Dahray chammán cha darámad bitag
Hast kassé ke napahmit shahrá
Del pa déwánagi andém kotag
Nun é réthái nashahmit shahrá
Man ke é dámonay tárán chárán
Ars pólengé, jetái dágé
Wahdé estál shapán bost kanant
Del goshit wábé bozur o dar kap
Jenday kótáhiay dardá kamm kan
Róshenén dábé bozur o dar kap
Chó mabit ke watá tahná bekanay
Ars pólengé, jetái dágé
Lahté morg ant ke katár ant sohbá
Mótk o záráni tahá sawt goshant
Bézobániay malárán nóshant
Chammán chárant o delá sawt goshant
Taw ón béwánkiay danzán pahk kan
Ars pólengé, jetái dágé
Gwátay hamráh, cherágán daz ger
Gongén aksáni tawárán bar gón
Andaray mósomay repká dar bar
Bátenay sabr o karárán bar gón
Chó mabit randá pashómán bebay
Ars pólengé, jetái dágé
Hardén cha sáhegá pésar káay
Shahray diwálán wati borz bekan
Taw mani bátenay drachkén bálád
Sabzokén thálán wati borz bekan
Chó mabit jenday delá grán bebay
Ars pólengé, jetái dágé
Wahday hákóthá ke harchi gár ent
Kass wati kandagán dar gétk nakant
Anchén hámóshié chammán waptag
Del wati gréwagán dar gétk nakant
Chandh tahnáiay danzán Armán
Ars pólengé, jetái dágé
Hálek Armán