پُلّێں بِچکَندے بْیارتێں
ٹَہلێں دیدارے بْیارتێں
چَہ دَرانڈێہا تَو اَتک ئے
آجُوی جارے بْیارتێں
بَیرَک ءُ پَجّاری تاکے
نۆکێں کَلدارے بْیارتێں
مَہرَنگ ءُ سَبیہَہ ءُ سَمّی
پُلّێں دَزگُہارے بْیارتێں
بَزَّگ ءُ وار ءُ گَریباں
راستێں دَردوارے بْیارتێں
پہ گُلێں راج ءُ زِمین ءَ
رَہبَر ءُ یارے بْیارتێں
شَکَّلێں ماتی زُبان ءَ
زانت ءُ شیوارے بْیارتێں
پہ وَتی سالۆنکێں زِمین ءَ
زَرگِری ھارے بْیارتێں
پُلگُدێں بانۆر ءَ ڈێہے
سَہت ءُ سینگارے بْیارتێں
بَزَّگێں راجانی واست ءَ
تْرُندێں کُوکّارے بْیارتێں
پہ بَداں کُچَّل ءُ تَہلێں
زَنڈێں بیہارے بْیارتێں
پہ سُبَکّێں کاسَگچَٹّاں
گَجّ ءُ لێتارے بْیارتێں
دُدێمی آدێنکاں راج ءِ
دُسَری مارے بْیارتێں
<سترُنگ><اِم>داد شاشانی