ماہ مَنی بُنجاہ اِنت ھَیالانی
رۆچ تَئی واب اِنت لَہمُکێں کُٹّ ءَ
بْیا مَنی دابانی پاری ماہێں
بْیا مَنی کاڈانی سَرێں سَرتاج
مَن اَبێتک آن ءُ نِشتَگاں تَہنا
نِشتَگ ءُ اَمبُوێں دِل ءَ جێڈاں
گُلگُل اَنت بازێں اَرس مَنی چَمّاں
چَہ دِل ءَ اومان اَنت مَنی سَرّێچ
نِشتَگ ءُ ھیسکاراں شَپی پاساں
دِل گُش ئے بُتکَگ دُوری ئے آساں
ماں پُراں پُلپێٹ تْرانَگ دِلبُرّێں
چۆ پُرانیگ ءَ بْرِتکَگ ءُ زَردێں
اَندَر ءَ آسے رۆک ءُ جَمبُور اِنت
ما مُساپِر ءُ راہ مئے دُور اِنت
وَشّ نَبَنت دَرمُلکی مَن ءَ ھالَو
نَرمۆکێں بۆپ ءُ شیشُمێں مَنجَو
مَشکَتی ھاتُون ءُ مُلێں مِہرُک
ٹیٹَلێں کاڈ ءُ مِہرَواں رَتّیگ
مَن گُش ئے چیزّے گار کُتَگ ھاکاں
مَن وَتی پَجّار اوں بَبا داتَگ
ھَور سَتَر گْوار اَنت، نۆد سَتَر شَنز اَنت
دێم ءِ آدێنک اِنت پَہک کَنت دَنزاں
اَمبَر ءُ مِسک ءُ لُولُواں دْرَنزاں
چَہ دِل ءَ چۆن تَئی تْرانَگُن کِنز اَنت
چۆن تَئی جیگیگ ءَ شَمۆشاں مَن
نُگرَہێں بَند ءُ سُہر ءِ ٹاسین ءَ
گَردِن ءَ آسکی، پۆنز ءَ کاٹارێں
شَکَّلێں تران ءُ کِرمِزێں لُنٹاں
بے نَگێں رَکّاں تَئی دَپ ءَ دُرجێں
رۆلَہێں رَنگ ءَ تَئی اَنارکانی
دیدَگاں نیلبۆمێں زِری رَنگێں
جَنَّتی بالاد، گۆں دُن ءُ بُواں
سێنَگ ءَ نۆکناہێں بَہِشتێن ءَ
بارَگێں سرێن ءَ تَئی کِلێپێنا
پَنجَگاں لَہم ءُ تْراشتَگێں باسکاں
لَنکُکی بَنداں چۆ شِپارێناں
زانسَراں کُوشّ ءُ پُکّیێں پاداں
ڈَکُّمێں مُودانی تَئی شَیدا
زامُرێں بیکّانی گَنۆک آں مَن
بْیا مَنی مَجرُوہێں دِل ءَ اێر کَپ
سَیل بِکَن ٹَپّاں مئے نَوَشّێناں
دَئے تَسَلّا ءُ مَرز سَر ءَ دَستے
نِند مَن ءَ گْوازێں گۆں دِگِہ سَہتے
بے تَرا زِند ءِ لۆٹ مَنی چۆرَہ
بے تَرا دیدۆک اَنت مَنی بے رۆک
بے تَرا وَشّی اوں جَنۆزام اَنت
بے تَرا شَکَّل زَگر ءُ بے تام اَنت
تَو مَنی گَوگائی کَسانی ءِ
تَو مَنی زِندبَکشێں جَوانی ئے
تَو مَنی پیری ءِ اَسا دار ئے
تَو مَنی آزیز ئے، کَس ءُ یار ئے
بے تَرا جَور اَنت ما ئِے دَپ ءِ وَشّی
مئے دِلُن وَرد ءُ مُبدَہاں کَشّی(ت)
بْیا مَنی مَوجێں ھاتِر ءَ وَشّ کَن
بْیا مَن ءَ دَست ءَ گِر، بِبَر گۆں وَت
سَربَتَگ شۆہاز ءَ تَئی دَشت ءَ
کِشت وَتی اَرواہ مَن نِگوَردێم ءَ
ماہ مَنی بُنجاہ اِنت ھَیالانی
رۆچ تَئی واب اِنت لَہمُکێں کُٹّ ءَ
بْیا مَنی دابانی پاری ماہێں
بْیا مَنی کاڈانی سَرێں سَرتاج
<سترُنگ><اِم>گُلام ھُسَین شۆہاز