مَن ھما بے بانزُلێں مُرگ آں کہ پُٹ ئِے بَکشاتَگ اَنت
پہ سُلَیمان ءِ تَماہ ءِ مَڈی ءَ
مَنی نِزّ ءَ !
ھُدا ءِ آزماں بے گْواہ کَنَگ بیتَگ۔
مَنی دێم ءَ مُجے تالاں
نَگِنداں مَن دِگِہ ھِچّی
بُگُشاں چے ؟
پہ گُشَگ ءَ وَ لۆٹیت زُبانے آ اَچ مَن پُلَگ بیتَگ
مَنی وابجاہ
مَنی سَرجاہ
مَنی پێژگاہ
ءُ وَہد ءُ پاس،
وابانی،
نْیادانی،
لَیبانی،
گُلێں پُلّ ءُ گُلابانی
نَگواہیت گۆں مَن ءَ ھِچّی۔
ناں رۆزَردے گُباربَندێں، ناں اِستالانی نیلێں شَپ،
ماہِکانی وَ دَرمانے!
مُج ءُ تامۆرێں دُنیایے
مَن آن ءُ بَسّ! مَنی ساہِگ، یا مَن ساہِگ!
بَنیادَم دَم کَشّیت، واہِشتے دِل ءَ داریت۔
ھَمُک سُہب ءَ را دێمے بیت
ھَمُک پہ زِندَگێں مَردُم
مَنی سُہب پَہک بے دێم اَنت، کُجام دێم ءَ دَئے ئے دێمے؟
ناں دێمے ھَست ءُ ناں دَست ءُ پاد اَنت واہُندی
ناں مَنشا ءُ رَزایے ھَست۔
بَسّ! چۆ واجَہ ءِ آبادێں ٹاب ءَ ماں اِے سَبزاچک ءِ
شَبَند ءِ ءُ شَہار ءِ مُہتاج آں
<سترُنگ><اِم>ھَسا بِجّار