(اَسلَم بَلۆچ ءُ آئی ءِ نَمیرانێں دۆزواہانی نام ءَ )
شَہکَور کہ دَریا نۆش کَن اَنت
بَنت مَست ءُ مَلار تَنسارێں نِہِنگ
لێپار ءُ پَتار پاگاس رَو اَنت
لیڈانی کَتار شیمّۆش وَر اَنت
گۆکێں شَمۆش اَنت رَہبَنداں
جَنگانی ھَوَسّ، پیلّانی شَہار
شَہمات مَزاری ھَنکێناں
بے رانی بَدَل باندات بَ اَنت
باندات پہ کَسّ ءَ کَلپ نَبَنت
سَرتَلّ ءَ رُد اَنت ھۆنانی بَہار
اَہُوگ چَر اَنت اوستانی لَد ءَ
اِستار بَل اَنت اُمّێت ءِ پَدا
گَنجانی ھَزانَگ بَنت آباد
سَر بَنت گَچَل سْیَہمارانی
شاہین کہ وَہدے ھینژ کَن اَنت
دَر کاینت چَمّ ھُوکّانی بَدێں
رۆباہ ءُ شَگال ھۆنڈاں مِر اَنت
سَودا پہ سَراں تاواں کَپ اَنت
رَہ بَہر نَبیت دُزّاں پہ تَچَگ،
مالوار نَبَنت مالدار کَدی
بے مُزّ نَبَنت اُپّار کَدی
بے بْرَمش نَبَنت سَہدار کَدی
اِے راہ کُج ءَ بیت بے مِنزِل
تاں سێنَگ بَنت دْریکّۆکێں دِل
جُستانی جَواب ءَ لۆٹێں ما
دْرُستانی جَواب ءَ لۆٹێں ما
دْرُستانی ھِساب ءَ لۆٹێں ما
چَولانی تَیاب ءَ لۆٹێں ما
آجُوی ءِ واب ءَ لۆٹێں ما
<سترُنگ><اِم>مَنزُور بِسمِل