Kóhe Moráday zyárat kanagá rand Zegriáni é kárawán sepat o chawgán janáná dém pa wati halká wátarr bayagá at. Say bas o hasht pikapay é gwandhén kárawáná laywizay gáth ham gón at. Laywizay yakk gádhié sará at o yakké randá. Éshiá abayd ráhá jágah jágah yakk o yakk sepáhigé ham óshtók at.
Pésari sálán zyáratay wahdá ke har sál 27 Ramzáná kapit, molláyán Zegriáni kárawánáni sará tirgwári kotagat. Kóhe Morád o Zegri péshwáyáni bázár Kallag Koláchay sará bamb o thóp chagal dátagat. Chizzé bérán but o chizzé thappi. É sáli molláyán padá bihár dátagat ke Zegri zyáratá mayáyant. Agan káyant godhá harché bit zemmawár wat ant. Pameshká é randi sarkáray entezám trondter atant o daningah hecch nawasshén gappé nabitagat.
É gwandhén kárawán démá kenzán at. Pikap démá atant o bas poshtá. Basáni tahá janén o chokk atant o chattá mardén. Haryakk gádhiéay mardom wati wadhá sepat o chawgán janán atant. Tahá janén wati wadhá Hodá o Mehdiay tawsipá atant o borzá mardén wati wadhá. Rand randi basay tawár cha drostán boster at. Bachakk o machakk wa géshter kukkár kanagá atant. Yakkéá sadáé dapá at:
“É sálá má zyárat kot,”
o endege gón borzén tawáréá jawáb diagá atant:
“Démay sálá yá kesmat!”
Bale basay chattá neshtagén á warná bétawár at… Yá kesmat? Á sadáay labazáni sará hayál kanán at. Kesmat parchá? Ni zyáratay ellók o naylók kesmat wa naent, chizzé mardom ant. Báyad ent é sadá chó bebit:
“É sálá má zyárat kot
Démay sálá yá mollá!”
Á mátá pa zóré zyáratá áortagat gón. Agan na áiay hecch erádah naat. Yakké wa mátá hamráh néstat o domi mátá adhi kotagat ke Sayláná lázom barán gón ke beh zyáraty nakotag. Agan na godhá man ham narawán.
Pameshká á nákámén delé mátay hamráh but. Áiá nalóthet ke é randi ham mátay delá ranj bekanán. Áiá aiday hamá shap angat yád at. Mátá gosht boraw Zegrá, o áiá Zegr o Nomáz o donyáay kollén dináni helápá wáz shoru kot. Náwánendagén mát áiay gappán sharriá póh nabut bale inchoky zánt ke din o setkán ér janagá ent. Á bazzagá awalsará wa hayrán hayráná wati warnáén bacchay némagá cháret o padá arsy retkant. Sayláná samá but ke aiday wasshén shapá, gón mátay delay kahr kanagá áiá sharr nakot. Áiá mát goláésh kot o wasshán kot o dém pa Zegránahá shot.
“Adhay, taw chiá sadá najanay gón Saylán?” Sangatéá áiárá cha hayálán dar kot. Ched o pésar ke á jawáb bedant degeréá gosht: “Zyádahén chawgánán gotthy shotag.”
Drostán dapay sadá yalah dát o kandagá laggetant. Ched o rand kóchrái o maskarái bongéj but.
“Á molláé!” yakkéá kukkár kot.
Drostán chakk jat. Yakk espétén haré dhannay sará óshtátagat o áyáni némagá cháragá at. Drostán prisht kot kandag.
“Makandet, bamb jant,” degeréá kandáná gosht. Yakk baré padá kandag o kukkár but.
Áiá ham kandag atk. Áiá hayál kot ke mollá turi har dinay bebant, chó hará srombchár ant. Esháni kerrá harchizz cha diná bendát bit o cha diná kotthit. Bazzag nazánant ke din pa ensáná ent, ensán pa diná naent. Din óláké, é basay paymá. Anchó ke bas mardomá cha yakk jáhéá domi jáhá sar kant, hamé paym din emróz dán baheshtay ólák ent.
Bale marchán goshay din panchar ant, ayrlák ant yá enjenesh haráb ant. Gádhi ke haráb bit ostád o kelindhar áiá chondhant. Agan áyáni dastá addh mabit mesteriéay kerrá baranty bale… bale é din, é kalandhén bas ke haráb ant, ráhay némá óshtátagant, kassesh addh nakant. Mardom ham sawár ant. Dheléwarán sokkán dastá ent. Drostáni hayálá bas rawán ant bale asalá óshtátagant o beh menzelá sar nabant.
Menzel pa menzel
Wájahay makámá
Mardomán gapp band kot o hamé sepat dapá kot chiá ke bázáré nazzik at. Wahdé gádhi bázárá ér kaptant, raptáresh sost kot. Yakk némagé lahté gwandhu óshtátagat. Kárawánay har gádhié ke áyáni kerrá gwast, dádesh kot o sepat o chawgánáni passawesh dát.
Áiá dád kanókén zahgáni némagá cháret. Chón jóshá ant é gwandhu. Kódekán! Shomá chiá dád kanet márá? Má che zahm jatag? Kalandhén bas wa angat némráhá óshtátagant o cha má kass áyáni addh kanagay soddá naent.
Áiay chamm dád kanókán kammé passend gwandhuáni dege rombéá kaptant ke kárawánay gádhián panch diagá atant o kukkárá atant:
“Káper káper, Zegri káper.”
Kay káper o kay mómen? Paygambarán nazántag, shomá chón zánet kódekán!
Anágahá cha panch diókén zahgán yakkéá sengé mán borret ke rand randi basay pachén kánchéá potert. Janénéá chiwwalet o padá basay mardomán dapay sepat yalah dát o “káper káper, Sonni káper,” goshagá laggetant.
Domi némagá dád kanókén zahgáni rombá ham anchén nárahé dapá kot o bérán yakkéá sengé panch diókén rombay némagá chagal dát. Padá doén romb yakké domigay némagá dhók mán borragá laggetant o har chagalay pajjiá záhé ham shot gón.
É lempién zahg róché tangawén warná bant bale harábén basáni addh kanag yá mesteriay kerrá baragay badalá wat mán wat kosht o kósh kanant. Gázi bant, shahid bant bale harábén bas beh sharr nabant. Hamedá óshtant. Róch, máh, sál o karn padi bant o kalandhén bas gón dalwatén sawárián rézant o hákán hawár bant.
Áiá cha hardo rombán chamm thagaléntant o démá cháret. Démay gádhi kaccháén sadhakká danz o ditt kanáná rawán atant. Anágahá áiá hayál atk goshay é ditt o danz kalandhén basánig ant ke mosáperán karnáni karnay nendag o cháragá rand pa zahr bon dátagant.
Bale é tahná áiay delay wáhagé at o mardomán angat hamé sepat dapá at ke
Menzel pa menzel
Wájahay makámá
Kárawán ni cha bázárá dar atkagat pameshká gádhi tézter bitant. Áiá yakk baré padá hardo rombáni némagá cháret ke angat yakké domigay sará dhókshániá atant.
Nágomán