Báz wahdá delá goshtag ke gón taw hál o ehwálé bekanán, balkén del inchoká émenter bit bale gón taw dém pa dém bayagay háthig nabitag.
Mani hambal! É nemdi Jattáni bázárá chágerd kant. Tai rawagá pad Jattáni bázár porsig ent. Harkas ke gón taw nazzikk bitag yá tará zántagy áiay arwáh béchádh o abétk ent.
Maná bázáray démá gwazag abétk kant, baré gwazagay tawkal nabit o baré bázáray némagá chakk jat nakanán o baré baré chamm cha mátay lóg o kápará nathagalant dán gwazán, hamá sártén sáhag ke ódá may yát pasht kaptagant! Baré hayál o jédhagé sar kasshit.
Man 5 Agastay róchá bayán kot nakanán! Man awali randá yakk téwagén bázáré chó áh o záriá ditagat. Gréwag o chiwwalag at. 3 o 4á ke bód kot tán gendán ke dege 5 o 6 tost. Yakkéá áp per réchay o ger o dár kanay, degré béhósh bit. Goshay záná tai bázáray sará ázmán kaptagat!
Hamé paymén mótk o zárié may métagá Bázizay margá bitagat ke maná kalahoké yát kant, bale tai rawagay á 3n rócháni bayán kanag mazanén háthig o saggé lóthit. O gón man na mátay kessah bit o na Wájok o Sabránay, o na Shahmók o Wahiday… Cherág o Jám wati kessahán shatter áort kanant.
Hambal! Tai rawaga pad man óda awali aid ditagat o lahté sir o sáng. É wasshiáni róchán harkas wati béchádhén delá bésóbén bechkandagé wadi kanagay johdá at. Kandag o maskará ham hast at bale béchádhiay jambar har gwará sáhél atant.
Adhay! Nazánán taw sahi ay agan na, Mohebb o Ostád Sharipá ham sir kot. Mordani ent may delá nagosht borawén! Bale má cháret Mohebb hambalé o addá Hamidah ham máté… godhá man o Samin shotén. Sir at, warag o charag at, tach o ták at. Sáz o zémalay tawár o mardománi kandag o krishtagán bazár sará zortagat. Haiyá pa deh at, bale é jahká jikkay tahá bázené bétrekk o tawár at, o má bázén arsigén chamm o molurén démé ham dit! Má johd kot k may andaray máresht o hayál záher mabant bale goddhigá má Sabrán dhikk dát godhá bésób bitén!
Lapshag! Náku Bóru tai némagá atkag! 5 Joláiá bérán but, nákuá dar géj o hardé ke taw wati halán dayay godhá maná nákuay halán allam beday gón, o nákuá mani némagá bagalé báré salam beday. Nákuay margá maná tawrént bale sharr ent, ódá tará washter bi o náku kamásh at, cha eday azábiá rakket!
Raup! Hál o ehwál báz ant. Tai zahir o tránag modám márá gón ant o tai rawagay dard wa bayán nabant!
Yakk wasshén hálé dayán k tai námá métagá ketábjáhé jódh bayagay chen o lánch bayagá ent. Sangat o dózwáhán johd kotag o cha sarkárá ketábjáhé geptag, o bázén mardoméá ham paré kárá komakk kotag.
Hambal! Dege wahdé padá hál bit. Yakk baré wassh ent. Wati hálán zitt dém day ke márá sakk zahir kant. O agan bit kant, wati kandagé allam dém day. Dóst bay, Lapshag!
Amán Habib