مَن ءَ سْیاہێں کۆٹے گْوَر ءَ اِنت ءُ کارگِسے ءَ نِشتَگاں۔ یَکّے اَتک، آئی ءَ مَن ءَ گُشت کہ کَمّ وَدار کَن۔ مئے ڈارِکٹَر اَنُّون کئێت۔
مَن جُست کُت: "شُمئے ڈارِکٹَر کُج اِنت؟"
آئی ءَ گُشت: "ڈَنّ ءَ سِگرێٹ ءِ کَشَّگ ءَ شُتَگ۔ بَسّ پێداک اِنت۔"
آ شُت۔۔۔
مَنی چَمّ دیوال ءِ دێم ءَ ٹَنگِتَگێں پَینٹِنگ ءَ کَپت اَنت کہ آئی ءِ تَہا یَکّ کَماشے رێکے ءِ سَر ءَ اوشتاتَگ ءُ دَریا ءِ نێمَگ ءَ چارَگ ءَ اِنت۔ آ دَریا ءَ اَنچۆ چارَگ ءَ اِنت، گُش ئے زانا آئی ءَ وَتی زِندَگی ءَ دَریا نَدیستَگ۔ مَن گُشت کہ پاد کایاں رَواں پَینٹِنگ ءَ نَزّیک ءَ چاراں۔ اَنچۆ مَردے اَتک۔ چَہ آئی ءِ پُچّ ءُ پۆشاکاں زانَگ بَیَگ ءَ اَت کہ آ اَنچائیں مَردُمے نَہ اِنت۔
مَن آئی ءِ دێم ءَ پاد اَتکاں۔ آئی ءَ مَن ءَ گُلاێش کُت۔ مَرد ءَ گُشت: "بُرێں"۔ مَن آئی ءِ ھَمراہ بُوتاں۔ مَن ءُ آ لِپٹے ءَ سْوار بُوتێں، بُرز ءَ شُتێں۔ آئی ءَ مَن ءَ گُشت کہ: "اِے مَنی زاتی اِدارَہ اِنت۔ مَن چاگِرد ءِ گِہتِری ءِ ھاتِر ءَ کار ءَ آں، بلے مَنی اِدارَہ ءِ سَر ءَ کَزایے کَپتَگ۔"
مَن جُست کُت: "چۆنێں کَزایے؟"
آئی ءَ پَسَّہ دات: "شَش ماہ اِنت کہ مَن وَتی دَزگَٹّیانی سَوَب ءَ اِدارَہ وَہد دات نَکُتَگ ءُ اِد ءَ نَیَتکَگاں۔ نوں کہ مَن واتَرّ کُتَگ تَ مَنی اِدارَہ ءِ دْرُستێں کَمپیُوٹَرانی لاپ پُرّ اَنت۔ مَن ھَیراں آں کہ نوں اِے کَمپیُوٹَراں چۆن بِکَناں۔ مَن ءَ اَنچێں مَردُمے لۆٹیت کہ اِے کَمپیُوٹَرانی چُکّاں دَور بِدَنت۔"
مَن گُشت: " مَن کَمپیُوٹَر ئے کار ءَ نَزاناں، ءُ چُشێں کار ھَم مَن ھِچبَر نَکُتَگ۔"
آئی ءَ اَنچۆ پہ اَجَکَّہی مَنی نێمَگ ءَ چارِت ءُ گُشت: "گُڈا تَو اِد ءَ چی ءَ اَتکَگ ءِ؟"
مَن گُشت: "مَن ءَ یَکّے ءَ گُشتَگ کہ اِے اِدارَہ واب بَہا کَنت۔ مَن اِد ءَ وابے ءِ گِرَگ ءَ اَتکَگاں۔"
مَنی اِے گَپّ ءَ گۆں مَرد ءَ وَتی لُنٹ گَٹّ پاتک اَنت ءُ دَست پێشانی ءَ بُرت۔ پَدا دَرّاێنت ئِے: "ھاں تَو گِراکے ئے۔"
مَن گُشت: "ھَو۔"
ما پَدا جَہل ءَ اێر کَپتێں۔ ھما پێسَریگێں جاہ ءَ اَتکێں کہ مَن اِدارَہ ءِ ڈارِکٹَر ئے وَدار کُتَگَت۔
پَینٹِنگ ھما جاہ ءَ ٹَنگِتَگَت بلے نوں آئی ءِ تَہا کَماش ءُ دَریا ءِ اَکس ءِ جاہ ءَ کَسانێں چُکّے اَت کہ اِسپێتێں اَپسے ءَ سْوار اَت، ءُ مَنی نێمَگ ءَ اَنچۆ چارَگ ءَ اَت، گُش ئے زانا مَن ءَ پَجّاہ آرَگ ءَ اِنت۔
<سترُنگ><اِم>چَندَن ساچ