Kaypay gappá kanay, eshkay námá geray, jang bendát bit
Dard nóshay tá kad, wáb chincho gwapay, jang bendát bit
Zémerán gón chamay, yá gón nakshán balay, jang bendát bit
Ezmay zébáiay dámoná neshtagay, jang bendát bit
Ach kayá jestagay, taw wati bátená, pólagá ay kayá
Nun taw bálay delá yá cherágá koshay, jang bendát bit
Jang bendát bit gón malárán wati dast o dróté bekan
Wáb genday agan dard máná kanay, jang bendát bit
Jangay mósom ke bit zerday béchádhiá, wahday názorkiá
Kágadéay sará ham nebeshtah kanay, jang bendát bit
Kessaháni hatam dahray damkán gwazit, ás báhand kant
Zémeray mehlabá wahday jigá moshay, jang bendát bit
Selkén waswáséay dámoná gón adhay, jang bendát bit
Jédhagáni wati ázmáné gwapay, jang bendát bit
Zend dáwáé sáchány kortag drahén halk o dhann o damag
Taw agan mortagay, taw agan zendag ay, jang bendát bit
Máré bit shép gipt, jengoléay wadhá nágatá bál kant
Taw kabassay tahá kammokén ham soray, jang bendát bit
Man ón rad kaptagán, taw ón rad kaptagay, dard ásar nabut
Man padá rad kapán, taw padá rad kapay, jang bendát bit
Jang bendát bit wahdé chammay tahá shunz bandit gamé
Taw ke aksay wati cháragá dam baray, jang bendát bit
Tors pa tálehá esparé ta naent, jang zébáié
Kass salámat mabit, taw malámat mabay, jang bendát bit
Jangá sar geptagay cháragá ant tará zik o bándát may
Yakk damáné ón taw chammán andar bebay, jang bendát bit
Kadde éshán nabay, é cherettán Monir zémeréntag shapé
Yár gappé bekan, incho hámósh bay, jang bendát bit
Monir Mómen