Thél o Gaysay Shóház

Amrikah Balóchestánay kojám kojám damagán thél o gays shóház kant? Amrikahay sarkamásh Dhónáldh Thrampay é járá pad ke Pákestáná thél o gays shóház kanagay wástá Amrikah o Pákestáná sawdáé jatag, Pákestáná Send, Panjáp o Haybar Paktunwáhay nám mán médhiáyá eshkonag bayagá ent bale Balóchestánay námá kass geragá naent.

Bale médhiáyá é dháh o shór angatá bass andázah janokái ant, rást o pakkáén hál hecch némagá nést.

Godhá rástén hál ché bit kanant?

É dargatá angatá é zánag nabit ke é kárá kojám kampani kant bale gomán esh ent ke é kárá Yu.Em.Si (UMC) Pethróliam Kárporéshan wadhé na wadhéá allamá gón bit. É hamá kampani ent ke eshiá 1997 dán Mai 1998á Balóchestáná Passeni o Gwáderá zerá do jáhá kár kotag . Passeniay zerbárá cha Gwáderá kesás 60 mil dir zerá o Gwáderay zerbárá cha Bátélá kesás 5 mil dir zerá. Passeniay kár 90 darsaday kesásá rasetagat o Gwáderay kár kesás 20 darsadá at ke 28 Mai 1998á Pákestáná Hendostánay aythami chakkás trákáni jawábá aythami trák kot. Amrikahá charé trákán bad bort o Pakestánay sará pábandi jat. É pábandiáni sawabá Yu.Em.Siá hawár Pakestáná kár kanókén Amriki kampanián wati wati kár wayl kot o shotant.

Ni ke kesás 27 sálá pad Amrikah padá thél o gaysay shóházá sar geptag, é gap allami ent ke Yu.Em.Si pa wati násarjamén káráni sarjam kanagá padá kayt. Pa padá áyagá é kampani wati Pákestáni sharidáráni (Madihá Lódi o édegeráni) hobdár ham allamá bit.

Bale ni jáwar badal bitagant. Ni Gwáderá Pórthé hast o Amrikahay masterén tejárati dozhmen Chin Gwáderay tejárati chest o éráni wájah ent. Eshiá abayd ni Balóchestáná mazanén syási jonzé hast ke géshter selahbandén warnáyáni dastá ent. Choshén wahdá Amrikah bázén janjáláni démpán bit kant.

Agan Yu.Em.Si yá ádeger Amriki kampani pa thél o gaysay shóházá Balochestáná atkant godhá géshter gomán hamesh ent ke tyáb o zerá kár kanant. Chareshiá yakk dege adhé ham pád atk kant ke é zer kaig ent? Balóchestánay yá wapákay? É dargatá wapáká cha pésará kánudsázi kotag. É kánuday redá tyáblambá beger dán 12 milá zer subahayg ent o dirter wapákay. Balóch cha bendátá é kánudá namannant parcháke é kánudsáziá ham Balóchestánay razá gón nabitag.

Ayn Káder