Sherisshay bazén sáhegá górpátay sará neshtagén janén jédhagá ent.
Sherisshay polláni wasshén bu mán gwátá átár ent. Borzá sháhéay sará kolié neshtag o choli choli kanagá ent. Cha durá thektheray thaypá Balóchi sawtéay tawár bázárá tálán ent. Kochekké cha sherisshay sáhegá kammé passend káparay proshtagén menokkay boná waptag o lettheká sorénagá ent. Bé kampánén lóg ant. Lógáni myáná chérkeshké gwazit o dém pa bázáray némagá rawt.
Nókbarótén warnáé chamé chér keshká gwazán o cha sherisshay sáhegá kammé hamá dém ent. Janénay dém gón nókbarótén bachakká ent. Bachakk sost sostá rawagá ent, janén áiá anchó rók róká cháragá ent goshay áiay gámgéján hesáb kanagá ent.
Á jédhagá ent ke mani zendagi chó hamé bachakkay sostén gámgéján ent, ná zutt menzeléá sara bit o nay poshtá wátarr kant.
Dóshi áiá ajabén wábé distagat. Chónáhá áiá har wahdá wáb distagat ta áiay wáb némbondag butagatant , hamé ke á wábáni ásará rasagi butagat ta á cha wábá godhetagat. Dóshigén wáb paráiá yakk némagé takánsar kanókén wábé at o yakk némagé portáhir at. Hamé wábay ásar at ke paráiá jédhagáni daré botkagaty. Ched o pésh áiá ná jédhag zántagat o nay áiá pa jédhag o pegr kanagá moh rasetagat. Áiay zendagi bass cha wati kalandhén báná bendát but o lógay péshgáhay chapp o chágerdá per tarráná dán padá kalandhén báná shap kapt.
Á jédhágá at ke mardomay wáb parchá némbondag bant? Mardomay wáhesht o tamáh parchá sarjam buagá pésar sáh dayant? Mardom parchá wati wáhagán daste wat kall o kasárat kanant? Mardom parchá wati rozhnáén zendagiá taháriáni kórchátá chagal dayant? Zendagiay tahárén kórchátá kaptagén mardom parchá pa dar áyagá sar o pád najanant? Mardom parchá pa degeray zendagiay télánk dayagá wati jenday lóth o wáheshtán zendah dargór kanant?
Á jédhagá at ke man parchá zendag án?
Pa watá yá pa degeray rócháni gwázénagá? Á jédhagá at ke bézobánén mardom parchá zobán naródénant?
Á jédhagá at ke mardom parchá gongén zobánáni andará chér tarretagén oppárán nazánant?
Nókbarótén warná gesar kaptagat o áiay pádáni pad pasht kaptagatant bale áiay chamm angat hamá keshká sakk atant ke nókbarótén warnáay pádáni pad kaptagatant. Koliá cha sherisshay sháhá bál kotagat o Bégam Jangiay lotthay sará neshtagat. Kochekk cha káparay menokká pád atkagat o áiay nazziká atkagat o gón sherisshay bondhá wati baddhá gwarmósh dayagá at.
Cha kanwariá hiránáni kothing kathángáni tawárá zánag buagá at ke róch némróch ent. Angata áiay jédhagáni dar nabotkagat ke cha kanwariá pirén janénéay tawárá áiay jédhag némbondag kotant:
“Byá jene, taw sohbigén ent sherisshay sáhegá méh jatagay, wati mardá bebar pasillá ábdasté kanáén o byá ke kanwaray wahd ent.”
Áiá jédhet ke drégatén man nókbarótén warnáay randpadán boshoténán.
Enám Razá