آ شَپی مَنی سَر ءَ گُش ئے آزماں کَپتَگَت ءُ دِل ءَ آس رۆک اَت۔ مَن ءَ وَتی مَرد ءِ سَر ءَ سَکّ کُنَّت بَیَگ ءَ اَت۔ مَن گْرێت ءُ وَت ءَ ڈۆبارِت۔ لۆگ ءِ ھَریَکّ چیزّے مَن ءَ چۆ زیمّا دَجَگ ءَ اَت۔ گْوَر ءِ پَشک مَن ءَ کُنٹَگ جَنَگ ءَ اَت کہ آئی ءَ دَست جَتَگَت۔ دِل گُشَگ ءَ اَت کہ لۆگ ءَ گۆں وَتی ھَمراہی ءَ ماں دار بلے ھَمے دَمان ءَ مَنی لاپ ءِ پَنچمائی چُکّ ءَ مَنی لاپ لَگَت جَت ءُ مَنی ھَیال ٹَگَلێنت اَنت۔ مَن دوێں دَست زُرت اَنت، وَتی لاپ شَہمات پہ شَہمات کُت کہ آئی ءِ تۆک ءِ چُکّ ھَم ھَمائی ءِ بَر اَت۔ مَن آئی ءِ زَہر ءَ وَتی ءُ وَتی لاپ ءِ چُکّ ءِ سَر ءَ کَشَّگ ءَ اِتاں۔
دِل تُسَگ ءَ اَت۔ چَمّ اَرس اِت اَنت۔ مَن نِپادانی سَر ءَ تَچک بیتاں، دێم گۆں دیوال ءَ کُت ءُ جێڈَگ ءَ لَگِّتاں کہ چُشێں مَرد وَ اێوک ءَ مَنی نَہ اِنت۔ چاگِرد چَہ چُشێن ءَ پُرّ اِنت۔ اِے زال چِہ پَیم گۆں آہاں زِند گْوازێن اَنت، چِہ پَیم چُکّ کار اَنت، چۆن آہاں سَگّ اَنت؟ سَجّاہێں زِند ءَ وَ چَہ اِے راستی ءَ نااشنا نَبَنت! مَن بُمُرتێناں گێہتِر اَت چَہ اِے مَرد ءِ گِرَگ ءَ۔ سَجّاہێں زِند ءَ کَلمانٹ بیتێناں شَرتِر اَت۔
دَروازَگ ءَ تَوار کُت۔ آئی ءَ وار وارا دَروازَگ پَچ کُت ءُ اَتک ءُ مَنی پُشت ءَ وَپت۔ مَن پَلَنگ ءِ کِرُّکا اِتان ءُ گێشتِر جاگَہ پہ آئی ءَ یَلَہ اَت۔
مَنی زَہر پہ آئی ءَ وَدّان اَت۔ آ چۆ بَدێں بُوے ءَ لۆگ ءِ تۆک ءَ شِنگ اَت ءُ مَنی ساہ ئِے بے وار کُتَگَت۔ مَنی دِل ءَ گُشت پاد آ، آئی ءِ گُٹّ ءَ بِگِر ءُ کَنس کَن، ھَمینچُک شَہمات ئِے بِجَن کہ دێم ئِے چارَگ مَبیت۔
شَپ گُش ئے دْراجتِر اَت۔ نَزاناں چِہ وَہد اَت۔ مَن ءَ ھِچّ سَبر بَیَگ ءَ نَہ اَت کہ کَدی سُہب بیت ءُ مَن چَہ اِے بَدێں بُو ءَ گِستا باں! مَنی سَر چَہ دَرد ءَ تْرَکَّگی اَت۔
ھَمینچُکا آ اَنچۆ واب کَپت ءُ تْرُند تْرُندا گَرّاڈَگ ءَ لَگِّت۔ آئی ءِ گَرّاڈَگ مَنی کێنَگ ءَ پہ آئی ءَ گێش کَنان اِت اَنت۔ مَن چَہ تَہت ءِ سَر ءَ پاد اَتکاں، شُتاں بُن ءَ تَچک بیتاں۔ مَنی دِل ءَ اِے لۆگ ءَ آسے رۆک اَت کہ مَن ءَ سۆچَگ ءُ پُر کَنَگ ءَ اَت۔
اَنَگاہا مَن وَتی گۆش ءِ سُہر ءِ نالُکانی تْرانَگ ءَ کَپتاں۔ پاد اَتک ءُ نِشتان ءُ نالُکاں کَشّاگا لَگِّتاں۔ مَنی دِل اَنچۆ گْرێوَگ ءَ اَت کہ اَرس یَکشَلا رِچان اِت اَنت۔ نالُک مَن کَشِّت اَنت ءُ سَردَست کُت اَنت یَکِّرّے ءَ۔ یَکّ بَرے دِل ءَ گُشت نالُکاں زیر، سِنگ ءِ سَر ءَ چۆپ بلے مَن ءَ اُشتِری کێنَگے مان اَت۔ پہ نالُکانی چۆپَگ ءَ چۆن ھَلاس بیتَگَت؟
نُنُّک ءِ لَگَت گێش بَیان اِت اَنت۔ آ سَہت ءُ دَماں مَنی لاپ ءَ لَگَت جَنَگ ءَ اَت۔ بِگِند ئے گُشَگ ءَ اَت کہ مَن ءَ دَست جَن، سَمار، سَرد بی، مَن بے وار آں۔ بلے مَنی دِل ءَ نُنُّک ءِ لَگَت اێوک ءَ مَنی زَہر ءَ پہ آئی ءِ پِت ءَ گێش کَنان اِت اَنت۔ مَنی ماتی مِہر نَزاناں کُج ءَ شُتَگَت۔ چَہ مَرد ءَ رَسِتَگێں دَرد چَہ اِے مِہر ءَ زۆراوَرتِر اَت۔
مَن گۆں دوێں دَستاں وَتی سَر ءَ پْرِنچَگ ءَ اِتاں۔ چَمّ سُچَگ ءَ اِت اَنت۔ واب گار اَت۔ اَنچۆ اَنچۆ داں مُلا ءَ پَجَر ءِ بانگ دات۔ مَن پاد اَتکاں، وَتی چادِر چَہ اَلماری ءَ کَشِّت ءُ سَر ءَ کُت۔ مَن ءَ اَنچۆ سَما بُوت کہ چادِر ھَم آئی ءِ جۆنێں بُو ءَ کَنَگ ءَ اِنت۔ اِے چادِر مَن ھَمائی ءِ زَرّانی سَر ءَ زُرتَگَت۔ مَن چادِر پَدا اَلماری ءَ چَگَل دات ءُ ھما چادِر کہ مَنی گُہار ءَ مَن ءَ سیر ءَ سَوگات کُتَگَت، شۆہاز کُت ءُ سَر ءَ کُت۔
اگں مَنی دَست ءَ بیتێں، مَن وَتی جان ءِ پۆست ھَم لَگۆشتَگ ءُ چَگَل داتَگَت کہ گۆں آئی ءِ جان ءَ یَجّاہ بیتَگَت۔
مَنی پَندۆل ءَ ھَر زَرّے کہ مان اَت، مَن کَشِّت ءُ لۆگ ءِ دِل ءَ کُورّات اَنت ءُ چَہ لۆگ ءَ دَر اَتکان ءُ شِپاد ءَ دێم پہ وَتی بُنُکّی مێتَگ ءَ راہ گِپتاں۔ مَنی چَمپَل ھَم ھَمائی ءَ چیزّے رۆچ پێسَر زُرتَگِت اَنت۔ دِل ءَ نَگُشت کہ پاد ءَ بِکَنِش۔
مێتَگ دیر اَت بلے مَنی تَہا اَنچێں ھاٹیگے اَتکَگَت کہ مَن دَم نَبُرت ءُ رۆچ ءَ گْوَر بَستَگَت کہ مَن مێتَگ ءَ سَر بیتاں۔
مَنی اِے جاوَر ءَ دْرُست پَرێشاں کُت اَنت۔ مَن ءَ آپ ءُ تامِش کُت بلے مَنی دِل ءَ ھِچّ نَکَشِّت، بَسّ دو گُٹّ آپ وارت۔
مَن پہ زۆرے وَتی چَمّانی اَرس داشتَگِت اَنت۔ مَن کہ گێگ ءُ گْوَر بیتاں، لۆگ ءِ دْرُستێں مَردُم مَنی کِرّا نِشت اَنت، مَنی مات، پِت، گُہار، بْرات ءُ نِشار۔ کَسّ ھِچّ گُشَگ ءَ نَہ اَت بلے دْرُستانی چَمّ چَہ جُست ءَ پُرّ اِت اَنت۔
مَنی مات ءَ گۆں لَرزۆکێں تَوارے جُست کُت کہ چے بیتَگ؟ تَئی مَرد کُج اِنت؟ مَن وَت ءَ داشت نَکُت ءُ دَپِ پُرّ ءَ گُشت کہ سۆتکَگ مَن اِے مَرد۔
مات ءَ یَبَّر ءَ مَنی دَپ ءَ شَہماتے جَت۔ مَنی زِند ءِ اَوَلی رَند اَت کہ مات ءَ مَن ءَ شَہماتے جَتَگَت۔ مَن گْرێوان ءَ تێوَگێں ھال دات اَنت۔
دْرُست گُنگ بیت اَنت۔ کَسّ ءَ ھِچّ نَگُشت۔ مات ءَ پہ پَشۆمانی مَن ءَ گِپت ءُ گُلاێش کُت۔ مَن گْرێوَگ ءَ اِتاں۔ آئی ءَ مَن ءَ تَسَّلا دات ءُ سَہڈێنت۔ بْرات ءَ گُشت تَو ھِچّ پَرێشاں مَبی، ما چَرِشیا تَئی سَوناں گِرێں۔
مَنی دِل ءِ بار کَمّے سُبَکتِر بُوت بلے مَنی دِل اَنگَت بُن اَت۔ آئی ءِ ھَستی مَن ءَ ھِچّ پَیم ءَ بَرداشت بَیَگ ءَ نَہ اَت۔ وَتی ھَلک ءِ بے گْواہێن ءُ شَہید بیتَگێں وَرنا ءُ آہانی ماتانی اَکس مَنی چَمّانی دێم ءَ اوشتاتَگ اِت اَنت۔ مَن ھِچّ وَڈ ءَ تاہیر گِرَگ ءَ نَہ اِتاں۔ مَنی دِل ءَ گُشت پاد آ، بُرَو مَسیت ءِ لۆڈ ءِ دَپ ءَ جار بِجَن ءُ بُگُش کہ مَنی بَدبُوێں مَرد چاریگے۔
<سترُنگ><اِم>سابِدَہ بَرکَت