ھَتَم پہ کَیپے زَریت مِسکاں، پہ مِہلَبی دْرَپش داتَگ بام ءَ ، دِل ءَ نَمَنِّت
جَہاںے ءَ دات سِکێں "پاد آ بُرَو گِہێں واجَہ ءِ سَلام ءَ "، دِل ءَ نَمَنِّت
پہ مَن ھما سُہتَگێں ڈَگار اِنت، پہ مَن ھما مُرتَگێں کِشار اِنت، مَن چۆن بِمَنّاں
کہ نۆد شَنز اَنت، کہ ھَور گْوار اَنت، کہ دْرین ساریت ھَر رَگام ءَ ، دِل ءَ نَمَنِّت
گُش اَنت کہ دَور آہتَگ شَئے مُریدی، نَہ اِنت نوں اِے اَہد چاکَرانی دَرامَدانی!!!
بلے مَنی آجُوی "دَمانی"، بلے تَئی واجَہی مُدام ءَ ، دِل ءَ نَمَنِّت
پْرُش اَنت شَہکۆہ، ھُش اَنت شَہجُو گُش اَنت کہ بیرے نَدَنت کَسّ ءَ مۆہ، اِے اَہد ءِ شَہزانت
بِکَنت رَہدرۆہا راہدَربَر، بِدَنت بَکشیش بے مَلَم ءَ ، دِل ءَ نَمَنِّت
پہ ساہَتے تْراوَلی دِلانی، پہ یَکّ اَدارُکے ناگُمانی اَگاں بِجَلّاں
بلے اِے رَہوار واہَگانی بِمِنزِلیت راہ گام گام ءَ ، دِل ءَ نَمَنِّت
دِلُن نَمَنّیت کہ اَہد کارے کُشیت بالاچ ءِ وارِسانا مَن چۆن بِزاناں
پَدا بَر اَنت مَییَت ءَ پہ بَیرَک، پَدا گِر اَنت گَیرَت ءِ تَلام ءَ ، دِل ءَ نَمَنِّت
اَتا اِے مۆسُم، ھَتَم نہ چِلَّگ، بَہارگاہے ءِ تَہارماہ اِنت پہ رُژن ءِ واجَہ
بلے اِے آشۆب ءِ آس ءُ آپ ءَ تَرا تَوار اِنت اَتا پہ نام ءَ ، دِل ءَ نَمَنِّت
<سترُنگ><اِم>اَتا شاد