Kay shomár kot kant borzay estárán
Andaray darday kay kesásá zánt
Kass nagendit á gwartagén tirán
Mani dhóbará pirén bitagant paywast
Zi gobárán sharr geptagat Pirkóh
Dhérah mani shabdém at moján syáhén
Dámoná kóhay jekk jat o neshtán
Mohr patát myáná zort kamarzáni
Gapp jat o kandet gón bazén rékán
Póletant bégáhi proshókén bramsh
Mádarén hankénay pedhán práhén
Shánk wati dátant man gayábén chamm
Gón kotant bibagrén delay ehwál
Gón tall o shépáni botkagén gwátá
Malkamut chó mastén lédhaway dábá
Pa man pédák at cha poshtá kóháni
Trakketant bamb o shengetant shórah
Chó dozzén sháhiná kot gorábán hinzh
Másagé bast o dah bará parrétk
Ákebat ché bit rande man dhéhay
Gón wati dózwáhán kamarbandén
Man hashim gept o paykeri neshtán
Neshtán gón Séwái jawánmardán
Chó nazánt badwáhán lagórénán
Má Balóch én o marg bahá zirén
May del Nehengáni proshtagén gwarm ant
Áhen ant dhil o kóh may bálád
Yakk gwaré Bálách at mazanmarrén
Yakk gwaré Bráhondag kasánzátén
Mekk at chó kóhá démá Nódbandag
Mocch atant warná mani chapp o chágerdá
Bacch mani tangaw o mazárbimén
Hónesh cha mallén didagán petthet
Golgesh chó káshá dráj atant zébén
Chóthawesh zarrén chó brestagén sádá
(O) barótesh chó dhangjanén zimá
Báragén myáná at katár nakshén
Kobl atant tir chó zardoki gwabzá
Kópagán sitiri kalamgóshén
Dém pa dém bitant gón sellén henzirán
Chó ragám gwartag góndhalén tirán
Shahm kot mán shépáni tahá grandán
Say shap o say róch dáshtagén jangán
Kaptagant kóháni sará dombál
Sotkagant ásán émenén arwáh
Harkas zánag bit cha wati béhá
Daste wat baksháén chetawr dhéhá
“Sakkián brát gón markabán kóshtant
Shakkalén jangáni pedhán bacchig
Pad nakenzant gón jogdhián dózwáh
Wasshián hátunén jan nóshant”
Mát dobar pédák kanat bacchán
Zendag arwáh bant rand cha margá
Hón shahidáni poll ródénant
Chón bant sengáni naps bandig
Sáhán kay ér dant mán andará kabray
Lóth nabant bandig gón tawk o zamzilán
Nay hayál band bant sengén zendánán
Sagg o ópárá hast goshant haddé
Chón bit chárag gón watá brahnag
Wardeni chié ás naent rókén
O rozhn taháriá chón bit dazgir
Drang polangáni bérasén gatth ant
Tólag o róbáhi nabant wábjáh
Taw satar wáhonday do sad lakkay
Bédel o némbondén sepáhigay
Pa dap geray Eslámay modám námá
Cherreket pádá ent wati béhi
Tai andará wáb ent Hattuén Bakkál
Mát tai Hendi náchué zánay
Sázgeré pet tai bádsháhbakshén
Bér gerag lóthay cha maná balkén
Man tará latth dátag kotag dindár
Sharriá zánay Chákarén Rendá
Jóny mán delbandá tai kall ent
Gázi mani brát ent Dhérahay mallén
Tónsah o Moltáná beger jostá
Gwastagant karn o dah sadáni sál
Gwánzagi tebl tai, pach godhant bimá
Tang naent gáméshé tai syáhén
Jóhadhán misénit watá sadbar
Róche rahmáni taw magend wábá
Cha wati bestár o goshádá gésh
‘É kóh sagárán gón geptagant mardán’
Nóshe ján chón bant chó tádalá Sendi
Zyárat o piri mard naent gwandu
Nayke awlád ant dátagén piri
Pad wati hakkáni janag zánant
Wati bérgerén pajjáray padi róchán
“Man kanán anchosh gón tará marchi”
Méd gón máhigán mán zerán johlén
Gón kahiráni shangarán lédhah
Tushter gón talláni chegerdpollán
Káiger gón hoshk o dhangarén bawndhán
Gón jengolán bánz o báragén sháhin
Taptagén róch o srumagén rékán
Ás kotagchérén lóhigi ápán
Eshker gón polpéthén poránigán”
Zir bejan emrózá wati baddhá
Wat kapay róché kótkagén kaddhá
Gósht tai jánay dir bit haddhá
Ke proshtagén oshter atk nakant laddhá
Bé tóshag o ápá shwánagé waddhá
Áyag ent tupáné zir watá chaddhá
Mani wáres ent Nattá o Lawang syád ent
Nósh kotant shir man zi panérbádén
Zir wati jarnélán kashá nádén
Ke nésh tai háshgóray trepant kádén
Ján mani Sendi jógián bastag
Dátag maná táid Kallagay shayhán
Pág mani sawgátén Mazári ant
Cháder mani shérbimén Legári ant
Bacch man Zahri ant tamanpróshén
Brát mani Rend o kópag ant Górgéj
Béli ant hangámén Raisáni
Hamrakáb Dinárén Malek Mirán
Sangar mani Mulái garén shahju
Del wati lákóthén kotag dastán
Wártag wati jenday man dobar sawgend
Man kanán káré gón tará anchén
Pa padi róchán daptará rájay
Nók bemánit yakk kessahé kwahnén
Pahr bebandant gón sénagán práhén
Mani bazzagén rájay shérdelén warná
Sawt o názénkán sharr mani námay
Sáhat o árósi marágáhán
Pa náz per bandant mani mellatay dohtar
Ladh shahidáni dráj Balóch rájay
Gón hamáyán man hór bán bándá
Pa kassá pádár nabit bélán
É doróchi zend o kudhawén emróz
Mallagé margá gón kanán anchén
Gédiá pasht géján dobar námé
Pa wati rájá nókén yátgáré
Bazhn bit badwáh o jahán gendit
(Yakk) Pirmardéá pa saránpiri
Médh chón dát gón dozhmenén mardán
Hón talambáni sáhegá tatkant
O possagán shérén narmazáráni
Báj nadát bájuén abélián
Bitant sáh áju o raptant pa sháné
Lahmokén trampán gwart talárdémán
Mardwarén Káhánay hamok shépá
Tambawén górkáhán sar padá kasshet
Kay merit góráni dhalén srombán
Chér tarray taw gón may gwargendán
Zendag bant arwáh dán bemánit zend
Marg nabit táwán bérgerén mardán
Chón kanay bandig taw sarjamén rájé
Chón janay zamzil pegr o apkárán
Syahtalár ant mani mohkamén warná
Áhen o kóhengén kalát borzén
Bánz o sháhin ant borzén kóháni
Didag ant portósén mazankóthay
Pach gerant hankéná wati mátén
Pad janant hakkán cha tará bándá
Wártaget bang taw nun mabu émen
Pa taw pédák ent malkumat allam
(O) zend tai sádén turagá bastag
Shér Balócháni makkahén mátán
Wártag sawgend o sar dobar bastag
Ke nók kanén pédá má sad hazár Agbar
Kambar o Dódáén Lawang mirén
“Bér Balócháni dán do sad sálá
Zagr o warná ent nók dodantán ent”
Golám Hosayn Shóház