ھَمُک بے گاہ پَر مَن سْیاہ ءُ تامۆرێں جُڈے بَندیت
تَہارماہی دِگِہ سازے پہ بَہت ءِ سْیاہی ءَ کَندیت
دِل ءُ چَمّان ءَ چێر گێجاں مَن ءَ سۆجے بِدئے ھَمبَل
کہ دیوان ءَ پَریانی مَنی ھانُل کُج ءَ نِندیت
پہ دَرَہباتاں اَمُلّ ءَ پَسَّوے داتَگ گْوَش ئے زاناں
کہ ھِنّیرَتکَگێں دَستاں گۆں، بَنداں چَہ دِل ءَ سِندیت
مَن رێپاں کہ مَنی اوپّارگانی دُوتّ ءُ پاہار اَنت
اگں گُل گۆں تِلاہێں شَکّ ءَ مَلگۆراں وَتی رَندیت
نَچاراں ھانُل ءَ تُرسا کہ بَلکێں واہَگُن کَمّ بیت
مَن چۆ زاناناں کہ پَجّاہ ھَم نَیاریت اِنت اَگاں گِندیت
سَیَد وَشّ آں کہ دِل اَندۆہ ءُ رَنجانی دَوارجاہ اِنت
ھَمُک شَپ یَکّ گَمے نُکێں مَنی کُلّ ءِ سَر ءَ گْرَندیت
<سترُنگ><اِم>سَیَد ھاشُمی
کَلاکۆٹ، کَراچی
رۆچ ءِ دو اَدار
30 مَئی 1953