Shawk o tázagén polláni bu cha dokkáná dhann daggay kerr o kashán mán gwátá shengetagat. Nazzikay áshkáldáná cha lahtén sestagén golábi pollán, ke kaséá roptag o rétkagatant, ón wasshén bué dar áyagá at. Áiay chapp o chágerdá poll pa gechéné yajjáh lóthok kotagatant. Áiay polláni gechéni námdár at. Cha durá kaséay chamm kapt, á allamá pa jostá dokkáná atk.
“Tará bale é selbuén métagá saynth o antaray zalurat naent genday?” Jenekkéay jostay passawá áiá éoká bechkandagé jat.
Hamé ke nazzike bángwáh but, Samir cha wábá jah serret o zut zutá mazanén bágay keshká rahádag but. Nazzike ródaráiá á bágá sar but. Ódá ón hamok róch yakké áiay wadárá gón pollán neshtagat. Samirá hamé ke cha pollán porrén cháder kópagán kot godhá gón bechkandé josty kot.
“Golábay polly mán?”
“Adhay haw. Man zánán tará bé golábá nabit.”
“Mani hayr ent, mardománi taw zánay lóth ent.”
Padá á bechkandán dém pa shahrá jahlád but. Dokkánay málek ón hamok sohb dokkáná atk, zikén róchay hesábay randá o nókén polláni cháragá ke kojám kojám poll áortagant o kojám nehádá. Áiá gón del o setk poll yajjáh kotant o lóthoká polláni dastag addh kot.
Yakk shapay hamá jenekk bázárá gwazagá at. Áiá dist pohlay chérá kechraháni bándhomay kashá yakk dertagén sháléay sará poll bahá kanókén bachakk waptag o áiay kashá golábay yakk sháhé gón golábay pollá ér ent.
Andalib Gechki