باگانی کَپۆدَر سَبزێں
تُوتیزێمِر ءُ وَژلَبزێں
اِہوالاں بِبَر وَشّێناں
اِے ھَتّاں کَلَمکَشّێناں
اِسراراں مُرادبَکشێناں
بَندِش بانزُلاں نَکشێناں
گْوَش گۆں کَہرَبائیں ھَنگا
دابانی گُلێں مَہرَنگ ءَ
پَرچا نِشتَگ ءِ دِلتَنگ ءَ
ساز ئے چۆ گْوَشۆکێں چَنگ ءَ
ھَروَہد داب کَنت نۆدی شَل
گَندیمگۆنَگێں گَرکی تَل
اِستین ءُ پَیاپێں تْرۆنگَل
رَہم کَن شَپچِراگ سْرادانی
گَنج ءُ کیمَتی نْیادانی
کَولیگ آں تَئی پادانی
آسیگُن مَکَن دُردانَگ
پَہکێں اَشرَپی ئے چانَگ
بالادِت کُتَگ دێوانَگ
دۆشی شَپ بُزِرگ ءُ پاکێں
دُرّێں ھَتَّلی سیمساکێں
ماہ ءِ دَہچَہار بے باکێں
دْرَپشۆکێں سُہَیل جَبراکێں
شَپ ماں آہِر ءَ لُنج بیت
پُرنُورێں سَہَر گَنج بیت
اَرماں پہ وَتی چَمرۆک ءَ
نِشتَگ ھَمسَرانی تۆک ءَ
بُروان ئِے کَمَند اَنت نۆک ءَ
داگاں دَنت دِل ءِ بَندۆک ءَ
گۆش کَن اُو جِنِکّ مَہدێمێں
لَسّاہێں بِہاں نۆکزێنێں
دۆشی نِشتَگ ءِ بے سارا
سَر گۆں زَرنِبِشتێں شار ءَ
گَردِن گْرانبَہائیں ھار ءَ
بَکشاتَگ تَرا سَتّارا
<سترُنگ><اِم>مُلا پازُل