Ahdá neshtagán karnáni
Arson retkagant chammáni
Nán tai kágadé pa man kayt
Nán tai kásedé pa man kayt
Gwátá gón nabant tai drahbát
Wazhbu o zabádén sawgát
Zánán cha maná béhál ay
Sechkánén tagerd o pátán
Jódhéntant molukén mátán
Bétákén kalérán Dashtay
Lóthit del panérán Dashtay
Nangár o jog o káiger
Zébá ant dhalók o jenter
Gár ant á Balóchi diwán
Gapp o kandag o pollén trán
Zánán cha maná béhál ay
Gazz o sohru o parmáshán
Mitáp o bahári gwáshán
Sórechk o tabáheg méshi
Dóg o mastagán gáméshi
Zébdár ant shagazz gón shankán
Byá may cháragá taw gam kan
Zahirán tai ganóki zortag
Hóshá cha maná dar kortag
Zánán cha maná béhál ay
Sártén chammag o kánigán
Dehkán o shepánk pánigán
Herr o dháchiáni danzag
Basshi kókeráni shanzag
Ómán ant maná kandag tai
Meskén mahparay randag tai
Sohrui pog o jóhánán
Har shap tai gamay démpán án
Zánán cha maná béhál ay
Ómán ant maná Dashtay polk
Bé taw wassh nabit ent darmolk
Mashk o hinzakán gón dézán
Shemsh o hálaku o shézán
Gálán Aktar án sázénán
Egbál o Sharip názénán
Borz o bándhomén kádánán
Neshtag éok o hayrán án
Zánán Cha maná béhál ay
Aktar Mahmud