Mani Ostádi

Dán dwázdah pás kot, man nazánt ke ché bwánán o Ep Es Si (F.Sc) kanagá pad ché ché wánag bit! Pa nakl Ep Es Si (F.Sc) pás but bale bézarriá man démá want nakot godhá métagá atk o práeweth eskóléá gwandhu wánént. Engrézi kammo jódh at pameshká sangatán wati eskólá jágah dát.

Wánagjáhay mókal atant. Ottalá shotán tarragá, hamódá ke man Ep Es Si (F.Sc) kotagat. Yakk shapé Dr. Shoaybá nám gept ke Ottalay Dáneshgáhá eskálarshep hast, agan taw wánay. Awalsará maná toshé ham wánagay hayál nayatk. Dáktará maná zór dát ke bwán balkén eskálarshep rasit. Man dán dérán jédhet o paysalah kot ke wánán o johd kanán ke eskálarshep berasit.

Sohb but man gosht wánán. Bégáhá man Dr. Shoayb o Dr. Majid distant. Wájah Kaiyum ham gón at. Wájah Dr. Gol Hasanay lógá shotén. Wájah Gol Hasaná gosht anni márá 5 eskálarshep dayagá ant, agan taw 5én lambaráni tahá gón kaptay godhá eskálarshep rasit, dege wadhy nést.

Dr. Shoaybá mashwarah dát ke kammo róchá boraw bwán gón, padá bechár.

Man ham tawkal kot, sohbá shotán wánagá. Sakk gal atán ke yuniá kelás geragá án bale némgádagén galié at, parcháke angat eskálarshep pakká naat.

Chizay róchay wánag o wati hamjomáetáni ápay gwáz kangá pad man paysalah kot ke wánán o eskálarshep ham gerán.

Godhá man yuniá yalaw atán, galá bál atán. Géshter wahd Yuniá gwázént. Wánagá dazmóh bitán godhá gón Dr. Shoayb, Dr. Majid o wájah Kaiyumá wahd gwast. Sangat o hamráh géshter bitant. Hamé sangatáni tahá Rapik Jaból hawár kapt o má sakk nazzik bitén. Rapik mani hamjomáet at o man wati kuthiá áort, bárén parchá maná dóst but o man áiá.

Yuniay wánagá maná báz sangatá komakk kotag. Dán zendag án áyáni kotgénán dar nayáyán.

Yuniay wánag sarjam nabut, bézarri at, bale wájah Nur Mahmad Angáriahay johdán Yuniá maná ADE dhegrié dát. Hamé dhegriay barkatá máshtharé laggetán.

Say sálá borz ent ke máshthariá laggetagán. Wánagjáhá pábandiá rawán, sakk kamm róch kazá kanán. Bale wánagjáhay rawag o páband bayagay sawab tahná mani imándári yá chokkáni wánénagay hobb o wáhag naent! Masterén sawab esh ant:

  1. Wánénagá marawán mardom ché goshant! Mardom shegán o pogán kanant, poshtá wadh wadhén gapp bit.
  2. Eskólá harróch sádhi mabán, sarkári apasré dawrah jant, tanká dárag bit.
  3. Wánagjáhay métagay mardom daptará zang janant pa man mazanén jédhah o janjálé bit kant.

Wánagjáhá modám sádhi bayagay masterén sawab hamésh ant, chokk o chágerdi gehbuday gam randig ant! Pameshká man sarpad bán ke man ostádé naán. Shomá ché goshet?

Amán Habib

Leave a Comment