Sawdágerán náhakk jatag
Sawdá mani Órmádhahay
Sawdá mani kóh o zeray
Sawdá eday máhigeray
Arson nadárant didagán
Del dut kant wahdé mani
Chárán golén Kóthongiá
Gendán wati man gongiá
Lógá wati bandán kojá
Nést ent maná chondhé zemin
Sawdá tagárlápán jatag
Méd o golén malládhiay
Sawdá hamok Órmádhiay
Mekk ant mehel Sonthay sará
Gréwag mani lonthay sará
Ásá kojá gozhnay koshán
Man chó zeray chawlá proshán
Morbah, madag passháriá
Distag modám man sáriá
Chokkáni chamm chárag nabant
Katth ke mani warden nabit
Zamzil jatag nyámag zerá
Harchi mani dastá shotag
Sawdágerán náhakk jatag
Sawdá mani Órmádhahay
Chell o Karód, Dabbandiay
Sawdá zabádén kandiay
Man bazzag o man béwas án
Gár án wati jenday dhasán
Lashkar Yazidi atkagant
Sarpad nayán man bólián
Thélag ke sakk ant angatá
Sáhay mazanlambén cheshán
Tákay sapáén kahchará
Ballay tarashtén mádhiá
Pollén Basólay Sonthsará
Ji bát hamá dawr washtabén
Ji bát mani pirén petá
Sénag zeray dertag goshay
Kash(e)tag padá ám o warók
Moshku hamé Sélándiay
Márá wadár pa mósomay
Wazhbahtiay pollén neshán
Keshtag mani méróz golá
Chángálay yátán kaptagán
Haw dhay Salim gálán bedár
Gál tai nakant kassá asar
Harchi tai dastá shotag
Sawdágerán sawdá jatag
Salim Bazzag
