Á wati shahrá éok at. Téwagén shahrá dege kass nést at. Áiá éoki wassh butagat. É shahrá dege kass ábád naat, áiá abayd. Shahray jalwah o nedárag anchó delkassh at ke mortagén del bód kant. Har némagá shirkenén ápay kawr o ju tachagá atant. Bág o bágichah sabz o ábád atant. Har tahray morg, dalwat o jánwar é shahrá hast at. Abramay delkasshén nedáragay hamráhiá mósomay hesábá é shahray badal nést at. Harróch shahray yakk na yakk kondhéá jambar sáhél atant o hawr gwáragá at. Harkojám sharri o zébái ke yakk shahréay wástá allami ent, á chizz é shahrá hast at. Á é shahray yakkén wáhond at. Áiárá éokiá hechbar bétáhir nakotagat o á wati éokiá sakk shát o gal at.
Yakk róché áiá hayál kot ke cha hoshkén nendagá náay gaddhag kanag gehter ent. Chizzé na chizzé kanagi ent. Godhá ché kanagi ent? Áiá chort jat ke anchén káré kanagi ent o anchén chizzé maná sázagi ent ke mani shahrá angat nést ent. Bale mani shahrá wa har chizz hast. Kojám chizz ent ke pasht kaptag?
Yakk baré padá hamé sawadhagá but. Bázén pegr o jedhagán o shahray gard o saylá pad, áiá máret ke mani shahrá wa har chizz hast ent bale agan yakk chizzéay kammi ent, á “bot” ent. Bezán áiay shahrá bot nést at o dege harché hast at. Áiá paysalah kot ke man jwánén, borz o boland o mazanshánén boté thahénán. Áiá shahray zebáterén o sabzazárén o bosterén tholléá mazanén drachkéay kashá ke dege hecch nést at, shot o mazanén sengé ér kot o botay tráshagy bená kot.
Máh o sál gwastant o á gón hamé sengén botay addh kanagá moshkul at. Yakk róché áiá máret ke bot tayár ent. É borz o bolandén báraband o shépagpónzén washrang o dhawldárén jenekki boté at ke tayár at.
É botárá baniádami anchén rangé jaty ke chó ensáná but o kassá ham pajjáh nayáort ke é asli ensáné yá boté. Eshiay gwar chó pollá sraptagatant o pádáni shamá goshaygá bénag petthagá at. Eshiay lontháni sará anchén bechkandé sahrá bayagá at ke cha téwagén shahrá zébáter at. Eshiay chammáni tahá goshay ométéay donyáéá wati bándátay rozhnáén saparé bendát kotagat.
Áiá bot cháret, ta wat hayrán o habakkah but ke é chéé ke man sharr kot. Áiá bésah nést at ke é rangén dhawldárén chizzé jódh bit. Áiá jédhet ke é dhawldárén bot ke edá éok bebit, jalwah nadant. Eshiay kashá dege yakk boté thahénán ke belly do bant. Áiá dege hamé kadday sengé áwort o dege botéay tráshag bená kot. Máh o sál gwastant o é bot ham tayár but. Doén bot yakké domiá sakk nazzikk atant. Domi bot ke tayár but ta é mardéni boté at.
É botáni jódh kanagá pad, á sakk gal o wassh but ke nun mani shahr dhawldárter ent. Hamá chizzay kammi ke butag, nun sarjam ent.
Yakk baré padá á wati shahray sayl o nedáragá dar atk. Shahr sakk mazan at o dér gwastagat ke á gón é botáni tráshagá dazgatth butagat. Áiá shahray sarjamén saylá yakk haptagé lagget. Haptagéá pad wátarr hamá jáhá atk ke ódá áiá bot sharr kotagatant, ta hayrán o habakkah but… seng o syáh but… doén bot edá naant…
Yakk baré padá téwagén shahry gólet ta é botáni hecch jágah sój nést at. Á jédhagá at ke é shahray chárén kondh band ant, shahrá áiay hogmá abayd na kasé potert kant o na ke kasé dar atk kant. Gón hamé jédhag o wazwásán, áiárá maróchi awali bará kóchandhagá gept o á, bágay sártén sáhegéá wáb kapt. Cha wábá ke bosty kot, áiay nezzá mazanén sáhaté gwastagat. Chammy pach kotant ta syáh o tahárén zendánéá bandig ent. Á jédhagá at ke ché bayagá ent? Mani hasti o donyá é rangá badal bayán ent. É chónén esráréá maná geptag.
Damánéá pad zendánay yakk darwázagéay pach bayagay tawár but. Zamziláni zhelikk zhelikk at. Kasánén rozhnáié thembán at. Do kas áiay némagá pédák at ke cha durá áyáni dém gendag nabutant. Nazzikká ke sar butant, ta téwagén zendán rozhná but. Áiá é ke distant, hoshk o hayrán but. Chéá ke é hamáiay jódh kotagén doén bot atant ke áiá gón wati jenday dastán jódh kotagatant.
Nun áiá yát atk ke man é bot hamá drachkay kashá jódh kotagatant ke é drachkay sárti o wazhbu harchéá belaggit, áiay tahá zend, agl o dánesh wadi bit. Bale nun… Báz wahd gwastag o layb cha áiay dastá shotagat o é shahray wáhond hamé bot butagatant ke wati jódh kanókay námá hákemi kanagá atant. Har charend o parend, sahdáresh wati tábeh jódh kotagat o aslén wáhond yakk tahárén zendánéá band at o cha pashómániá bashbash waragá at.
Eltáp Balóch