آزمان ءَ آپ رِچَگ ءَ اِنت…
آئی ءَ مَنی چَمّانی تَہا چارِت گُشت۔
آپ نَرِچَگ ءَ اِنت، ھَور بُوَگ ءَ اِنت…
مَن وَتی دَست ءِ کِتاب اێر کُت ءُ دَریگ ءَ ڈَنّ چارِت۔
گُڈا ھَور ءَ آپ نَرِچیت؟
آئی ءَ جُست کُت۔ مَن ھِچّ نَگُشت، آ ھَم دَریگ ءِ کِرّا اَتک اوشتات۔
آزماں پَرچا گِندَگ نَبیت…
گُلام چے زان اَنت…
مَن پَدا وَتی کِتاب چِست کُت۔
یَکّ اَناگَہ آئی ءَ دَریگ ءِ پَردَہ بَست اَنت۔ کۆٹی تَہار بُوت ءُ آئی ءَ لَیٹ رۆک نَکُت ءُ شُت۔ دَروازَگ آئی ءَ سَکّ ءَ جَتَگَت…بلے سَہتے نَگوَست آ پَدا اَتک۔
تَو پَردَہ پَدا پَچ کُت اَنت…
ھَو…۔ کۆٹی تَہار اَت…
لَیٹ چی ءَ رۆک نَکُت…
ءُ آئی ءَ لَیٹ رۆک کُت ءُ پَردَہ بَست اَنت۔ کۆٹی ھما پَیم ءَ بے تْرِکّ ءُ تَوار اَت۔
مَنی تاک لێٹێنَگ ءُ آئی ءِ ساہ ءِ تَوار بَسّ آیَگ ءَ اَت۔
تَو ھَبَر چی ءَ نَوَر ئے؟…۔
ھَمے سَہت ءَ مَن ءَ گُماں بُوت کہ ھَور ءَ بَسّ کُت۔ مَن زُوت زُوتا پَردَہ پَچ کُت اَنت۔ ڈَنّ ءَ تَہار اَت۔ لۆگانی لَیٹ ءُ پْرُشتَگێں ساہِگانی جَنگ اَت۔ ھَور ءَ گُش ئے دَم بُرتَگَت بلے اَنگَت تْرَمپ اَت… مَن بِچکَندِت۔
تَو چی ءَ کَندَگ ءَ ئے؟
شَرّ اِنت، ھَور اَنگَت ھَست اِنت…
ءُ آ یَکّ رَندے پَدا دِلگران اَت بلے اِے بَری نہ پَردَہ ئِے کار داشت نہ دَروازَگ ئِے دَست جَت ءُ نَئکِہ کۆٹی ءَ ڈَنّ شُت۔ بَسّ آئی ءَ ھَبَر نَکُت ءُ ھَردکہێں آ تَوار ءَ چَہ کَپت داں مَن زانت کہ آ اَچ مَن دِلگران اِنت ءُ پَدا آئی ءَ کِتابے چِست کُت ءُ آُرت، مَنی کَش ءِ کُرشی ءِ سَر ءَ نِشت۔
چے وانَگ ءَ ئے…۔
مَن جُست کُت۔
وانَگ ءَ نَہ آں، چارَگ ءَ آں…۔
آئی ءَ پَسَّو دات…
چے چارَگ ءَ ئے…
نَگُشاں گۆں…۔
آئی ءِ اِے پَسَّو ءَ مَن ءَ ھَبَکَّہ کُت۔ ءُ پَدا مَن آئی ءِ دَست ءِ کِتاب پَچ گِپت۔ آ مُرتَگێں بالُوے اَت کہ کُنِری تاکانی کِرّا دێر اِنت ھُشک بُوتَگَت۔ مَن ءَ یاد نَہ اَت کہ مَن کَدی اێر کُتَگَت ءُ مَن نَزانت کہ پَرچا اێر کُتَگَت۔
گِند ئے مَن بالُوے بِباں…
آئی ءَ کِتاب ءِ سَر ءِ بالُو ءِ بانزُل وَشّ وَشّا لَتارت اَنت ءُ گُشت۔
شَرّ اِنت، دَستے ءَ کَپ ئے، کِتابے ءَ بَند بَئے۔۔
تَو گُڈا آ کِتاب ءَ وان ئے…
مَن ھِچّ نَگُشت…تَوار گُش ئے مُرتَگَت۔ کۆٹی چَہ بْرَمش ءُ چِڈِکَّہ ءَ کَپتَگَت۔
آ بالُو ءَ دَزگَٹّ اَت ءُ مَن کِتاب ءَ ۔
ھَمے سَہتاں گْوات گُش ئے سَردتِر بُوت۔ دَریگ ءَ آۆکێں گْوات ءَ آئی ءِ گُشاں بال دات ءُ پَدا آ اَت… کۆٹی اَت۔ جِنِکّ اَزاب اَنت، آ جِنِکّ گَندَتِر کہ گُشانانی دُمب ءَ کَپتَگ اَنت۔
تَو پہ گُشاںے ءَ وَت ءَ کُشت ءُ اێر کُت…
ءُ تَو پہ کِتابے ءَ مَن ءَ …
ءُ پَدا کَسّ ءَ گَپّ نَجَت…۔ کَسّ ءَ ھَم…۔ مِرمِرانکێں لَیٹ اَت۔ گْوات ءُ آئی ءِ گُشان اَت۔ کِتاب گۆں بالُو ءَ بارێں کُج ءَ شُتَگَت، مَن نَدیست۔ مَن چَمّ پہ کِتاب ءِ شۆہاز ءَ شانک دَیَگ لۆٹِت اَنت کہ ھَور ءَ اێر دات۔ آئی ءَ گُشاں یَلَہ دات ءُ مَن شۆہاز وَیل کُت۔
ھَور ءَ گُش ئے ھَبَر وارتَگ۔ بے گاہَئێگ اِنت، بَسّ نَکَنت۔ آئی ءَ چَہ دَریگ ءَ ڈَنّ کُتَگێں وَتی دَست تَہا آُرت اَنت۔ آئی ءِ دْراہێں دَست داں مَنگَلیکاں تَرّ بُوتَگَت اَنت۔
تَو ھَبَر چی ءَ نَوَر ئے؟
گُلام چے بُگُش اَنت؟
ھَور کَدی بَسّ کَنت؟
گُلام چے زانت…
ھِچّ مَزاں۔ گُلام ھِچّ مَزانات اَنت۔
آئی ءَ پَدا وَتی دوێں دَست چَہ دَریگ ءَ ڈَنّن داشت اَنت۔ ھَور آئی ءِ دَستانی سَر ءَ گْوارَگ ءَ اَت۔ لَکیراں مێنَگ ءَ اَت۔ دَست ءِ کِشک ءَ تَچک کَنَگ ءَ اَت۔
تَو وَت ءَ را گُلام چی ءَ گُش ئے؟
مَن اَبَکَّہ بیتاں۔ کِتاب مَن ٹێبَل ءِ سَر ءَ اێر کُت۔ ھَمے سَہتاں مَن ءَ سِگرێٹ ءِ تَلَب بُوت بلے پارکیٹ ھالیگ اَت۔ ءُ آ وَدار ءَ اَت کہ مَن چیزّے گُشاں بلے مَن دیست ھَور تْرُند اَت… تْرَمپانی کَتاراں بَستَگَت۔ سَرکار ءِ بَیرَک سَرجَم ءَ تَرّ بُوتَگَت بلے اَنگَت اوشتاتَگَت… سِپاہیگ اَت اَنت۔۔ مَردُم اَت اَنت… دَروازَگ اَت اَنت ءُ تَرّ ءُ مانتَرّانی جَنگَلے اَت۔۔ بِٹِکّ ماں لَد ءَ اێر نَکَپیت۔ لَد سْیاہ ءُ تَہار اِنت۔ گُلام ءَ چِہ کار اِنت۔ مَن ءَ مئے بازار ءِ بَلۆچُک گیر اَتک ءُ پَدا مَن مُدام ءِ ڈَولا گُلامے بُوتان ءُ ھِچّ نَگُشت۔
شُما باندا رَوَگ ءَ اِت؟
مَن اَناگَہ جُست کُت۔
گُلام ھَبَر نَزانت۔ گُلام ھَبَر کُت نَکَنت، بلے گُلام زانت کہ مَن باندا رَوَگ ءَ آں۔ آئی ءَ بِچکَندِت۔
مَن ھِچّ نَگُشت۔ شَپ گُش ئے تَہتِ رَوان ءَ سَوار اَت۔ مَن سَہی نَبُوتاں کہ کَدی بام ءَ دَر دَست جَت۔ کَدی رَسِتَگَت۔ کَدی رۆچ بُوتَگَت بلے مَن سَہی آں، آ ھَمِش اِنت سَہتے بیت کہ شُتَگَت۔ بلے رَوَگ ءَ ساری آ مَنی کِرّا اَتکَگَت…۔ گَپّ ئِے نَجَت۔ پَردَہ ئِے کار نَداشت اَنت۔ بَسّ بے تْرِکّ ءُ تَوار ءَ ھُشکێں بالُو ئِے بُرت گۆں۔
کُنِری تاک ءُ کِتاب اَنگَت مَنی کَباٹ ءَ ھما ڈَول اێر اَنت…۔
ءُ چَہ ھما رۆچ ءَ رَند نَزاناں چی ءَ مئے لۆگانی سَر ءَ ھَردکہێں شَپ ءَ ھَور گْواریت، مَن ءَ گُماں بیت دَریگ ءَ ڈَنّ دو دَست ھَور ءِ سَر ءَ اِنت، تْرَمپ دَستانی دِل ءَ کَپَگ ءَ اَنت، دَست ءِ لیکرَنداں تَچَگ ءَ اَنت ءُ میزّاں میزّانا مَنگَلیکاں دَست جَنَگ ءَ اَنت، ھَمے سَہت ءَ مَن ءَ گیر کئێت آئی ءَ گُشتَگَت۔
تَو ھَبَر چی ءَ نَوَر ئے…
ءُ پَدا ھَور، شَپ ءُ مَن…۔ سَیێں نِندێں جێڈێں کہ ما ھَبَر چی ءَ نَکَنێں…گُلام ھَبَر پَرچا نَکَن اَنت۔
اَناگَہا گِرۆک جَنت۔ شَپ بَزتِر بیت ءُ مَن بے تْرِکّ ءُ تَوار ءَ کُنِری تاکاں ھَور ءِ سَر ءَ اێر کَناں۔
<سترُنگ><اِم>ھَنیپ شَریپ