<اِم>(ھالترانے گۆں ناگُمان ءَ )اِم>
<اِم>جُست کَنۆک : سَلال ساوَڈاِم>
جُست : تَو زُبان ءَ چیے سَرپَد بَئے؟ تَئی ھَیال ءَ زُباں چیے؟
پَسَّو: زُباں چۆ سَرزاہِرا لَبزانی مُچّیے، تَوارانی مُچّیے کہ یَکّ مَردُمے ءِ ھَبَر ءَ دُمیگ ءَ سَر کَنت۔ بلے زُبان ءِ اَرزِشت بَسّ ھَمینچ نَہ اِنت۔ زُباں تَئی ھَر چیزّ ءِ بُنیاد اِنت۔ ھَر اِلم ءِ، سائنس ءِ ھَر شاہ ءِ، لَبزانک ءِ، سْیاسَت ءِ، اِزم ءِ، ھَرچی کہ مَردُم کَنت، آ دْرُستانی بُنیاد اِنت۔ ءُ دُنیا ءِ تَہا ھَر چیزّے کہ بیتَگ، وَہد ءَ دانکہ رۆچہ مَرۆچی، آ دْرُستێنانی ھما اَمبار ھَمے زُبان ءِ تَہا اِنت۔ زُباں کہ مَبیت مَردُم ءِ دێمرَوی اوشتیت، بَلکێں پُشت ءَ رَوت، ھَلاس بیت۔ ءُ پہ یَکّ راجے ءَ زُبان ءِ اَرزِشت اِش اِنت کہ زُباں راج ءِ وَجُود ئے، راج ءِ ھَستی ءِ بُنیاد اِنت۔ زُبان ءُ زِمین، اِے دوێں چیزّ راج ءِ بُنیاد اَنت۔ اِے کہ مَب اَنت، راج ھَلاس، کَوم مِریت۔
جُست : در! اَنچۆ کہ شُما وَتی <اِم>ویدِ کْلیپاِم>اِے ئے تَہا ھَمے تُرس ءُ گُماں پَدَّر ءَ کُتَگَت کہ بَلۆچی زُباں پَدرَوی کَنان ءُ پُشت ءَ رَوان اِنت۔ چۆ بیت کہ باندا بے گْواہ بِبیت، بلے دُمی نێمَگ ءَ، اِے ھَم مارَگ بیت، یَکّ کَچّے ءَ مئے تَہا اِے پِگر ءُ نَپسییاتی مارِشتے اَتکَگ، مَرا وَتی زُباں رَکّێنَگ ءُ آئی ءِ ھَتِرا جُہد کَنَگی اِنت۔ لَبزانک ءُ <اِم>لیتِرَتُورِاِم>ئے تَک ءَ ھَم کَمّ کَمّا جْوَنێں وَڈے ءَ کار بَیان اِنت۔ نِبِشتَہ ءُ وانَگ بَیَگ ءَ اِنت کہ نوں ما گُشت نَکَنێں، ھِچّ نَبَیَگ ءَ اِنت گُڈا اِے بُنیاد ءَ تَو بَلۆچی زُبان ءِ باندات ءَ چۆن گِند ئے؟
پَسَّو: جی ھَو! مَن اِے گَپّ جَتَگ کہ بَلۆچی زُباں رۆچ پہ رۆچ پُشت ءَ رَوان اِنت۔ ھَمے پَیم بْراہُوی زُباں ھَم ءُ بَلۆچانی اێدِگِ زُباں کہ ھَست اَنت، دْراہ پُشت ءَ رَوان اَنت۔ ءُ یَکّ زُبانے دێم ءَ رَوان اِنت یا پُشت ءَ رَوان اِنت، اِشی ئے زانَگ ءَ دِگِہ بَلاہێں اِلمے نَلۆٹیت، دِگِہ پی-اِچ-ڈی ءُ دِگِہ ڈِگریے نَلۆٹیت۔ بَسّ لَہتے نِشانی اَنت کہ تَو آہاں گِند ئے۔ ءُ مَستِرێں نِشانی ھَمِش اِنت کہ ھَر پَدرێچ ءَ رَند زُباں کَمّ تَرّاں بیت۔ ھَر نَسل ءَ رَند زُبان ءِ لَبز گار بَیاں بَنت۔ نی ما بِچارێں کہ، ما وَتی پیرێناں بِچارێں۔ اِینچ لَبز، بَلۆچی ءِ اِینچ لَبز کہ آہاں زانتَگ، ما نَزانێن ءُ اِینچ کہ ما زانێں، مئے چُکّ نَزان اَنت۔ بِزاں ھَر پَدرێچ ءَ رَند زُبان ءِ لَبز گار بَیان اَنت ءُ اِے زُبان ءِ پُشت ءَ رَوَگ ءِ نِشانی اِنت۔ ءُ اِے پَیم کہ بِبیت گُڈا یَکّ رۆچے اَنچێں کئێت کہ زُبان ءِ جِند گار بیت پَرچاکہ زُباں وَ ھَمے لَبز اَنت۔ لَبز کہ رَو اَنت ءُ گار بَنت، زُباں کُج ءَ اوشتیت۔ نی اِے بے شَکّ، کَمُّکے ھَمے سَما ءُ ھَمے زانت اَتکَگ مئے تَہا کہ زُبان ءِ واست ءَ چیزّے کَنَگی اِنت، پہ زُبان ءِ رَکّێنَگ ءَ جُہدے کَنَگی اِنت بلے دَنینگَ ما آ ھَدّ ءَ کَنَگ ءَ نَہ اێں کہ، یَنی مئے جُہد آ ھَدّ ءَ نَہ اِنت کہ مئے زُبان ءَ رَکّێنِت بِکَنت۔
جُست: اگں زُباںے ءَ سَرکاری پُشت ءُ پَناہی گۆں مَبیت، آ ھِچّ رَنگ ءَ دێمرَوی کُت نَکَنت ءُ ماں مَرگ ءِ پانچُلاں رَوت؟
پَسَّو: جی ھَو! سَرکاری پُشت ءُ پَناہی یا تَو گُشت کن ئے کہ سْیاسی پُشت ءُ پَناہی، پہ یَکّ زُباںے ءِ دێمرَوی ءَ اَلَّمی اِنت۔ سَرکاری پُشت ءُ پَناہی کہ گۆں بیت، سْیاسی کُمَکّ کہ گۆں بیت گُڈا زُبان ءِ جێڈَہ ءُ جَنجالانی گیشّێنَگ ءِ ھاتِر ءَ اِدارَہ جۆڈ کَنَگ بَنت۔ آ زُباں وانَگجاہاں وانێنَگ بیت، آ زُباں رَساندَر ءِ تَہا وَتی ھَکّێں جاہ ءَ گیپت، مێڈیا ئے تَہا۔ نی اِے چیزّ، اِے لازُمی اِنت۔ دانکہ سَرکاری پُشت ءُ پَناہی، سْیاسی پُشت ءُ پَناہی گۆں مَبیت، مئے زُباں دێم ءَ شُت نَکَنت۔ بِچار، اَنّی مئے زُبان ءِ پُشت ءَ رَوَگ ءِ مَستِرێں سَوَب سْیاسی اِنت کہ ما سْیاسی ھِساب ءَ گُلام ایں پَمِشکا مئے زُباں پَشت کَپتَگ۔ پَمِشکا مئے زُبان ءَ نہ اِسکۆل ءَ جاگَہ ھَست، نَنکہ سَرکاری کارگِساں۔ سْیاسی ءُ سَرکاری پُشت ءُ پَناہی اَلَّمی اِنت۔
جُست: در! مَ وَتی چاگِرد ءَ گِندێں۔ اِد ءَ ھما کہ مئے ناوانِندَہ ءُ لَس مَردُم اِنت، آئی ءِ گْوَر ءَ وَتی زُبان ءِ زَگر ءُ شَرتِرێں دْرۆشُم مَنتَگ ءُ وَتی چُکّانا ھَم ھێل بَلۆچی دَ اَنت ءُ ماں بَلۆچی ءَ پَر ماێن اَنت ءُ گَپّ کَن اَنت بلے آ کہ مئے وانِندَہ اِنت ءُ وَت ءَ را دێمرَویپَسُند ءُ رُژناپِگر زان اَنت، آیانی دَپ ءَ اِینچ وَتی زُبان ءِ لَبز نێست، اِینچ کہ اِنگلِش ءُ اُردُو۔ ءُ ماں وَتی چُکّانی دَپ ءَ ھَم اِنگلِش ءُ اُردُو نادێنتَگ۔ اِے اِشانی گێش وانِندَہ بَیَگ اِنت؟ یا اِشی ئے مَستِرێں اِلَّت کُجام بیت کَنت ءُ چی اِنت؟
پَسَّو: جی ھَو، اِے گَپّ راست اِنت۔ ھما مَردُماں کہ اِسکۆلاں وَنتَگ، ھَماہاں کہ ما وانِندَہ گُشێں، آہانی کِرّا بَلۆچی زُباں لێگارتِر اِنت۔ آہانی زُباں پْرُشتَگ، آہانی دَپ ءَ دِگِہ زُبانانی لَبز گێشتِر نِشتَگ اَنت۔ اِے نَہ اِنت کہ بَلۆچی ءَ نێست اَنت۔ بَلۆچی ءَ “چِلّ ءُ پَنجاہ” ھَست اِنت بلے آ اَنگا “چالیس پَچاس” کَن اَنت۔ اِے ھَمے چیزّ ءِ اَسَر اِنت کہ تَو اِسکۆل ءَ کہ رَو ئے، اِسکۆل ءَ تَئی زُباں نێست اِنت، ڈَنّی زُبان اَنت، پارسی اِنت، اِنگرێزی اِنت، اَرَبی اِنت، دِگِہ زُبان اَنت۔ آہاں کہ تَو وان ئے، پَدا کَمّ کَمّا تَئی جِند ءِ زُبان ءِ لَبز تَئی دِل ءَ دَر کاینت ءُ آ زُبانانی لَبز تَئی دَپ ءَ نِند اَنت۔ اَنّی بَلۆچی زُبان ءِ شَرتِرێں دْرۆشُم، وَہدی یا کہ تامدارێں دْرۆشُم ھما مَردُمانی کِرّا اِنت کہ آہاں نَوَنتَگ۔ ھَماہاں کہ اِسکۆل ءَ نَوَنتَگ، زُباں ھَماہانی کِرّا اِنت۔ شَرتِرێں زُباں، اَسیلێں زُباں یا زَگرێں زُباں ھَماہانی کِرّا اِنت ءُ اِے مَردُماں کہ وَنتَگ اِشانی کِرّا زُباں نێست۔ یَکّ سَوَبے اِشی ئے ھَمِش اَت کہ مَن گُشت کہ آ ھێلدار بَنت کہ ڈَنّی زُباںے ءَ وان اَنت پَمِشکا آہانی زُبان ءَ ھما ڈَنّی لَبز نِند اَنت۔ ءُ دُمی سَوَب کَمتِری ئے مارِشت اِنت۔ اِے مَردُم کہ ما آہاں وانِندَگ گُشێں، اِے اَسَل ءَ نێموانِندَگ اَنت۔ ھما گِند ئے گُش اَنت کہ “ نێمہَکیم ھَترَہِ جاں، نێمُلّا ھَترَہِ اِیماں”۔ اِے نێمُلّائیں مَردُم اَنت۔ ما ھَرچی کہ ھَست ایں، ما ھَرچی کہ اُردُو، اِنگرێزی، اَرَبی ءُ پارسی اِسکۆلانی تَہا وَنتَگ، ما دْراہ نێمُلّا ایں۔ مئے ھَیال ءَ آ زُباں شَرتِر اَنت ءُ مئے ھَرابتِر اِنت۔ اِے کَمتِری ئے مارِشت اِنت کہ آہانا اِے چیزّ پَرما ایت کہ وَت ءُ وَتی چُکّاں ھَم وَتی وَڈ ءَ کَنَگ ءَ اَنت۔
جُست: زُبان ءِ زِندَگ دارَگ ءَ لَبزانک چی کُت کَنت؟
پَسَّو : زُبان ءِ زِندَگ دارَگ ءَ لَبزانک ءِ وَتی کِردے ھَست اِنت۔ آئی ءِ تَہا ھِچّ شَکّ نێست پَرچاکہ وَہدے تَو شَرّێں چیزّے نِبِشتَہ بِکَن ئے، شَرّێں شَیرے نِبِشتَہ بِکَن ئے، آ مَردُماں دۆست بیت، مَردُم گێشا گێش وانَنت ئِے ءُ اِے پَیم ھما زُبان ءِ لَبز، زُبان ءِ جِند مَردُمانی کِرّا سَر بیت۔ اَنّی بِچار بَلۆچی ءِ اَہدی شَیر اَنت، وہدی شَیر اَنت کہ مَردُماں پہ دِل یات بیتَگ اَنت۔ یَکّ پَدرێچے ءَ دُمیارَ سَر کُتَگ اَنت، آ ھَمے سَوَب ءَ کہ ھما شَیر ءِ جِند جاندار بیتَگ۔ بَلۆچی ءِ وَہدی شاِری اَنچۆ جاندار اِنت کہ آئی ءَ وَت وَت ءَ را بَراں کُتَگ دێم ءَ ، چَہ یَکّ نَسَلے ءَ دُمی نَسَلا، دانکہ مئے کِرّا سَر بیتَگ۔ یَکّ شَرّێں چیزّے کہ تَو نِبِشتَہ کن ئے، آ پہ زُبان ءَ پاِدَگ اِنت۔ آ پہ لَبزانک ءَ ھَم پاِدَگ اِنت، پہ زُبان ءَ ھَم پاِدَگ اِنت ءُ پہ زُبان ءِ دێمرَوی ءَ ھَم وَتی کِرد ءَ اَدا کَنت۔
جُست: در! یَکّ زُبانے چۆن دێمرَوی کُت کَنت کہ آئی ءَ نَویسَگ ءِ یَکّ رَہبَندے مَبیت۔
پَسَّو: جی ھَو، اِے گَپّ ءَ ھِچّ شَکّ نێست کہ دانکہ زُباںے ءَ نِبِشتَہ رَہبَند مَبیت، سْیاہَگ مَبیت، آ دێمرَوی کُت نَکَنت۔ آ دێمرَوی ءَ بِلّ، آ وَ زِندَگ بیت نَکَنت اَنّیگێں دَور ءَ ۔ بِچار، وَہدی دَور شُتَگ۔ وَہد ءَ نِبِشتَہ کَنُکائی نَبیتَگ۔ وَہد ءَ زُباں ھَمے وَڈ ءَ دێم ءَ شُتَگ کہ مات ءُ پِتاں ھما زُبان ءَ کہ گَپّ جَتَگ، چُکّاں اوں، پَدا نُماسَگاں۔ ھَمے پَیم ءَ نَسَل دَر نَسَل آ زُباں رَواں بیتَگ۔ بلے نی چۆ نَہ اِنت۔ نی تَرا نِبِشتَہ ءِ تَہا آیَگی اِنت۔ اگں تَو نِبِشتَہ ءِ تَہا اَتک نَوَر ئے، اگں تَئی زُباں نِبِشتَہ ءِ تَہا اَتک نَکَنت، آ دێم ءَ نَرَوت، آئی ءِ رۆچ ھِسابی اَنت۔ اِے گَپّ ءَ ھِچّ شَکّ نێست، بے سْیاہَگ ءَ زُباں نَمانیت اَنّیگێں دَور ءَ …
جُست: تَو زُباندۆستیا چۆن گیشّێن ءِ؟ اِشی ئے لۆٹ چی اَنت؟
پَسَّو: زُباندۆستی، اَنچۆ کہ چَہ نام ءَ زاہِر اِنت، زُبان ءِ دۆستی اِنت، زُبان ءِ دۆست دارَگ اِنت۔ بَسّ اِے نَہ اِنت کہ تَو گُش ئے “<اِم>بَلۆچی مئے وَتی شَہدێں زُبان اِنتاِم>”، پَدا دَست کُٹّ ءَ اَنت، نِشتَگ ءِ۔ نہ۔ زُباندۆستی بَید اِنت، تَرا اَمَل بِپَرما ایت۔ زُباندۆستی تَرا زُبان ءِ دێم ءَ بَرَگ ءِ ھاتِر ءَ جُہد بِپَرما ایت۔ زُباندۆستی تَئی تَہا اِے مارِشت ءَ پێداگ بِکَنت کہ اِے مَنی زُبان اِنت، اِشی ئے دێم ءَ بَرَگ ءِ زِمَّہ مَنیگ اِنت۔ اَنچۆ کہ چُکّ اِنت۔ تَو وَتی چُکّ ءِ زِمَّدار تَو ئے، وَت ئے، دِگِہ مَردُم نَہ اِنت۔ ھَمے پَیم ءَ وَتی زُبان ءِ دێم ءَ بَرَگ ءِ زِمَّوار ھَم تَو وَت ئے۔ دِگِہ مَردُمے نَیَیت تَئی زُبان ءَ دێم ءَ نَبارت۔ دَرکَوم تَئی زُبان ءِ دَردوار نَہ اِنت، اِینچ گَموار نَہ اِنت۔ تَرا وَتی زُباں وَت دێم ءَ بَرَگی اِنت، پَرِشیا وَت جُہد کَنَگی اِنت، پَرِشیا وَت راہ ءُ دَر پَٹَّگی اَنت۔ اِے چیزّ اِنت زُباندۆستی۔ بَسّ اِے نَہ اِنت کہ ھُشکا دَلی دالی کن ئے، ھُشکا زُبانی جَمَہ ھَرچ کن ئے پہ زُبان ءَ ۔ اِے وَڈ نہ، اَمَلی کار لۆٹیت۔ زُباندۆستی اَمَلی کار ءِ نام اِنت۔
جُست: در! گُڈسَرا پہ نۆدَربَراں وَتی زُبان ءِ دَرگَت ءَ تَئی کُلُہ چی اِنت؟
پَسَّو: گُڈسَرا مَن <اِم>اُونِسکاِم>ئے کُلُہے سَر کَنَگ لۆٹاں سَنگَتاں۔ <اِم>اُونِسکاِم> بِزاں <اِم>اُونیتِد نَتیُنس اِدُوکَتیُنَل، سْکیِنتیپیک اَند کُولتُورَل اُرگَنیزَتیُناِم> گُشیت کہ زُباں دو چیزّ ءِ سَوَب ءَ گار بیت۔ یَکّے ھَمِش اِنت کہ ڈَنّیگانی لَگَت ئِے گُٹّ ءَ بِبیت، بِزاں راجی ھِساب ءَ تَو گُلام بِب ئے ءُ دُمی تَئی جِند وَتی زُبانارَ دۆست مَداریت۔ اِے دو سَوَب اَنت بِزاں ڈَنّیگانی لَٹّ ءُ لَگَت ءُ تَئی جِند ءِ بے مِہری ءُ نادۆستی۔ اِے چیزّ زُبان ءَ را گار کَنت۔ دانکہ تَو راجی ھِساب ءَ آزات مَب ئے، دانکہ تَو راجی گُلامی ءِ سانکَلاں مَسِند ئے ءُ دانکہ تَو وَتی جِند ءِ زُبان ءَ وَت دۆست مَدار ءِ، زُباں دێم ءَ شُت نَکَنت ءُ زُباں رَکِّت ھَم نَکَنت۔