hayál kot ke áiay del kángadhawé o Kabgénay mehr áiay bandikk ent bale áiá é ham zánt ke dinay tézén mánjá áiay delay kángadhawá cha Kabgénay mehray bandikká kojám na kojám sahatá trekkagá sest kant… Off, é din o setkáni jédhah. Drégatén man Zegrié biténán. Mani petá Nomáz makotén yá drégatén Kabgénay petá ham Nomáz kotén gón.
Áiá gón nagégi ketáb chest kot o béerádahi ketábay sará Kabgénay nám nebeshtah kot o Kabgénay pet náku Sádénay némagá cháret ke yakkajjá sád chópagá at.
É sád bozortén, páhuay mohrén lópé brestén o Zegr o Nomáz dratkénant. Ésháni bayagá nabayag… Ché goshay mani bánok? Áiá wati dóstén dóchgeray némagá cháret. Chammán padá dhikk wárt. Lonthán padá bechkandet. Goshay é randi Kabgénay bechkand goshagá at, taw sarpad nabay din o setkáni esrárán.
Hamé sahtá ballokay dhék ke balloká nám Katthag kotagat, cha némagé tacháná dar atk o dém paringor atk. Say chár páchen lóláráná áiay dombá at o á ingor o ángor cherri janán at. Wahdé ráhy nabut godhá gerdá gerd neshtagén jenekkáni tahá potert o ganter gatth but. Yakk tayárén páchené áiárá per setthet.
“Ubábi!” Haryakk jenekkéá cha lajjá kukkáré jat o wati démá geráná pád atk.
“Kecch mer kecch! Jenekkán, galléntant o sóchet bézátán, Katthagay sréná próshant.” Ballok kukkár kanáná pád atk o nesht bale tayárén páchenay gendagá érmósh but o narm narmá goshty: “Bale páchené shehmén dombáy. Dary kanet ákoshterá, chokkán! Belly yakk o do pády dant.”
Jenekkán cha wati kerrá pas galléntant bale hamé hadhá hodhóá yakkéay sicchen gár but. Yakkéay addh kotagén sákólah pasán bort gón. Yakkéay goshán pasáni kánthán dert. Náku Sádéná ham yakk baré hamingor cháret. Kandagé jaty o padá sáday chópagá lagget.
Saylán é nedáragay sará bechkandagá at. Genday mardom pasáni wadhá bitén, tamáshahé at. Harché delá lóthetén, kotagat. Bale man chón saggetagat ke Kabgén… o áiá samá but ke é ensánay ópárá dhannén káré.
Jenekk angat wat mán wat halwat kanag o kandagá atant. Ballok Shushalá jenekkáni kandag o halwat wassh nabitant bale ópáry kot. Jenekk angat kandag o halwatá atant. Balloká watá dásht nakot.
“Shomárá lajj nakant, jenekkán! Kandag o soksok shomárá dege delé wassh bit. Kréhi godesh kóndhán ant, dhakké najanant, neshtag kethi kethi kandant.”
O jenekkáni kandag o soksok hamá damáná óshtátant.
Sayláná ballokay é gapp bucché ham dóst nabut. Ballok tayár ent kódekén jenekkáni sará bélajjiay bohtámay bandagá. Wat zánán pésará anchén jenekké nabitag? Hamé wadhén nedáragy naditag? Hamé wadh kandag o maskaráy nakotag? Nazánán é ballok piriá parchá kánthién pársá jódh bant? Bárén Kabgén ham ballokiá anchosh bit?
Áiá gón jostigén chammán Kabgénay némagá cháret. Chammán dhikk wárt, lonthán bechkandet… Taw sarpad nabay ballokáni esrárán. Goshay Kabgénay bechkandá passaw dát.
Ajabén gappé. Sayláná pa hayráni hayál kot. Harwahdá ke man anchén hayáléá bán, Kabgén maná chárit o bechkandit o goshay áiay bechkand gapp janant. Marchi wár kanán goshány gón. Á ham hayrán bit…
Saylánay chamm padá dhanná Kabgénay némagá shotant. Padá áyáni chamm dochár kaptant o lonthán bechkandet o padá goshay Kabgénay bechkandá mánáé hast… Taw sarpad nabay bechkandáni esrárán.
“Mééén, mééén” paséay dódagay tawár atk o balloká damáná gosht: “Hán! Kapteray tawár ent.”
Kapter Kabgénay mát Teléhánay getáchay nám at. Áiá wati wahrén getách náku Kolánay babbarién páchenay kerrá bortagat ke shenekky babbarizádag bebant o shir o shenek hardo géshter bebant.
“Jenekk! Taw dér kotag. Kaptará yakk o do pády dát?” balloká cha wati neshárá pajjiá do jost kot.
“Haw. Pádé dáty. Bándá padá barány.” Áiá getách káparay dárá bast. Dém gón Náku Sádéná kot o darráént: “Mayár atkagat.”
“Hmmm, che hály kot wati damagay?” Nákuá sád chópáná jost kot.
“Badén hálé koty.”
Dráh delgósh bitant.
“Séth Kamáláná do mardom koshtag.”
Cha Saylánay dastá ketáb lagosht. Jenekkáni sicchen óshtátant. Ballok pád atk o nesht. Nákuá sarchóp chest kotagat bale sáday sará janagay badalá sobakk sobakká bonchópay sará éry kot o Teléhánay némagáy cháret.
“Mardom kay bitagant?”
“Yakké áiay jenday janén Zarokk bitag o domi dege bachakké. chó bitag ke payri Séth pa káréá shahrá shotag. Dóshi ke wátarr kant dán gendit ke Zarokk o bachakk yajjáh ant… Godhá watásá kasshit o doénán jant.”
“Hawwww!” Balloká drájén hawé kasshet ke áiay tahá hayráni o torsay hamráhiá deljami ham mán at. Goshay ballokay “haw” goshagá at ke choshén káráni ákebat báyad ent hamé bebit.
“Séthá wati awali janén hapógi kot o hamé gept o é bénangá wati dém syáh kot. Sharr, godhá hál nakanant ke bachakk kay bitag?” balloká jost kot. Dege kassá zukkag nakot.
“Bachakk Sabzal bitag.” Teléháná passaw dát.
“Sabzal? Kojám Sabzal?” Balloká gir nayatk.
“Sabzale Kénagi. Hamé bachakk genday wati neshtagén goháry gón bachakkéá dit o doény gón tapará dhakki kot o koshtant.”
“É Sabzal?” balloká cha hayrániá kukkár kot. Áiá Sabzalay é kár sharr yád at o modám sádháty.
“Haw, truá! Hamé Sabzal. Degeré choshén káré kant, koshanty. Padá wat tarrant hamé wadh kanant.”
“Hawwww.” Balloká padá drájén hawé kasshet. É haway tahá bé ke béwáriá dege hecch mán néstat. Ádege bétrekk o tawárá hamé hóshbarén hálay sará hayál kanagá atant o Teléhán wati dóstigén getáchá lóthoké káh démá diagá rand lóhigay ápán kenzénag o áiay nazzikterá kanagá at.
Anágah, pahk anágah Sayláná é hayál atk goshay é gapp pésará ham bitagant. Ballok, Náku Sádén, Kabgén, édege jenekk o áiay jend… dráh hamé wadh hamé jáhá nendók bitagant. Hamé paym górich bitag. Hamé dhawl Teléháná Séth Kamálánay dastá Zarokk o Sabzalay koshgay hál áortag o hamé dhawl dráh nagég o hayrán bitagant. Harché ke anni bitagat goshay pésará ham chath hamé wadh áiay démá gwastagat.
Bale yakk mardomé do barán chón koshag bit? Charé gappá áiá báwar but ke é bass gárén hayálé bale… bale áiay delá é mohkamén máresht ham hastat goshay é dráh pésará bitagant. Á ajabén kasshánchilléá kaptagat. Á haminchok hayál kanán at, haminchok áiá báwar bayán at ke é bitag o gwastagén gapp ant. Haw, é pésará ham bitagant. Yakk randé na, hazár randá, béhesáb randá, cha karnáni karná…Sayláná ketábay sará Kabgénay nebeshtagén nám kór kot o padá nebeshtah kot o áiay némagá cháret… chammán padá dhikk wárt bale é randi áyáni didag hórk atant o cha lonthán bechkand gár atant.
Nágomán