تَرّ ءِ اَگۆلی چار ئے
وَیرانێں دیدَگاں گۆں
شۆہاز ءِ چے مُساپِر؟
اِے سُتکَگێں دَیار ءَ
اِے مُلک، شَہر ءُ بازار
چۆ چۆرَہی اَبێتک اَنت
اِے سَرڈِگارا ھَرجاہ
مۆتک اِنت ءُ آہ ءُ زار اِنت
اِد ءَ کَسّ نَزانت مَرچاں
نازێنک ءُ ھالَو چے اَنت
اِد ءَ کَسّ نَزانت کہ زێمِر
چی ءِ وَشتَوارێں نام اِنت
تَرّ ءِ اَگۆلی چار ئے
وَیرانێں دیدَگاں گۆں
شۆہاز ءِ چے مُساپِر؟
اِے سَرزِمین ءِ بالاد
زَیم اِنت ءُ ٹَپّ ٹَپّ اِنت
اِد ءَ گام گام جَنگ اِنت
اِستین ھۆن شَنز اَنت
گِند ئے پَداں تَو لاشی
اِد ءِ کِشک کِشک اَرسیگ
اِد ءَ لۆگ لۆگ آس اِنت
تَرّ ءِ اَگۆلی چار ئے
وَیرانێں دیدَگاں گۆں
شۆہاز ءِ چے مُساپِر؟
اِے سُتکَگێں دَیار ءَ
اِد ءَ شادِہ ھِچّ نَمَنتَگ
اِد ءَ مِہر ءِ مُرگ ءِ بانزُل
یَکّ یَکّ ءَ گْوَتکَگَنتِش
اِد ءَ ماہ ءِ رُژن ءُ دْرۆشُم
نَدات ھِچّ دِلاں تاہیر
اِد ءَ سَمین ءِ سارتێں کَوش ءَ
سۆچک ماں آسی
تَرّ ءِ اَگۆلی چار ئے
وَیرانێں دیدَگاں گۆں
شۆہاز ءِ چے مُساپِر؟
اِے سُتکَگێں دَیار ءَ
<سترُنگ><اِم>مُلا مُراد