مَنی ءُ تَئی سُہبانی نْیام ءَ سَکّ باز تَپاوَت ھَست، کَمال۔
مَرچی بِلّ ئِے کہ تَو ھَمے مێتَگ ءَ نِشتَگ ءِ کہ دَہ سال ساری مَن نِشتَگ بُوتَگاں۔ مَرچی بِلّ ئِے کہ تَو ھما بَرانڈَہ ئے دێم ءَ وَپس ئے کہ دَہ سال ساری مَن وَپتَگاں۔ مَن زاناں تَئی مات ھما چُلّ ءَ ناں پَچیت کہ مَنی مات ءَ دَہ سال ساری پَتکَگ۔ بلے اَنگَت تَئی سُہب ءُ مَنی وَہد ءِ سُہبانی نْیام ءَ مَزَنێں تَپاوَتِ ھَست۔ مَن ءَ سُہبا اِے باگ ءِ سَر ءِ جِنگُل ءُ کُلیانی تَوار ءُ پَسانی پِلێنگَگاں پاد کُتَگ۔ مَن ھَردێں کہ پاد اَتکَگاں، سارتێں گْواتے ءَ گینّ کَشِّتَگ۔ ءُ مَنی دێم پہ دێم کَپۆدَر چَہ وَتی ڈَبّا دَر آیَگ ءَ بُوتَگ اَنت۔ مَن کَپۆدَر کہ “آ آ آ” کُتَگ اَنت، داں ھَمے دَمان ءَ تینّ ئے سَر ءَ پَتکَگێں اَوَلی نان ءِ بُو تالاں بُوتَگ۔
بلے کَمال! تَرا سُہبا تیر ءُ بَمبانی تَوار پاد کَن اَنت۔ تیرانی پَشَنگ تَئی کَپۆدَر اَنت۔ تَو کہ پاد کا ئے ءُ سِلّێں گْواتے ءَ گینّ کَشّ ئِے۔ تَئی آتراپ ءَ نان ءِ اِنّاں، ٹۆپ ءُ بَمبانی بُو کئێت۔ اِے مَزَنێں تَپَوَتے، سَکّێں مَزَنێں تَپاوَتے۔
<سترُنگ><اِم>سَلام اِلاہی