مئے بازار ءَ سیرے بَیَگ ءَ اَت۔ بَچَکّ ءُ جِنِکّ دوێں مئے وَتی بازارَئێگ اِت اَنت۔ بَچَکّ مَن دیستَگَت۔ آ مئے بازار ءِ شِپانک اَت ءُ بازار ءِ چَوَکّ ئِے گۆن اِت اَنت۔ کِساس بیست ءُ پَنچ، بیست ءُ شَش سال ءِ وَرنایے اَت۔ کۆہ ءُ شێپاں اَبَید، آئی ءَ دِگِہ ھِچّ نَدیستَگَت پَمِشکا چَہ دُنیا ءِ مَگر ءُ ھُنِراں بے سَما سَکّێں تَچک ءُ سادَگێں بَچَکّے اَت۔ جِنِکّ مَن نَدیستَگَت اَلبَت آئی ءِ شَرَّنگی ءُ داب ءُ کِہێبانی ھَبَر مُدام مێتَگ ءِ وَدَگ ءُ آشِکێں بَچَکّانی دَپ ءَ اَت۔ چَہ آئی ءِ ھَر وَہد ءِ سینگار ءُ ساپ ءُ پَلگاری ءِ سَوَب ءَ مێتَگ ءِ بَچَکّاں آئی ءِ نام "آدێنک" بَستَگَت۔
سیر ءِ گُڈّی نِدارَگ اَت۔ دو مَردُم ءَ سالۆنک دَست ءَ گِپتَگَت ءُ پہ لۆگ ءَ گْوازێنَگ ءَ پێداگ اِت اَنت۔ لۆگ ءِ دَپ ءَ بازێں جَنێن ءُ مَردێںے مُچّ اَت۔ ھَمے مُچّی ءِ تَہا مَن ھَم گۆن اِتاں۔ سالۆنک ءُ بانۆر ءِ سَرانی ڈیکّ دَیَگ ءَ پَد، وَہدے سَرگوَپ ءَ بانۆر ءِ دێم دَر ءَ کُت تَ گُش ئے چاردَہی ماہے چَہ جَمبَراں دَر ءَ بُوت۔ بانۆر بے کِساس شَرَّنگ اَت، شَرَّنگی ئے گُمان ءَ ھَم دێماتِر…
آئی ءِ کَش ءَ نِشتَگێں سالۆنک ھِچّ ھِساب ءَ آئی ءِ دَروَر نَہ اَت۔ اَنچۆ گُماں بُوت گُش ئے بُنڈے ءِ کَش ءَ پُلّے رُستَگ۔
“اِے جِنِکّ اگں ماہے گۆں اِے بَچَکّ ءَ بُگوازێنیت، گَنجے۔’’مَنی دَپ ءَ دَر اَتک۔
ءُ اَنچۆ بُوت۔ سیر ءَ اَنگا ھَپتَگے نَگوَستَگَت کہ آیانی میان ءَ اَڈ ءُ کُڈ بِنا بُوت۔ ءُ دۆمی ماہ ءِ تَہا جِنِکّ ءَ بَچَکّ پَہک جَواب کُت ءُ پہ زۆر وَتی سَون گِپت اَنت۔
جِنِکّ ءُ بَچَکّ ءِ سَون ءُ مُہر بَیَگ ءَ اَنگا ھَپتَگے نَگوَستَگَت کہ یَکّ رۆچے ھما جِنِکّ ءِ مات مَنی گْوَر ءَ اَتک۔ ءُ چۆ ھَلوَت ءِ دْرۆشُم ءَ چَہ مَن جُست ئِے کُت۔ “تَو چِتَور زانتَگ اِے جِنِکّ ءُ بَچَکّ نَٹَہ اَنت؟’’
“مَن چِتَوَر زانتَگ؟” آئی ءِ چَرے جُست ءَ مَن اَجَب ھَیراں بیتاں۔
“ھَو، ھما لۆگ ءَ بَرَگ ءِ شَپ ءَ تَو اِے گَپّ جَتَگ کہ اِے جِنِکّ داں ماہے گۆں اِے بَچَکّ ءَ بُگوازێنیت، گَنجے۔ مَن ءَ یَکّے ءَ ھال داتَگ۔’’ آئی ءَ مَنی چَمّانی تَہا چارانا پہ دِلجَمێں ڈَولے گُشت۔ ءُ مَن ھَم وَتی ھَمے کُتَگێں گَپّ ءِ تْرانَگ ءَ کَپتاں۔
“مَن دُێنانی ھِساب کَشِّتَگ۔” کَمّے پِگر جَنَگ ءَ رَند مَن گُشت پَرچاکہ مَن چۆ گُشت نَکُت کہ زاناں تَو وَت نَزانتَگ، تَئی ھَزارنازێں جِنِکّ اِے شێپتالێں کۆہی شِپانک ءَ نَزیریت۔
اِے گَپّ ءَ سئے، چار رۆچ گْوَست۔ یَکّ بے گاہے مَن وَتی کاپَر ءِ چێرا نِشتَگِتاں کہ اَناگَہا یَکّ پَٹَکّ ءُ ساپگیوارێں جَنێںے مَنی گْوَر ءَ اَتک۔ “مَن نادراہ آں، مَن ءَ تایدے بِدئے۔” گۆں رَسَگ ءَ آئی ءَ گُشت۔
“تَرا تایدے بِدَیاں؟ مَن تاید ءِ وَڈ ءُ کار نَزاناں۔ اِے کار ءَ مُلاے ءِ گْوَر ءَ بُرَو۔ بلے تَو ماشَلّا چۆ پَزّۆرێں گُرانڈ ءَ ئے۔ تَئی نادراہی چے اِنت؟’’ مَن آ جَہل ءُ بُرز چارَگ ءَ رَند پہ ھَیرانی گُشت۔
“مَنی اِے جان ءِ گۆشت ءَ مَچار۔ مَن نادراہ آں۔” آئی ءَ یَکّ نِزَرے وَتی بالاد ءُ پَدا مَن ءَ پہ نێمچَمّی چارِت ءُ گُشت۔
“بلے بُگُش تَئی نادراہی چے اِنت؟ تَو نادراہ ءِ وَڈ ءَ نا ئِے۔” مَنی چَمّ آئی ءِ دَست ءِ پُشت ءِ تْرِپّے ءَ سَکّ اِت اَنت۔
“مَنی دَست ءُ پاد تُس اَنت، بلے گێشتِر مَنی دِل اِنت۔ دْرَہَگ ءَ اَبَید، گُش ئے یَکّے ءَ مُچّ ءَ کُتَگ ءُ داشتَگ۔ مَن شَکّ آں مَنی مَرد ءَ مَن ءَ چیزّے کُتَگ۔” گُڈّی گَپّ آئی ءَ پہ ھَلوَت گُشت۔ “تَو مَرد ءِ سَر ءَ پَرچا شَکّ ئے؟’’ مَن ھَم پہ ھَلوَت جُست کُت۔
“تَرا آ گَپّ ءَ کار نێست۔ تَو بَسّ مَن ءَ اَنچێں تایدے بِدئے کہ مَنی نادراہی بُرَوت۔ ءُ مَنی مَرد مَنی گَپّ ءَ بِگیپت۔’’ اَوَلی گَپّ آئی ءَ گۆں تاب داتَگێں لۆنسے دَر کُت۔
“ مَن پہ دِل گُشَگ ءَ آں، مَن تاید ءِ کار نَزاناں۔ اِے مُلّائی کار ءُ بارے۔ تَو چۆ بِکَن مُلا سُلَیمان ءِ گْوَر ءَ بُرَو۔ مَن اِشکُتَگ آ پہ چُشێں کار ءَ یَکّ ءُ ٹِکّ اِنت۔’’ مَن آ وَتی سَر ءَ تێلێنَگ ءِ جُہد کُت۔
“تَو سَکّ زان ئے۔ گۆں مَن وَت ءَ چێر نَگُش ئے۔ تَو پِلانی ءُ پِلانی ءِ ھِساب کَشِّتَگ ءُ اَنچۆ گُشَتَگ، اَنچۆ بیتَگ۔ مَن دْرُستاں سَہی آں۔” آئی ءَ ھما جِنِکّ ءُ بَچَکّ ءِ نام گِپت کہ مَن گُشَتَگَت اِے نَٹَہ اَنت، ءُ پَدا پہ دابے وَتی مُورک ئِے مُجێنت۔
ءُ مَن نی زانت اِے بانۆر ءِ مات ءِ کِردار اَنت۔ ھَمائی ءَ اِے ھال داتَگ ءُ پَدا مَن ھَرچُند گُشت کہ مَن چُشێں کار نَزاناں بلے ھِچّ وَڈ ءَ آئی ءَ باوَر نَکُت۔
“ شَرّ اِنت، تَو اَنّی بُرَو۔ مَن اِنشَپی پہ تَو تایدے نِبِشتَہ کَناں۔” گُڈسَرا مَن لاچار بیتان ءُ پہ تایدے ءِ نِبِشتَہ ءَ زُباں دات۔
“مَن باندا مَہلَہێں سُہبا کایاں۔ مَنی تاید ءَ تَیار کَن۔” آئی ءَ پہ دِلجَمی گُشت ءُ پاد اَتک۔
مَن زانت کہ اِے باندا اَلَّما کئێت پَمِشکا آئی ءِ رَوَگ ءَ رَند، مَن ھَمے دَمان ءَ اِسپێتێں کاگَدے زُرت ءُ ھَمے کاگَد ءِ سَر ءَ ھَمائی ءِ جِند ءِ نام نِبِشتَہ کُت۔ پَدا تاید ءِ وَڈ ءَ پێتک ءُ وَتی کیسَّگ ءَ کُت ءُ بے گَم بیتاں۔
اێدِگِ سُہبا وَہدے آ اَتک، مَن چَہ آئی ءِ جُست ءَ ساری ھَمے کاگَد آئی ءِ دَست ءَ دات ءُ گُشت۔
“اِشیا یَکّ سَبزێں گُدے ءِ تَہا دۆچ ءُ پَدا وَتی راستێں دَست ءِ باسک ءَ بَند بلے جاں شۆدَگ ءِ سَہت ءَ بۆج ئِے پَرچاکہ اگں آپ ئِے لَگِّت گُڈا کار نَکَنت۔’’
“اگں تَئی تاید ءَ کار کُت گُڈا مَن ھَم تَرا بے ھِچّ نَکَناں۔” آئی ءَ تاید دَست ءَ کُت ءُ پہ نازے مَن ءَ نێمچَمّی چارِت ءُ پاد اَتک۔
ھَپتَگے رَند، اَناگَہ مَن چَہ دیر ءَ دیست آ تَچک ءَ پہ مَن پێداگ اِنت۔ یَکّ بَرے مَنی دِل ءَ گُشت پاد ءَ بِتَچ۔ بلے پَدا مَن ھَیال کُت کہ مَنی مَیار نَہ اِنت، مَن وَ نَکّ جَت کہ مَن تاید ءِ کار نَزاناں۔ آئی ءَ مَن ءَ پہ زۆر پَرمات۔ مَن ھَمے ھَیال ءَ اِتاں کہ آ اَتک ءُ مَنی دێم ءَ اوشتات۔ مَن دَپ پُرّ ءُ ھالیگ کُت کہ گُشاں مَنی مَیار نَہ اِنت، بلے مَنی گُشَگ ءَ ساری آئی ءَ دَرّاێنت۔
“مَنی نادراہی اَنچۆ شُتَگ کہ گُش ئے مَن ءَ ھِجبَر نادراہی پِر نَبیتَگ۔”
“ھاں؟؟” مَن ءَ آئی ءِ گَپّ باوَر نَبُوت ءُ چَہ ھَیرانیا مَنی دَپ پَچ بُوت۔
“مَن نَزانتَگ تَو چُشێں مُلایے ئے۔ بِزاں واجَہ ءَ وَت ءَ چێر داتَگ۔” آئی ءَ مَنی چَمّانی تَہا چارِت ءُ بِچکَندِت۔
اێدِگِ رۆچ ءَ یَکّ بَلُّکے ءَ وَتی چار ءُ پَنچ سالی نُماسَگے گۆن اَت ءُ مَنی گْوَر ءَ اَتک۔
“مَنی چُکّ! مَنی نُماسَگ ءَ بَندے بِدئے۔ اِشی ئے رێش وَشّی نَزان اَنت۔ دْراہێں جان ءَ بِگِر داں دَست ءُ پاداں مُدام رێش دَر کئێت۔ ما دَوا ءُ دَرمان ءَ دَم بُرتَگ۔ اِے رێش وَشّی نَزان اَنت۔ یَکّے وَش بیت، آئی ءِ کَش ءَ دِگِہ یَکّے دَر کئێت۔”
بَلُّک ءَ وَتی نُماسَگ ءِ پَشک لێٹێنت ءُ مَن ءَ آئی ءِ جان ءِ رێش پێش داشت اَنت۔ مَن دیست آئی ءِ نُماسَگ ءِ جاں اَنچۆ چِلّ اِنت کہ چِلّاں کُچَل ءُ تَل داتَگ۔ اِے رێشانی سَوَب ءِ زانَگ پہ مَن ھِچّ گراں نَہ اَت پَمِشکا بَلُّک ءِ نُماسَگ ءِ رێشانی چارَگ ءَ پَد، مَن ھِچّ اِینگُر ءُ آنگُر نَکُت، ءُ بے تْرِکّ ءُ تَوار یَکّ اِسپێتێں بَندیکّے زُرت ءُ گَپَّڈے گُکّ بَست ءُ پَدا شُت چَہ وَتی اُرداں یَکّ ڈِٹۆل ئے سابُونے آُرت۔
“اِے بَند ءَ وَتی نُماسَگ ءِ گْوَر ءَ بَند۔ ءُ اِے سابُون ءَ گۆں سُہب ءُ بے گاہ آئی ءِ جان ءَ شۆد۔ اِے سابُون مَن دَم جَتَگ۔” مَن بَند ءُ سابُن بَلُّک ءِ دَست ءَ دات اَنت۔
“ھُدا تَرا سَبز کَنات۔” بَلُّک ءَ مَنی دَست چُکِّت اَنت ءُ پاد اَتک۔
دو ھَپتَگ ءَ رَند، یَکّ رۆچے پَدا بَلُّک ءَ وَتی نُماسَگ گۆن اَت ءُ اَتک۔
“مَنی نُماسَگ ءِ رێش نی وَشّ اَنت۔ ءُ دِگِہ رێش ھَم نی دَر نَیایَگ ءَ اِنت، بلے سابُون کُٹِّتَگ۔” بَلُّک ءَ وَتی نُماسَگ ءِ پَشک لێٹێنت ءُ مَن ءَ پێش داشت۔ مَن دیست نی آئی ءِ نُماسَگ ءَ دانَگے رێش ھَم پِر نێست۔
“بلے جاں شۆدَگا ئِے بَند مَکَن۔ اگں تَرا سُہب ءُ بے گاہ وار نَبیت، پَرواہ نێست۔ بلے رۆچ ءِ تَہا یَکّ رَندے اَلَّما جانا ئِے شۆد۔ ءُ سابُون تُری ھَر وَڈێںے بِبیت۔” رێشانی چارَگ ءَ پَد مَن بَلُّک سۆج دات۔
بَلُّک ءِ رَوَگ ءَ اَنگا نێم ساہَت نَگوَستَگَت کہ اَناگَہ یَکّ نێمُمرێں جَنێںے ءَ سَلام دات۔ مَنی چَمّ آئی ءِ دێم ءَ سَکّ بیت اَنت۔ آ مَنی دێم ءَ اوشتاتَگَت ءُ اوشتاگی جاہ ءَ دَرّاێنت ئِے۔
“ماشَلّا، اُمَرے رێش پَہک وَشّ بیت اَنت۔” اُمَر ھما بَلُّک ءِ نُماسَگ ءِ نام اَت۔ پَدا آ مَنی نَزّیکّا نِشت ءُ گۆں ھَلوَت دْرۆشُمێں ڈَولے گُشت ئِے۔ “ءُ دُرّێں مَلِک ھَم چَہ وَتی نادراہی ءَ وَش بُوت۔”
مَن آئی ءَ رۆک رۆک چارَگ ءَ اِتاں۔ مَن ھَیال ءَ اِتاں کہ اِے پَرچا اِے گَپّاں جَنَگ ءَ اِنت، کہ اَناگَہ آئی ءَ گُشت۔
“مَن ءَ گُہارزَتکے ھَست۔ نی سَلامَتی مَزَن ءُ تَوام اِنت۔ زانا بَہت ئِے واب اِنت کہ دَنیگَ کَسّ ءَ وَتی ھَبَر پَرایا نَیاُرتَگ۔ ءُ نی بازار ءِ مَردُماں کَلمانٹ ءِ نام بَستَگ۔ تَو اِے بے بَہتا اَنچێں ٹِکّ ءُ ٹَکّے بِکَن کہ زیت یَکّے پَرایا وَتی ھَبَر ءَ بْیاریت۔ ھُدا ءِ گْوَر ءَ بے سَواب نَبَئے۔” آئی ءَ وَتی گَپّ کُٹّێنت ءُ پَدا اَنچێں دِلمانَگێں وَڈے مَن ءَ چارَگ ءَ لَگِّت، گُش ئے زاناں مَن ھَمے دَمان ءَ مَردے چَہ کیسَّگ ءَ کَشّان ءُ آئی ءِ دَست ءِ دِل ءَ اێر کَناں۔
“ھُدا ھَیر کَنت۔” اَبَید اِنگُر ءُ آنگُرا مَن گُشت پَرچا کہ مَن زانت اِے ھَم بے تایدا پاد نَیَیت۔
“تَو چۆ بِکَن۔ بُرَو ھَپت رَنگ ءِ بَندیکّ بْیار ءُ مَن ءَ بِدئے۔ مَن تَرا بَندے بَندان ءُ دَیاں۔” مَنی گَپّ ءِ ھَلاس بَیَگ ءَ گۆں آ ھَمے دَمان ءَ پاد اَتک ءُ شُت۔ آئی ءَ چَہ مَن دِگِہ ھِچّ جُست ھَم نَکُت۔ پَدا دێر نَگوَست آئی ءَ ھَپت رَنگ ءِ بَندیکّ گۆن اَت ءُ اَتک۔
“اِے بَند ءَ وَتی گُہارزَتک ءِ چَپّێں باسک ءَ بَند۔ ءُ اِشیا اَبَید جاں شۆدَگ ءَ، دِگِہ ھِچّ وَہد ءَ مَبۆج۔ اِنشالّا ھَیر بیت۔”
مَن ھَپترَنگێں بَندیکّ ھۆر کُت اَنت ءُ ھَپت زَنڈێں گُکّ بَست ءُ آئی ءِ دَست ءَ دات۔ آئی ءَ بَند وَتی مُچّ ءَ کُت ءُ پاد اَتک ءُ اوشتات۔ کَمّے ھَیال کَنَگ ءَ لَگِّت، آئی ءِ دِل ءَ اَت گَپّے بِکَنت، بلے پَدا ھِچّ ئِے نَگُشت ءُ راہ گِپت۔
بلے اِے جَنێن ءَ پَدا مَنی تام کَشِّت۔ ھَپتَگے یَکّ رَندے اَلَّم مَنی گْوَر ءَ اَتک کہ دَنیگَ ھِچّ نَبیتَگ۔ ءُ مَن ھَمُک رَند ءَ ھَمے گُشت ءُ پاد کُت کہ اِشتاپ مَکَن۔ ھُدا ھَیر کَنت۔ ھَمے ڈَولا کِساس سئے ماہ گْوَست ءُ مَن ھَم نی اَجَب بێزار اِتاں۔
یَکّ رۆچے آ چَہ دیر ءَ پێداگ اَت۔ آئی ءِ گِندَگ ءَ گۆں مَنی جان ءِ پُٹّ پاد اَتک اَنت ءُ مَن ءَ سَکّ زَہر آیَگ ءَ اَت۔ مَن پِگر کُت مَرچی مَن تَچک ءَ آئی ءَ گُشاں کہ داب باندات ءَ دِل ءَ بِدار۔ اگں کَسّ ءَ وَتی ھَبَر نَیاُرت گُڈا پۆشی مَن وَتی ھَبَر ءَ پہ تَئی گُہارزَتک ءَ کاراں۔
“یَکّے ءَ وَتی زاماتی ئے ھَبَر آُرتَگ۔” آئی ءَ پہ پَچێں رُوے گُشت ءُ مَن سارتێں گینّے کَشِّت۔
“بلے مَنی گُہار ءَ دَنیگَ پَکّائیں جَواب نَداتَگ۔ مَنی گُہار ءِ دِل ءَ نَہ اِنت، پَرچاکہ آئی ءَ ساری ءَ جَن ءُ چُکّ ھَست۔ چۆنایگَ سێر ءُ اَزَگارێں مَردُمے ءُ چۆ سَکّ پیر ھَم نَہ اِنت۔ ءُ نُماسَگ ءِ بَیَگ زیت سیر ءِ سَر ءَ اِنت۔ اگں یَکّے زیت سیر کَنت، زیت چُکّ بیت ءُ پَدا نُماسَگ ھَم زیت بیت۔ نی مَن تَئی جُست ءَ اَتکَگاں کہ تَو اِے بارَوا چے گُش ئے؟” آئی ءَ وَت جَت ءُ وَت مَن ءَ کُت، بلے مَن دیست جَنێن ءَ سَکّ دِل ءَ اِنت۔
“مَن گُشاں مَہتَل ئِے مَکَن۔ جَن ءُ چُکّ ئِے اگں ھَست، زانا چے بیت؟” کَمّے ھَیال کَنَگ ءَ رَند مَن پہ اِشتاپ گُشت۔ “بلے چۆ چِتَوَر بیتَگ؟ مَن وَ کَسانێںے ءِ واست ءَ بَند بَستَگَت۔ زانا گُکّاں شَرّی ءَ تاب نَوارتَگ ءُ شُل بیتَگ اَنت۔” مَن وَت ءَ کَمّے پَرێشاں کُت۔
“پَرواہ نێست ھَمینچ گَنجے۔” آئی ءَ دَرّاێنت۔
مَنی مُلّائی ئے ھال نی کَش ءُ گْوَر ءِ بازاراں ھَم شِنگ بیتَگَت، ءُ مێتَگ ءِ گێشتَرێں بَہرے ءَ مَن ءَ “مُلا” گُشت ءُ تَوار کُت۔ ءُ مَنی دِل ءَ ھَم باز بَر ءَ ھُلّ کُت کہ ریشّاں بِدار ءُ اِسپێتێں جۆڈیے گُد گْوَر ءَ کَن ءُ اِشانی ھَمراہی ءَ اِسپێتێں کُلَہے ھَم سَر ءَ کَن۔
یَکّ نێمرۆچے مَن ءُ مَنی لۆگبانُک سُبارِگ ءَ اِتێں کہ اَناگَہ یَکّ کَماشێں جَنێںے ءَ سَلام دات ءُ پُتِرت۔ اِے مئے مێتَگ ءُ بازار ءِ نَہ اَت۔ ما پَجّاہ ھَم نَیاُرت۔
“بیبی! نَگَن ءَ بْوَر گۆں۔” مَنی لۆگبانُک ءَ آ وَرَگ ءِ سَلاہ جَت۔
“ھُدا شُمارا گَنج بِدیات۔ مَن نَگَن وارتَگ۔” مَن دیست آئی ءِ گالِوار چَہ گَم ءَ سَرّێچ اِنت۔
“مُلا گُلام ءِ لۆگ ھَمِش اِنت؟” کَمّے بے تْرِکّ ءُ تَواریا پَد، آئی ءَ چَہ ما جُست کُت۔
“ھَو، بیبی! مُلا گُلام ھَمِش اِنت، نَگَن وَرَگ ءَ اِنت۔” مَنی لۆگبانُک ءَ مَن ءَ نێمچَمّی چارانا کَمّے بِچکَندِت ءُ گُشت۔ ءُ مَن دیست جَنێں کَمّے دِگِہ وَڈ بُوت۔ آئی ءِ چَمّ مَنی بے ریشّێں زَنُوکّا سَکّ اِت اَنت۔
“ھَو، بیبی! گُلام مَن آں۔” مَن گُشت بلے آ اَنگا مَن ءَ پہ ھَیرانێں وَڈے رۆک رۆک چارَگ ءَ اَت۔ گُش ئے آئی ءَ باوَر بَیَگ ءَ نَہ اَت کہ “مُلا” مَن آں۔
“بیبی! تَو پہ کارے اَتکَگ ءِ؟” مَن جُست کُت۔
“ھَو، مَنی چُکّ! مَن کارے ءَ اَتکَگاں۔”
نی آئی ءَ مَن ءَ “مُلا”ئے بَدَل ءَ “مَنی چُکّ” گُشت بلے اَنگا آئی ءِ ھَیرانی بَرجاہ اَت۔
“بُگُش، بیبی! تَئی کار چے اِنت؟” مَن وَرَگ بَسّ کُت ءُ دێم ھَمائی ءِ نێمَگ ءَ تَرّێنت۔
“مَن ءَ … مَنی… کار…” آئی ءِ چَمّ مَنی لۆگبانُک ءَ سَکّ اِت اَنت۔ ءُ مَن زانت آ مَنی لۆگیگ ءِ دێم ءَ گَپّ ءَ چێر دَیَگ لۆٹیت۔
“بیبی! اِے مَنی چُکّانی مات اِنت۔ دِلجَم بِبی۔ تَئی گَپّ پاشک نَبیت۔” مَن وَتی لۆگیگ ءِ نێمَگ ءَ چارِت ءُ گُشت۔
“مَن چَہ دْرَچکۆہ ءَ پێداگ آں۔ مَنی سیر کُتَگێں جِنِکُّوے۔ آئی ءِ سیر ءَ دێر اِنت۔ نی سَلامَتی چار چُکّ ءِ مات اِنت۔ پێسَر ءَ مَرد آئی ءِ سَر ءَ شَرّ بیتَگ بلے ھَمے دو سئے ماہ بیت کہ آ یَکّ جَنۆزامے ءِ سَر ءَ آشِک اِنت ءُ نی پَہک ھَمے جَنۆزام ءَ پُشت ءَ کَشِّتَگ۔ وَتی جَن ءُ چُکّاں ھِچّ جُست نَکَنت۔ جَنَگ ءُ پْرۆشَگ وَ چُشێں گَپّے نَہ اِنت۔ مَرچاں ھَبَر دو نَبیت، سَونانی دَیَگ ءَ چِست بیت۔ اگں سَونانی بِدَنت گُڈا اِے بے مات وَتی چارێں گُلُّڈاں بِزیریت ءُ کُج ءَ بُرَوت؟ مَن ءَ یَکّے ءَ تَئی سۆج داتَگ کہ دِل ءِ تَرّێنَگ ءِ ٹِکّ ءُ ٹاک زانت۔ پہ وَتی ھُدا ءَ بِچار، اِشیا اَنچێں وَڈے بِکَن کہ دِل ئِے چَہ ھَمے جَنۆزام ءَ بُرَوت ءُ وَتی جَن ءُ چُکّاں بِزیریت۔ ھُدا ءِ گْوَر ءَ بے سَواب…” آئی ءِ اَرساں دَور کُت ءُ چِد ءُ دێم آئی ءَ گَپّ کُت نَکُت۔
مَن ءَ اِشی ئے سَر ءَ سَکّ بَزَّگ بُوت ءُ دِل ءَ گُشت دْرێگَتێں مَن اِے وَڈێں ٹِکّ ءُ ٹاکّ بِزانتێں۔ مَن نێمچَمّی وَتی لۆگبانُک ءِ نێمَگ ءَ چارِت، آئی ءِ چَمّ آپُلُک اِت اَنت۔ مَن ھَیران اِتاں کہ چے بُگشاں۔ اَناگَہ آئی ءِ گالِوار ءَ مَن ءَ پَدّرَہێنت۔
“وَتی چُکّانی سَر ءِ سَواب ءَ مَن ءَ بے اُمێت مَکَن۔” آئی ءِ گالِوار ءَ اُمێت ءِ ھَمراہی ءَ بَزَّگی ھَوار اَت۔
مَن یَکّ نِزَرے آئی ءِ نێمَگ ءَ چارِت۔ ءُ پَدا پاد اَتک ءُ شُتاں، وَتی کِتابانی کَباٹ پَچ کُت، دَست تۆک ءَ بُرت، کِتابے دَر کُت۔ کِتاب واجَہ جی آر مُلا ءِ شَیرانی دَپتَر “بَژن” اَت۔ پَدا مَن اِسپێتێں کاگَدے زُرت ءُ پہ بَژنیگێں دِلے کِتاب ءِ دَپ پَچ کُت۔ لَہتے تاک ءِ لێٹێنگا رَند، ھما کاگَد دێم ءَ کُت ءُ کِتاب ءَ چارانا کاگَد ءِ سَر ءَ نِبِشتَہ کُت۔ “سَبر ءِ بَرے شیرێں”۔
اِے میان ءَ مَن دیست، جَنێن ءِ چَمّ یَکَّجّی مَن ءَ سَکّ اَنت ءُ بَزَّگ بَزَّگ ءَ مَن ءَ چارَگ ءَ اِنت، بلے ھَمے بَزَّگی چارَگَنی تَہا مَن چَہ آئی ءِ دێم ءَ اُمێت ءِ رُژنے ھَم دیست۔
“اِشیا بِزیر، آپ یا چاہ ءِ تَہا بُشۆد ءُ ھَمے آپاں وَتی زامات ءَ بْوارێں۔ اِنشالّا ھُدا ھَیر کَنت۔”
مَن ھَمے کاگَد پێتک ءُ آئی ءِ دَست ءَ دات۔ بلے مَن آئی ءِ چَمّ چارِت نَکُت اَنت۔ آئی ءَ تاید زُرت ءُ وَتی دَست پَندۆل ءَ بُرت، چَہ پَندۆل ءَ یَکّ گُکّ بَستَگێں پُچے دَر کُت ءُ گُکّ ءِ بۆجَگ ءَ لَگِّت۔ مَن دیست پُچ ءِ تَہا چیزّے کَلدار اِت اَنت کہ آئی ءَ مُچّ ءَ کُت اَنت ءُ مَنی نێمَگ ءَ شَہار دات اَنت۔
“بیبی! مَن پَرے کار ءَ زَرّ نَگِراں۔” مَن گُشت۔ بلے آئی ءَ مَنی گَپّ دِلگۆش نَکُت ءُ زَرّ مَنی دێم ءَ بُن ءَ اێر کُت اَنت ءُ پاد اَتک۔ گۆں پاد آیَگ ءَ گُشادێں گاماں چَہ لۆگ ءَ دَر اَتک۔
یَکّ کَترَہے مَن ءُ مَنی لۆگبانُک یَکّے دۆمیگ ءِ چَمّاں چارَگ ءَ لَگِّتێں بلے پَدا زیت مَن وَتی دێم ءِ زَرّ چِت اَنت ءُ آئی ءِ رَند ءَ کَپتاں۔
“بیبی، بیبی، اُو بیبی!” مَن آئی ءَ تَوار جَنان اِتاں۔ بلے آئی ءَ چَکّ نَجَت ءُ اَنگا وَتی گام تْرُندتِر کُت اَنت۔ مَن اوشتات ءُ آئی ءَ چارَگ ءَ لَگِّتاں۔ کَمّے دێم ءَ آ لۆگے ءَ پِر تَرِّت ءُ چَہ مَن اَندێم بُوت۔ مَن پَدا بے رَو کُت ءُ لۆگ ءَ اَتکاں۔
“نی تَو دِگِہ ھِچّ کار مَکَن۔ مئے لاپ شَرّی ءَ دَر کئێت۔” مَنی لۆگ ءِ پُتِرَگ ءَ گۆں مَنی لۆگبانُک ءَ دَرّاێنت۔ آئی ءِ گالِوار ءَ تَژن ھَوار اَت۔
مَن آ زَہر ءَ زَہر چارِت ءُ ھِچّ نَگُشت۔ اِے سَہت ءَ مَن ءَ آئی ءِ گَپّ چۆ تیر ءَ تَورَگ ءَ اَت۔
زَرّ مَنی مُچّ ءَ اِت اَنت۔ ھما وَڈ ءَ آئی ءَ پێتکَگِت اَنت، ھما وَڈ ءَ مَن کِتابانی کَباٹ ءِ کُنڈے ءَ چَگَل دات اَنت۔
ماہے نَگوَست۔ یَکّ رۆچے مَن ءَ ھال ءَ گِپت کہ آئی ءِ زامات ءَ آئی ءِ جِنِکّ ءِ سَون داتَگ اَنت ءُ ھما جَنۆزام گِپتَگ۔ ھَمے رۆچ ءَ مَن کَباٹ پَچ کُت ءُ زَرّ دَر کُت اَنت ءُ ھِساب کُت اَنت۔ یَکّ پَنچ سَدیگے اَت، چار سَدیگ ءُ یَک پَنجاہیگے اَت، چار دَہی ءُ دو پَنچیگ اِت اَنت، بَزاں ھَزار کَلدار سَرجَم اَت۔
<سترُنگ><اِم>گُلام نِگوَری