(شَہیدِ وَتَن نَواب اَکبَر ھان ءِ شَرَپ ءَ )
داں کُوچَگاں آسے بَلیت تَو زِندَگ ئے
داں بُرز ءَ اِستالے چَمیت تَو زِندَگ ئے
داں بُلبُلے پُرسیگ بیت تَو زِندَگ ئے
داں جَنگَل ءَ آسکے ھَزیت تَو زِندَگ ئے
داں آسُمی پُلّے سْرَپیت تَو زِندَگ ئے
داں کُہسَراں گْرَندے کَپیت تَو زِندَگ ئے
داں بَزگَرے پاتاں گْوَپیت تَو زِندَگ ئے
داں شْوانَگے مێشاں زَریت تَو زِندَگ ئے
داں رِندی دیوانے جَمیت تَو زِندَگ ئے
داں کَول ءُ اِکرارے ٹَہیت تَو زِندَگ ئے
داں آشِکے اَرساں شَلیت تَو زِندَگ ئے
داں شاِرے شَیراں گُشیت تَو زِندَگ ئے
داں رۆچ گَردِشتاں گْوَزیت تَو زِندَگ ئے
داں شَپ گۆں واباں اِنسِریت تَو زِندَگ ئے
<سترُنگ><اِم>مُبارِک کازی